Read luganda Makko 1 Bible Online

Makko 1 - luganda bible

Makko 1

¹Okusooka kw'enjiri ya Yesu Kristo, Omwana wa Katonda.

² Nga bwe kyawandiikibwa mu nnabbi Isaaya nti Laba, nze ntuma omubaka wange mu maaso go, Alirongoosa oluguudo lwo;

³ Eddoboozi lye ayogerera waggulu mu ddungu nti Mulongoose oluguudo lwa Mukama, Muluŋŋamye amakubo ge;

⁴Yokaana yajja eyabatiza mu ddungu n'abuulira okubatizibwa okw'okwenenya olw'okuggibwako ebibi.

⁵N'ensi yonna ey'e Buyudaaya n'ab'e Yerusaalemi bonna ne bavaayo ne bajja gy'ali ne babatizibwa ye mu mugga Yoludaani nga baatula ebibi byabwe.

⁶ Ne Yokaana yayambalanga byoya bya ŋŋamira, n'olukoba lw'eddiba mu kiwato kye, ng'alya nzige n'omubisi gw'enjuki ez'omu nsiko.

⁷ N'abuulira ng'agamba nti Ajja ennyuma wange ye ansinga amaanyi, so sisaanira kukutama kutuggulula lukoba lwa ngatto ze.

⁸Nze nabatiza n'amazzi, naye oyo alibabatiza n'Omwoyo Omutukuvu.

⁹ Awo olwatuuka mu nnaku ezo Yesu n'ava e Nazaaleesi eky'e Ggaliraaya n'ajja okubatizibwa Yokaana mu Yoludaani.

¹⁰Amangu ago bwe yava mu mazzi, n'alaba eggulu nga liyulise, n'Omwoyo ng'ali ng'ejjiba ng'akka ku ye:

¹¹ n'eddoboozi ne lifuluma mu ggulu erigamba nti Ggwe Mwana wange gwe njagala, gwe nsanyukira ennyo.

¹² Amangu ago Omwoyo n'amugobera mu ddungu.

¹³ N'amalayo mu ddungu ennaku amakumi ana ng'akemebwa Setaani; n'aba wamu n'ensolo; bamalayika ne bamuweereza.

¹⁴ Awo oluvannyuma Yokaana ng'amaze okuweebwayo, Yesu n'ajja e Ggaliraaya, ng'abuulira enjiri ya Katonda,

¹⁵ ng'agamba nti ekiseera kituuse, obwakabaka bwa Katonda busembedde, mwenenye, mukkirize enjiri.

¹⁶ Bwe yali ng'ayita ku lubalama lw'ennyanja ey'e Ggaliraaya n'alaba Simooni ne Andereya muganda wa Simooni nga basuula omugonjo mu nnyanja, kubanga baali bavubi.

¹⁷ Yesu n'abagamba nti Mujje muyite nange, ndibafuula abavubi b'abantu.

¹⁸Amangu ago ne baleka awo emigonjo ne bagenda naye.

¹⁹Bwe yasemberayo mu maaso katono, n'alaba Yakobo omwana wa Zebbeddaayo ne Yokaana muganda we, abo bombi baali mu lyato nga bayunga emigonjo.

²⁰Amangu ago n'abayita: ne baleka awo kitaabwe Zebbedaayo mu lyato ng'ali n'abo abakolera empeera, ne bamugoberera.

²¹ Ne bayingira e Kaperunawumu; amangu ago ku lunaku lwa ssabbiiti n'ayingira mu kkuŋŋaaniro n'ayigiriza.

²² Ne bawuniikirira olw'okuyigiriza kwe: kubanga yabayigiriza nga ye nnyini buyinza, so si ng'abawandiisi.

²³Amangu ago mu kkuŋŋaaniro lyabwe mwalimu omuntu aliko dayimooni omubi; n'akaaba

²⁴ nga agamba nti Otuvunaana ki, Yesu ow'e Nazaaleesi? ozze kutuzikiriza? nkumanyi ggwe, ggwe oli Mutukuvu wa Katonda.

²⁵Yesu n'amuboggolera ng'agamba nti Bunira, muveeko.

²⁶ Dayimooni n'amutaagula n'akaaba eddoboozi ddene n'amuvaako.

²⁷Ne beewuunya bonna, ne beebuuzaganya nga bagamba nti Kiki kino? okuyigiriza kuggya! alagira n'obuyinza dayimooni ne bamuwulira.

²⁸Amangu ago ettutumu lye ne libuna ensi yonna eriraanye Ggaliraaya.

²⁹ Amangu ago bwe baafuluma mu kkuŋŋaaniro ne bagenda wamu ne Yakobo ne Yokaana mu nnyumba ya Simooni ne Andereya.

³⁰Awo nnyina mukazi wa Simooni yali ng'agalamidde ng'alwadde omusujja; amangu ago ne bamubuulira bw'ali:

³¹n'ajja n'amukwata ku mukono n'amugolokosa, omusujja ne gumuwonako, n'abaweereza.

³²Awo olweggulo, enjuba ng'egudde, ne bamuleetera abalwadde bonna, n'abo abaliko dayimooni.

³³N'ekibuga kyonna ne kikuŋŋaanira ku wankaaki.

³⁴ N'awonya bangi abaali balwadde endwadde nnyingi, n'agoba dayimooni bangi, n'atabaganya kwogera kubanga baamumanya.

³⁵ Awo mu makya ennyo, nga bukyali kiro, n'agolokoka n'afuluma, n'agenda mu ddungu, n'asabira eyo.

³⁶Simooni n'abo abaali naye ne bamugoberera;

³⁷ne bamulaba ne bamugamba nti Bonna bakunoonya.

³⁸N'abagamba nti Tugende awalala mu bibuga ebiri okumpi mbuulire n'eyo; kubanga ekyo kye nnajjirira.

³⁹N'ayingira mu makuŋŋaaniro gaabwe mu Ggaliraaya yonna, ng'abuulira ng'agoba dayimooni.

⁴⁰ Omugenge n'ajja gy'ali, ng'amwegayirira ng'amufukaamirira, ng'amugamba nti Bw'oyagala, oyinza okunnongoosa.

⁴¹N'amusaasira n'agolola omukono gwe n'amukwatako n'amugamba nti Njagala; longooka.

⁴²Amangu ago ebigenge bye ne bimuwonako n'alongooka.

⁴³ N'amukuutira nnyo, amangu ago n'amusindika

⁴⁴ n'amugamba nti Laba tobuulirako muntu; naye genda weeyoleke eri kabona, oweeyo olw'okulongooka kwo Musa bye yalagira okuba omujulirwa gye bali.

⁴⁵Naye n'afuluma, n'asooka okukibuulira ennyo n'okubunya ekigambo, n'okuyinza n'atayinza Yesu okuyingira nate mu kibuga mu lwatu, naye yali bweru mu malungu; ne bajja gy'ali nga bava wonna wonna.