Read luganda Makko 3 Bible Online

Makko 3 - luganda bible

Makko 3

¹ N'ayingira nate mu kkuŋŋaaniro; mwalimu omuntu eyalina omukono ogukaze.

²Ne bamulabirira oba anaamuwonyeza ku lunaku lwa ssabbiiti, era bamuloope.

³N'agamba omuntu eyalina omukono ogukaze nti Yimirira wakati awo.

⁴Awo n'abagamba nti Kye kirungi ku lunaku lwa ssabbiiti okukola obulungi nantiki okukola obubi? kuwonya bulamu nantiki kutta? Naye ne basirika busirisi.

⁵ Bwe yabeetoolooza amaaso n'obusungu, ng'anakuwadde olw'okukakanyala kw'emitima gyabwe, n'agamba omuntu nti Golola omukono gwo. N'agugolola: omukono gwe ne guwona.

⁶ Amangu ago Abafalisaayo ne bavaamu ne bateesa n'Abakerodiyaani ku ye, nga bwe banaamuzikiriza.

⁷ Awo Yesu n'abayigirizwa be ne bagenda ku nnyanja, ebibiina bingi ne bimugoberera ebyava e Ggaliraaya n'e Buyudaaya

⁸ n'e Yerusaalemi ne Idumaya n'emitala wa Yoludaani, n'abaliraanye e Ttuulo n'e Sidoni, ekibiina kinene, bwe baawulira bye yakola, ne bajja gy'ali.

⁹N'agamba abayigirizwa be eryato ettono limubeerenga kumpi ebibiina bireme okumunyigiriza;

¹⁰kubanga yawonya bangi, n'okugwa abalwadde ne bamugwako bamukwateko, bonna abaali balina ebibonoobono.

¹¹ Dayimooni ababi nabo bwe baamulaba ne bagwa mu maaso ge ne bakaaba nga bagamba nti Ggwe Mwana wa Katonda.

¹² N'abakuutira nnyo baleme okumwatiikiriza.

¹³ Awo n'alinnya ku lusozi n'abayita gy'ali b'ayagala: ne bagenda gy'ali.

¹⁴N'ayawulamu ekkumi n'ababiri okubeeranga awamu naye, era abatumenga okubuulira,

¹⁵n'okuba n'obuyinza okugobanga emizimu:

¹⁶ Simooni n'amutuuma erinnya Peetero;

¹⁷ ne Yakobo omwana wa Zebbedaayo, ne Yokaana, muganda wa Yakobo; nabo n'abatuuma amannya Bowanerege, amakulu gaalyo nti Baana ba kubwatuka:

¹⁸ne Andereya ne Firipo, ne Battolomaayo, ne Matayo, ne Tomasi, ne Yakobo omwana wa Alufaayo, ne Saddayo, ne Simooni Omukananaayo,

¹⁹ne Yuda Isukalyoti, ye yamulyamu olukwe. N'ajja mu nnyumba,

²⁰ekibiina ne kikuŋŋaana nate, n'okuyinza ne batayinza na kulya mmere.

²¹ Awo ababe bwe baawulira ne bafuluma okumukwata, kubanga baagamba nti Alaluse.

²² Awo abawandiisi abaaserengeta okuva e Yerusaalemi ne bagamba nti Alina Beeruzebuli, era nti Agoba dayimooni ku bwa mukulu wa badayimooni.

²³N'abayita gy'ali, n'abagambira mu ngero nti Setaani ayinza atya okugoba Setaani?

²⁴Obwakabaka bwe bwawukanamu bwo bwokka, obwakabaka obwo tebuyinza kuyimirira.

²⁵N'ennyumba bw'eyawukanamu yo yokka, ennyumba eyo teriyinza kuyimirira.

²⁶Era oba Setaani yeegolokokeddeko ye yekka, n'ayawukanamu, tayinza kuyimirira, naye aggwaawo.

²⁷Naye tewali muntu ayinza okuyingira mu nnyumba y'omuntu ow'amaanyi okunyaga ebintu bye, nga tasoose kusiba oyo ow'amaanyi, n'alyoka anyaga ennyumba ye.

²⁸Mazima mbagamba nti Abaana b'abantu balisonyiyibwa ebibi byabwe byonna, n'obuvvoozi bwabwe bwe balivvoola bwonna;

²⁹naye oyo yenna anavvoolanga Omwoyo Omutukuvu talina kusonyiyibwa emirembe n'emirembe, naye azzizza omusango ogw'ekibi eky'emirembe n'emirembe:

³⁰ kubanga baayogera nti Alina dayimooni.

³¹ Awo nnyina ne baganda be ne bajja, ne bamutumira ne bamuyita nga bayimiridde wabweru.

³²N'ekibiina kyali kitudde nga bamwetoolodde; ne bamugamba nti Laba, nnyoko ne baganda bo bali wabweru bakunoonya.

³³N'abaddamu ng'agamba nti Mmange ye ani ne baganda bange?

³⁴n'abeetoolooza amaaso abaali batudde enjuyi zonna nga bamwetoolodde n'agamba nti laba, mmange ne baganda bange!

³⁵Kubanga buli muntu yenna anaakolanga Katonda by'ayagala, oyo ye muganda wange, ye mwannyinaze, ye mmange.