Read luganda Makko 4 Bible Online

Makko 4 - luganda bible

Makko 4

¹ Ate n'atanula okuyigiriza ku lubalama lw'ennyanja. Ekibiina kinene nnyo ne kikuŋŋaanira w'ali, n'okusaabala n'asaabala mu lyato, n'atuula mu nnyanja; ekibiina kyonna ne kibeera ku nnyanja ku ttale.

²N'abayigiriza bingi mu ngero, n'abagamba mu kuyigiriza kwe nti

³Muwulire; laba, omusizi yafuluma okusiga:

⁴awo olwatuuka bwe yali ng'asiga, ezimu ne zigwa ku mabbali g'ekkubo, ennyonyi ne zijja ne zizirya.

⁵N'endala ne zigwa awali enjazi awatali ttaka lingi; amangu ago ne zimera, kubanga ettaka teryali ggwanvu:

⁶enjuba bwe yayaka, ne ziwotookerera; era kubanga tezaalina mmizi, ne zikala.

⁷Endala ne zigwa awali amaggwa, amaggwa ne galoka, ne gazizisa ne zitabala bibala.

⁸Endala ne zigwa ku ttaka eddungi, ne zibala ebibala ne bikula ne byeyongera; ne zizaala okutuusa amakumi asatu, era okutuusa enkaaga, era okutuusa ekikumi.

⁹N'agamba nti Alina amatu ag'okuwulira, awulire.

¹⁰Awo bwe yali yekka, abo abaali bamwetoolodde n'ekkumi n'ababiri ne bamubuuza ku ngero ezo.

¹¹ N'abagamba nti Mmwe mwaweebwa ekyama ky'obwakabaka bwa Katonda: naye bali ab'ebweru byonna bibabeerera mu ngero:

¹² bwe balaba balabe, ne bateetegereza; era bwe bawulira bawulire, ne batategeera; mpozzi baleme okukyuka nate, okusonyiyibwa.

¹³N'abagamba nti Temumanyi lugero luno? kale mulitegeera mutya engero zonna?

¹⁴Omusizi asiga kigambo.

¹⁵Bano be b'oku mabbali g'ekkubo, ekigambo we kisigibwa; awo bwe bawulira, amangu ago Setaani n'ajja n'aggyamu ekigambo ekyasigibwa mu bo.

¹⁶Ne bano bwe batyo be bali abasigibwa awali enjazi, abo, bwe bawulira ekigambo, amangu ago bakikkiriza n'essanyu;

¹⁷ne bataba na mmizi mu bo, naye bamala ekiseera kitono; awo bwe wabaawo okulaba ennaku oba kuyigganyizibwa olw'ekigambo, amangu ago beesittala.

¹⁸N'abalala be bali abasigibwa awali amaggwa; abo, bwe bawulira ekigambo,

¹⁹ awo emitawaana gy'ensi n'obulimba bw'obugagga, n'okwegomba kw'ebirala byonna bwe biyingira bizisa ekigambo, ne kitabala:

²⁰n'abo be bali abasigibwa awali ettaka eddungi; abawulira ekigambo, abakikkiriza, ababala ebibala amakumi asatu, n'enkaaga, n'ekikumi.

²¹ N'abagamba nti Ettabaaza ereetebwa okuteekebwa munda w'ekibbo, nantiki munda w'ekitanda, n'eteteekebwa waggulu ku kikondo?

²² Kubanga tewali kikwekebwa, naye kirimanyibwa; newakubadde ekyakisibwa, naye kirirabika lwatu.

²³Buli alina amatu ag'okuwulira, awulire.

²⁴ N'abagamba nti Mwekuume kye muwulira: mu kigera mwe mugera nammwe mwe muligererwa: era mulyongerwako.

²⁵ Kubanga alina aliweebwa: n'atalina aliggibwako n'ekyo ky'ali nakyo.

²⁶N'agamba nti Obwakabaka bwa Katonda bwe buti, ng'omuntu bw'amansa ensigo ku ttaka;

²⁷ ne yeebaka n'agolokoka ekiro n'emisana, n'ensigo n'emeruka n'ekula, ye nga tamanyi bw'emeruse.

²⁸Ensi ebala yokka, okusooka kalagala, ate kirimba, ate ŋŋaano enkulu mu kirimba.

²⁹ Naye emmere bw'eyengera, amangu ago assaako ekiwabyo, kubanga okukungula kutuuse.

³⁰ N'agamba nti Tunaabufaananya tutya obwakabaka bwa Katonda? Nantiki tunaabunnyonnyolera ku kifaananyi ki?

³¹Bufaanana ng'akaweke aka kaladaali, ako, bwe kasigibwa mu ttaka, newakubadde nga ke katono okukira ensigo zonna eziri mu nsi,

³² naye bwe kasigibwa kakula, kaba kanene okukira enva zonna, kasuula amatabi amanene; kale era ennyonyi ez'omu bbanga ne ziyinza okutuula wansi w'ekisiikirize kyagwo.

³³N'abagamba ekigambo mu ngeri nnyingi ng'ezo, nga bwe bayinza okukiwulira:

³⁴teyayogera nabo awatali lugero: naye n'ategeezanga abayigirizwa be ye byonna mu kyama.

³⁵ Awo ku lunaku olwo bwe bwali buwungedde, n'abagamba nti Tuwunguke tutuuke emitala w'eri.

³⁶Bwe baaleka ekibiina, ne bamutwalira mu lyato, nga bwe yali. Era n'amaato amalala gaali naye.

³⁷Awo omuyaga mungi ne gujja, amayengo ne gayiika mu lyato, n'eryato lyali nga ligenda okujjula.

³⁸Ye yennyini yali yeebase mu kiwenda ku kigugu, ne bamuzuukusa, ne bamugamba nti Omuyigiriza, tofaayo nga tufa?

³⁹N'azuukuka, n'aboggolera omuyaga, n'agamba ennyanja nti sirika, teeka. Omuyaga ne gukkakkana, n'eba nteefu nnyo.

⁴⁰N'abagamba nti Kiki ekibatiisa? Temunnaba kuba na kukkiriza?

⁴¹Ne batya entiisa ennene, ne bagambagana nti Kale ono ye ani, kubanga omuyaga n'ennyanja bimuwulira?