Read luganda Makko 6 Bible Online

Makko 6 - luganda bible

Makko 6

¹ N'avaayo; n'ajja mu nsi y'ewaabwe; abayigirizwa be ne bagenda naye.

² Awo ssabbiiti bwe yatuuka, n'atanula okuyigiriza mu kkuŋŋaaniro: abangi bwe baamuwulira ne bawuniikirira, nga bagamba nti Ono ebyo yabiggya wa? era nti Magezi ki gano ge yaweebwa ono, era eby'amagero ebyenkanidde wano ebikolebwa mu mikono gye?

³Si ye wuuno omubazzi, omwana wa Malyamu, muganda wa Yakobo, ne Yose, ne Yuda ne Simooni? Ne bannyina tetuli nabo wano ewaffe? Ne bamwesittalako.

⁴Yesu n'abagamba nti Nnabbi tabulwa kitiibwa wabula mu nsi yaabo, ne mu kika kye, ne mu nnyumba ye.

⁵ So teyayinza kukolerayo kyamagero kyonna, naye yassa emikono gye ku balwadde batono, n'abawonya.

⁶Ne yeewuunya olw'obutakkiriza bwabwe. Ne yeetooloola mu mbuga enjuyi zonna ng'ayigiriza.

⁷ N'ayita gy'ali ekkumi n'ababiri, n'atanula okubatuma kinnababirye; n'abawa obuyinza ku dayimooni;

⁸n'abalagira obutatwala kintu kya mu kkubo wabula omuggo gwokka; si mmere, newakubadde ensawo, newakubadde ebikomo mu nkoba zaabwe,

⁹naye nga banaanise engatto; era temwambalanga kkanzu bbiri.

¹⁰N'abagamba nti Buli nju yonna mwe muyingiranga mubeeranga omwo okutuusa lwe mulivaayo.

¹¹Na buli kifo kyonna ekitalibakkiriza, obutabawulira, bwe muvangayo, mukunkumulanga enfuufu eri mu bigere byammwe okuba omujulirwa gye bali.

¹²Ne bagenda ne babuulira okwenenya.

¹³ Ne bagoba dayimooni mungi, ne basiiga amafuta ku balwadde bangi ne babawonya.

¹⁴ Awo Kerode kabaka n'awulira, kubanga erinnya lye lyatiikiridde; n'agamba nti Yokaana Omubatiza azuukidde mu bafu, amaanyi gano kyegava gakolera mu ye.

¹⁵Naye abalala ne bagamba nti Ye Eriya. Abalala ne bagamba nti Nnabbi ng'omu ku bannabbi.

¹⁶Naye Kerode, bwe yawulira n'agamba nti Yokaana gwe nnatemako omutwe nze, ye azuukidde.

¹⁷Kubanga Kerode yennyini yatuma, n'akwata Yokaana, n'amusiba n'amussa mu kkomera olwa Kerodiya, mukazi wa muganda we Firipo: kubanga yamuwasa.

¹⁸ Kubanga Yokaana yagamba Kerode nti Kya muzizo ggwe okubeera ne mukazi wa muganda wo.

¹⁹Ne Kerodiya kyeyava amuwerera n'ayagala okumutta, n'atayinza;

²⁰kubanga Kerode yatya Yokaana, ng'amumanyi nga mutuukirivu mutukuvu, n'amwerinda. Yayagalanga nnyo okuwulira by'ayogera; naye ate byamule kanga nga tamanyi kya kukola.

²¹Awo olunaku olulungi bwe lwatuuka, Kerode lwe yafumbira abakungu be embaga ku lunaku olw'okuzaalibwa kwe, n'abakulu ba sserikale, n'abaami ab'e Ggaliraaya:

²²awo muwala wa Kerodiya yennyini bwe yajja n'azina, Kerode n'abo abaali batudde naye nga balya ne bamusiima; awo kabaka n'agamba omuwala nti Nsaba ky'oyagala kyonna, nnaakikuwa.

²³ N'amulayirira nti Kyonna kyonna ky'ononsaba, nnaakikuwa, newakubadde ekitundu eky'obwakabaka bwange.

²⁴Awo n'afuluma, n'agamba nnyina nti Nnaasaba ki? N'agamba nti Omutwe gwa Yokaana Omubatiza.

²⁵Amangu ago n'ayanguwako n'ajja eri kabaka, n'asaba, ng'agamba nti Njagala ompeere kaakano mu lutiba omutwe gwa Yokaana Omubatiza.

²⁶Awo kabaka n'anakuwala nnyo; naye olw'ebirayiro bye, n'abo abaali batudde naye nga balya, n'atayagala kumumma.

²⁷Amangu ago kabaka n'atuma sserikale omumbowa, n'alagira okuleeta omutwe gwe; n'agenda n'amutemerako omutwe mu kkomera,

²⁸n'aleetera omutwe gwe mu lutiba, n'aguwa omuwala, n'omuwala n'aguwa nnyina.

²⁹Awo abayigirizwa be bwe baawulira, ne bajja ne batwala omulambo gwe, ne baguteeka mu ntaana.

³⁰ Abatume ne bakuŋŋaanira awali Yesu; ne bamubuulira ebigambo byonna, bye baakola, ne bye baayigiriza.

³¹N'abagamba nti Mujje mmwe mwekka kyama mu kifo eteri bantu muwummuleko katono. Kubanga waaliwo bangi abajja n'abagenda, so ne bataba na bbanga newakubadde aw'okuliira.

³² Ne bagendera mu lyato kyama mu kifo eteri bantu.

³³Ne babalaba nga bagenda, bangi ne babategeera, n'abo abaava mu bibuga byonna ne baddukana ku lukalu, ne babasookayo.

³⁴ Bwe yava mu lyato n'alaba ebibiina bingi, n'abasaasira, kubanga baali ng'endiga ezitalina musumba; n'atanula okubayigiriza ebigambo bingi.

³⁵ Awo obudde bwe bwali buyise, abayigirizwa be ne bajja w'ali, ne bagamba nti Ekifo kino kya ddungu, ne kaakano obudde buyise:

³⁶basiibule, bagende mu byalo ne mu mbuga eby'oku njuyi zonna beegulire emmere.

³⁷Naye n'addamu, n'abagamba nti Mmwe mubawe emmere. Ne bamugamba nti Tugende tugule emigaati egy'eddinaali ebibiri tugibawe balye?

³⁸N'abagamba nti Mulina emigaati emeka? mugende mulabe. Bwe baategeera ne bagamba nti Etaano, n'ebyennyanja bibiri.

³⁹N'abalagira batuule bonna bibiina bibiina ku muddo.

⁴⁰Ne batuula nnyiriri nnyiriri, ekikumi, n'amakumi ataano.

⁴¹ N'akwata emigaati etaano n'ebyennyanja ebibiri, n'atunula waggulu, ne yeebaza, n'amenyamu emigaati, n'awa abayigirizwa be bagisse mu maaso ga bali; n'ebyennyanja bibiri n'abigabira bonna.

⁴²Ne balya bonna ne bakkuta.

⁴³ Ne bakuŋŋaanya abukunkumuka, ne bujjuza ebibbo kkumi na bibiri, n'ebyennyanja.

⁴⁴Abo abaalya emigaati baali abasajja enkumi ttaano.

⁴⁵ Amangu ago n'abawaliriza abayigirizwa be okusaabala mu lyato, basookeyo emitala w'eri e Besusayida, ye amale okusiibula ebibiina.

⁴⁶Awo bwe yamala okubasiibula, n'agenda ku lusozi okusaba.

⁴⁷Awo bwe bwali buwungedde, eryato lyali mu nnyanja mu buziba, ye yali yekka ku lukalu.

⁴⁸Awo bwe yalaba nga bategana okuvuga, kubanga omuyaga gwali gubafulumye mu maaso, mu kisisimuka eky'okuna eky'ekiro n'ajja gye baali ng'atambulira ku nnyanja; yali ng'agenda kubayisa:

⁴⁹naye bo, bwe baamulaba ng'atambulira ku nnyanja, ne balowooza nti kifaananyi, ne bakaaba;

⁵⁰kubanga bonna baamulaba, ne beeraliikirira. Naye amangu ago n'ayogera nabo, n'abagamba nti Mugume: nze nzuuno, temutya.

⁵¹ N'alinnya mu lyato mwe baali, omuyaga ne gufa: ne bawuniikirira nnyo munda yaabwe;

⁵²kubanga eby'emigaati tebaabitegeera, naye emitima gyabwe gyali mikakanyavu.

⁵³Awo bwe baawunguka, ne bajja mu nsi ey'e genesaleeti, ne bagoba ettale.

⁵⁴Awo bwe baava mu lyato, amangu ago ne bamutegeera,

⁵⁵ne baddukana ne beetooloola mu nsi eyo yonna, ne batanula okusitulira ku bitanda abalwadde okubaleeta we baawulira nga w'ali.

⁵⁶ Ne buli gye yagendanga, mu mbuga, oba mu bibuga, oba mu byalo, bassanga abalwadde mu butale, ne bamwegayirira bakomeko bukomi ku lukugiro lw'olugoye lwe: n'abo abaamukomangako ne bawona.