Read luganda Makko 7 Bible Online

Makko 7 - luganda bible

Makko 7

¹ Ne bakuŋŋaanira w'ali Abafalisaayo n'abawandiisi abamu, abaava e Yerusaalemi,

² era abaalaba abayigirizwa be abamu nga balya emmere yaabwe n'engalo embi, ze zitanaabiddwa.

³Kubanga Abafalisaayo, n'Abayudaaya bonna, bwe batanaaba nnyo mu ngalo zaabwe, tebalya, kubanga bakwata obulombolombo obw'abakadde;

⁴era bwe bava mu katale, bwe batanaaba, tebalya: era waliwo n'ebirala bingi bye baaweebwa okukwata, okunaazanga ebikompe, n'ebibya, n'entamu ez'ebikomo.

⁵Abafalisaayo n'abawandiisi ne bamubuuza nti Kiki abayigirizwa bo ekibalobera okutambulira mu bulombolombo obw'abakadde, naye bamala galya emmere n'engalo embi?

⁶ N'abagamba nti Isaaya yalagula bulungi ku mmwe bannanfuusi, nga bwe kyawandiikibwa nti Abantu bano banzisaamu ekitiibwa kya ku mimwa, Naye emitima gyabwe gindi wala.

⁷Naye bansinziza bwereere, Nga bayigiriza amateeka g'abantu nga bye by'okukwata.

⁸Muleka etteeka lya Katonda, ne mukwata obulombolombo bw'abantu.

⁹N'abagamba nti Mugaanira ddala bulungi etteeka lya Katonda, era mukwate obulombolombo bwammwe.

¹⁰ Kubanga Musa yayogera nti Ossangamu ekitiibwa kitaawo ne nnyoko; era nti Avumanga kitaawe oba nnyina, bamuttanga bussi:

¹¹naye mmwe mwogera nti Omuntu bw'agamba kitaawe oba nnyina nti Kyonna kye nnandikuwadde okukugasa ye Kolubaani, ekitegeezebwa nti Kitone kya Katonda;

¹²temukyamuganya okukolera ekintu kitaawe oba nnyina;

¹³mudibya ekigambo kya Katonda olw'obulombolombo bwammwe, bwe mwayigiriza: era mukola ebigambo ebirala bingi ng'ebyo.

¹⁴Ate n'ayita ebibiina, n'abagamba nti Mumpulire mwenna, mutegeere;

¹⁵ tewali kintu ekiri ebweru w'omuntu bwe kiyingira mu ye, ekiyinza okumwonoona, naye ebintu ebiva mu muntu, ebyo bye byonoona omuntu. [

¹⁶Buli alina amatu ag'okuwulira, awulire.]

¹⁷Awo bwe yayingira mu nnyumba ng'avudde mu bibiina, abayigirizwa be ne bamubuuza olugero olwo.

¹⁸N'abagamba nti Bwe mutyo nammwe temulina magezi? Temutegeera nga kyonna ekiri ebweru bwe kiyingira mu muntu, tekiyinza kumwonoona;

¹⁹kubanga tekiyingira mu mutima gwe, naye mu lubuto lwe, ne kiyita ne kigenda mu kiyigo? Yayogera bw'atyo ng'alongoosa ebiriibwa byonna.

²⁰N'agamba nti Ekiva mu muntu, kye kyonoona omuntu.

²¹Kubanga munda, mu mitima gy'abantu, muvaamu ebirowoozo ebibi, obukaba,

²²okubba, okutta, obwenzi, okwegomba, obubi, obukuusa, obuluvu, eriiso ebbi, obuvvoozi, amalala, obusiru:

²³ebibi ebyo byonna biva munda, ne byonoona omuntu.

²⁴ N'agolokoka, n'avaayo n'agenda ku mbibi ez'e Ttuulo n'e Sidoni. N'ayingira mu nnyumba, n'atayagala muntu kutegeera, so n'atayinza kwekisa.

²⁵Naye amangu ago omukazi eyalina muwala we eyaliko dayimooni, bwe yamuwulira n'ajja n'afukamira ku bigere bye.

²⁶Omukazi yali Muyonaani, eggwanga lye Musulofoyiniiki. N'amwegayirira okugoba dayimooni ku muwala we.

²⁷N'amugamba nti Leka abaana bamale okukkuta; kubanga si kirungi okuddira emmere y'abaana okugisuulira embwa.

²⁸Naye n'addamu n'amugamba nti Weewaawo, Mukama wange: n'embwa ziriira wansi w'emmeeza obukunkumuka bw'abaana.

²⁹N'amugamba nti Olw'ekigambo ekyo, weddireyo; dayimooni avudde ku muwala wo.

³⁰N'addayo mu nnyumba ye, n'asanga omuwala ng'agalamizibbwa ku kitanda, ne dayimooni ng'amuvuddeko.

³¹ Ate n'ava mu mbibi ez'e Ttuulo, n'ajja n'ayita mu sidoni ne wakati mu mbibi ez'e Dekapoli n'atuuka ku nnyanja ey'e Ggaliraaya.

³² Ne bamuleetera omuggavu w'amatu, atayogera bulungi; ne bamwegayirira okumussaako omukono gwe.

³³ N'amuggya mu kibiina kyama, n'amussa engalo mu matu ge, n'awanda amalusu, n'amukoma ku lulimi;

³⁴ n'atunula waggulu mu ggulu, n'asinda, n'amugamba nti Efasa, kwe kugamba nti Zibuka.

³⁵Amatu ge ne gazibuka n'enkolo y'olulimi lwe n'esumulukuka n'ayogera bulungi.

³⁶ N'abakuutira baleme okubuulirako muntu; naye nga bwe yeeyongera okubakuutira, bwe beeyongera ennyo nnyini okukibunya.

³⁷ Ne bawuniikirira nnyo nnyini kitalo nga bagamba nti Byonna akoze bulungi: aggula abaggavu b'amatu, era ayogeza abasiru.