Read luganda Makko 13 Bible Online

Makko 13 - luganda bible

Makko 13

¹ Awo bwe yafuluma mu yeekaalu, omu ku bayigirizwa be n'amugamba nti Omuyigiriza, laba, amayinja gano bwe gali, n'enzimba eno bw'eri.

²Yesu n'amugamba nti Olaba enzimba eno ennene? teririrekebwa wano jjinja eriri ku jjinja eritalisuulibwa wansi.

³Bwe yali atudde ku lusozi olwa Zeyituuni ng'ayolekedde yeekaalu, Peetero ne Yakobo ne Yokaana ne Andereya ne bamubuuza mu kyama nti

⁴Tubuulire, ebyo biribaawo ddi? n'akabonero ki ak'ebyo nga bigenda okutuukirizibwa byonna?

⁵Yesu n'asooka okubagamba nti Mwekuume, omuntu yenna tabakyamyanga.

⁶Bangi abalijja mu linnya lyange nga boogera nti Nze nzuuyo; era balikyamya bangi.

⁷Awo bwe muwuliranga entalo n'ettutumo ly'entalo, temweraliikiriranga: kibigwanira okubaawo; naye enkomerero ng'ekyali.

⁸ Kubanga eggwanga lirirumba ggwanga linnaalyo, n'obwakabaka obw'akabaka bunnaabwo: walibaawo ebikankano mu bifo bingi; walibaawo enjala: ebyo lwe lubereberye lw'okulumwa.

⁹ Naye mwekuume mwekka: kubanga balibawaayo mu nkiiko: mulikubirwa ne mu makuŋŋaaniro; era muliyimirira mu maaso g'abaamasaza ne bakabaka ku lwange, okubeera abajulirwa mu bo.

¹⁰ Enjiri kigigwanira okumala okubuulirwa amawanga gonna.

¹¹Era bwe babatwalanga okubawaayo, temusookanga kweraliikirira bwe munaayogera: naye kyonna kyonna kye muweebwanga mu kiseera ekyo, ekyo kye mwogeranga, kubanga si mmwe mwogera, wabula Omwoyo Omutukuvu.

¹² Ow'oluganda anaawangayo muganda we okumutta, ne kitaawe w'omwana anaamuwangayo; abaana banaajeemeranga abaabazaala, banaabassanga.

¹³ Munaakyayibwanga bonna olw'erinnya lyange: naye agumiikiriza okutuusa enkomerero oyo ye alirokoka.

¹⁴ Naye bwe muliraba eky'omuzizo ekizikiriza nnabbi Danyeri kye yayogerako nga kiyimiridde awatakisaanira (asomamu ategeere), kale abali mu Buyudaaya baddukire ku nsozi;

¹⁵ali waggulu ku nju takkanga, so tayingiranga kuggyamu kintu mu nju ye:

¹⁶n'ali mu lusuku taddanga kutwala lugoye lwe.

¹⁷Naye ziribasanga abali embuto, n'abayonsa mu nnaku ezo.

¹⁸Musabe bireme okutuukira mu biro eby'empewo.

¹⁹ Kubanga ennaku ezo ziriba za kulabiramu nnaku, nga tezibangawo bwe zityo kasookedde Katonda atonda ebyatondebwa okutuusa kaakano, so teziriba.

²⁰So singa Mukama teyasala ku nnaku ezo, tewandirokose mubiri gwonna: naye olw'abalonde be yalonda yazisalako ennaku.

²¹Mu biro ebyo omuntu bw'abagambanga nti Laba, Kristo ali wano; oba ali eyo; temukkirizanga:

²² kubanga bakristo ab'obulimba ne bannabbi ab'obulimba baliyimuka, balikola obubonero n'ebyewuunyo, okukyamya, oba nga kiyinzika, abalonde.

²³Naye mwekuume mmwe: laba, mbabuulidde byonna nga tebinnabaawo.

²⁴ Naye mu nnaku ezo, okulaba ennaku okwo nga kuwedde, enjuba erizikizibwa n'omwezi tegulyaka musana gwagwo,

²⁵n'emmunyeenye ziriba nga zigwa okuva mu ggulu, n'amaanyi ag'omu ggulu galikankana.

²⁶ Kale ne balyoka balaba Omwana w'omuntu ng'ajjira mu bire n'amaanyi amangi n'ekitiibwa.

²⁷ Awo n'alyoka atuma bamalayika be, alikuŋŋaanya abalonde be okuva mu mpewo ennya, okuva ku nkomerero y'ensi okutuusa ku nkomerero y'eggulu.

²⁸Era muyigire ku mutiini olugero lwagwo: ettabi lyagwo bwe ligejja n'amalagala ne gatojjera, mutegeera ng'omwaka guli kumpi;

²⁹era nammwe bwe mutyo, bwe mulabanga ebyo nga bituuse, mutegeere ng'ali kumpi, ku luggi.

³⁰Mazima mbagamba nti Emirembe gino tegiriggwaawo n'akatono, okutuusa ebyo byonna lwe birituukirira.

³¹Eggulu n'ensi biriggwaawo, naye ebigambo byange tebiriggwaawo n'akatono.

³²Naye eby'olunaku olwo oba ekiseera ekyo tewali amanyi, newakubadde bamalayika abali mu ggulu, newakubadde Omwana, wabula Kitange.

³³Mwekuumenga, mutunulenga, musabenga: kubanga temumanyi biro we birituukira.

³⁴Ng'omuntu eyaleka ennyumba ye n'atambula mu nsi endala ng'awadde abaddu be obuyinza, buli muntu omulimu gwe, n'alagira omuggazi okutunula.

³⁵ Kale mutunule: kubanga temumanyi mukama w'ennyumba w'alijjira, oba kawungeezi, oba ttumbi, oba ng'enkoko ekookolima, oba nkya;

³⁶atera okujja amangu ago n'abasanga nga mwebase.

³⁷Era kye mbagamba mmwe mbagamba bonna nti Mutunule.