Read luganda Lukka 1 Bible Online

Lukka 1 - luganda bible

Lukka 1

¹Bwe baali abangi abaatandika okuwandiika amakulu g'ebigambo ebyatuukirizibwa mu ffe,

² nga bwe baabitubuulira, abo abaasooka okuva ku lubereberye okuba abajulirwa era abaweereza b'ekigambo,

³ awo bwe nnaliraanyiza ddala byonna okuva ku lubereberye, era nange nnalaba nga kirungi okukuwandiikira ggwe Teefiro omulungi ennyo, nga bwe byaliraana;

⁴olyoke omanye amazima g'ebigambo bye wayigirizibwa.

⁵ Awo mu mirembe gya Kerode, kabaka w'e Buyudaaya, waaliwo kabona, erinnya lye Zaakaliya, wa mu lulyo lwa Abiya: era yalina omukazi ow'omu bawala ba Alooni, erinnya lye Erisabesi.

⁶N'abo bombi baali batuukirivu mu maaso ga Katonda, nga batambulira mu biragiro byonna ne mu by'obutuukirivu ebya Mukama nga tebaliiko kabi.

⁷So tebaalina mwana, kubanga Erisabesi yali mugumba, nabo bombi baali bakaddiye mu myaka gyabwe.

⁸Awo olwatuuka, bwe yali ng'akola omulimu ogw'obwa kabona mu maaso ga Katonda ng'oluwalo lwe bwe lwaliraana,

⁹ awo akalulu ne kamugwako ng'empisa ez'obwa kabona bwe zaali okuyingira mu yeekaalu ya Mukama okwoteza obubaane.

¹⁰Awo ekibiina kyonna eky'abantu kyali nga kisabira bweru mu kiseera eky'okwoterezaamu.

¹¹Awo malayika wa Mukama n'amulabikira ng'ayimiridde ku luuyi olwa ddyo olw'ekyoto eky'okwoterezaako.

¹²Awo Zaakaliya bwe yamulaba ne yeeraliikirira, n'atya.

¹³Naye malayika n'amugamba nti Totya, Zaakaliya; kubanga okwegayirira kwo kuwuliddwa, mukazi wo Erisabesi alikuzaalira omwana ow'obulenzi, olimutuuma erinnya Yokaana.

¹⁴Olisanyuka, era olijaguza, era bangi abalisanyukira okuzaalibwa kwe.

¹⁵ Kubanga aliba mukulu mu maaso ga Mukama, so talinywa mwenge newakubadde ekitamiiza; era alijjuzibwa Omwoyo Omutukuvu, okuva mu lubuto lwa nnyina.

¹⁶Era bangi mu baana ba Isiraeri alibakomyawo eri Mukama Katonda waabwe.

¹⁷ Alikulembera mu maaso ge mu mwoyo n'amaanyi ga Eriya okukomyawo emitima gya bajjajja eri abaana, n'abatawulira okutambuliranga mu magezi g'abatuukirivu; okutegekera Mukama abantu abateekebwateekebwa.

¹⁸ Awo Zaakaliya n'agamba malayika nti Nnaakimanya ntya ekyo? kubanga nze ndi mukadde ne mukazi wange akaddiye mu myaka gye.

¹⁹ Awo malayika n'addamu n'amugamba nti Nze Gabulyeri, ayimirira mu maaso ga Katonda; era nnatumibwa okwogera naawe n'okukubuulira ebigambo ebyo ebirungi.

²⁰ Kale, laba, olisirika era nga toyinza kwogera, okutuusa ku lunaku lwe biribaawo ebyo, kubanga tokkirizza bigambo byange, ebirituukirizibwa mu ntuuko zaabyo.

²¹Awo abantu baali balindirira Zaakaliya, ne beewuunya bw'aludde mu yeekaalu.

²²Awo bwe yafuluma n'atayinza kwogera nabo: ne bategeera nti alabye okwolesebwa mu yeekaalu: n'alwawo ng'abawenya n'omukono ng'akyasiruwadde.

²³Awo olwatuuka, ennaku ez'okuweereza kwe bwe zaggwaayo, n'addayo eka ewuwe.

²⁴Awo ennaku ezo bwe zaayitawo mukazi we Erisabesi n'aba olubuto: ne yeekwekera emyezi etaano, ng'agamba nti

²⁵ Bw'atyo Mukama bw'ankoze mu nnaku ze yantunuuliriramu okunziyako ensonyi mu bantu.

²⁶Awo mu mwezi ogw'omukaaga malayika Gabulyeri n'atumibwa Katonda mu kibuga eky'e Ggaliraaya erinnya lyakyo Nazaaleesi,

²⁷ eri omuwala atamanyi musajja eyali ayogerezebwa omusajja erinnya lye Yusufu ow'omu nnyumba ya Dawudi; n'erinnya ly'omuwala Malyamu.

²⁸ Awo n'ayingira omumwe, n'agamba nti Mirembe ggwe aweereddwa ennyo ekisa, Mukama ali naawe.

²⁹Naye ye ne yeeraliikirira ekigambo ekyo, n'alowooza okulamusa okwo bwe kuli.

³⁰Awo malayika n'amugamba nti Totya, Malyamu; kubanga olabye ekisa eri Katonda.

³¹ Era, laba, oliba olubuto, olizaala omwana ow'obulenzi, olimutuuma erinnya Yesu.

³² Oyo aliba mukulu, aliyitibwa Mwana w'Oyo Ali waggulu ennyo. Era Mukama Katonda alimuwa entebe ya Dawudi jjajjaawe:

³³ era anaafuganga ennyumba ya Yakobo emirembe n'emirembe, so obwakabaka bwe tebuliggwaawo.

³⁴Awo Malyamu n'agamba malayika nti Kiriba kitya ekyo, kubanga simanyi musajja?

³⁵ Ne malayika n'addamu n'amugamba nti Omwoyo Omutukuvu alikujjira, n'amaanyi g'Oyo Ali waggulu ennyo galikusiikiriza: era ekyo ekirizaalibwa kyekiriva kiyitibwa ekitukuvu, Omwana wa Katonda.

³⁶Laba, Erisabesi muganda wo, era ye ali lubuto lwa mwana wa bulenzi mu bukadde bwe; guno gwe mwezi gwe ogw'omukaaga eyayitibwanga omugumba.

³⁷ Kubanga tewali kigambo ekiva eri Katonda kiribulwa maanyi.

³⁸Malyamu n'agamba nti Laba, nze ndi muzaana wa Mukama; kibe ku nze nga bw'ogambye. Awo malayika n'ava gy'ali.

³⁹Awo mu nnaku ezo Malyamu n'ayimuka n'agenda mangu mu nsi ey'ensozi, mu kibuga kya Yuda;

⁴⁰n'ayingira mu nnyumba ya Zaakaliya n'alamusa Erisabesi.

⁴¹ Awo olwatuuka Erisabesi bwe yawulira okulamusa kwa Malyamu, omwana n'abuukabuuka mu lubuto lwe; Erisabesi n'ajjuzibwa Omwoyo Omutukuvu;

⁴² n'ayogerera waggulu n'eddoboozi ddene n'agamba nti Oweereddwa omukisa ggwe mu bakazi, n'ekibala eky'omu lubuto lwo kiweereddwa omukisa.

⁴³Nange nno, ekigambo kino kivudde wa, nnyina Mukama wange okujja gye ndi?

⁴⁴Kubanga laba, eddoboozi ly'okulamusa kwo bwe liyingidde mu matu gange, omwana n'abuukabuuka mu lubuto lwange, olw'essanyu.

⁴⁵ Aweereddwa omukisa eyakkiriza; kubanga birituukirizibwa ebyo bye wagambibwa Mukama.

⁴⁶ Malyamu n'agamba nti Emmeeme yange etendereza Mukama,

⁴⁷N'omwoyo gwange gusanyukidde Katonda Omulokozi wange.

⁴⁸ Kubanga alabye obunaku bw'omuzaana we: Kubanga, laba, okusooka leero ab'emirembe gyonna banampitanga aweereddwa omukisa.

⁴⁹ Kubanga Omuyinza ankoledde ebikulu; N'erinnya lye ttukuvu.

⁵⁰ N'ekisa kye kiri mu bamutya; Emirembe n'emirembe.

⁵¹ Alaze amaanyi n'omukono gwe; Asaasaanyizza abalina amalala mu kuteerera kw'omu mitima gyabwe.

⁵² Agobye abafuzi abeekulumbaza ku ntebe zaabwe, Agulumizizza abeetoowaze

⁵³ Abalina enjala abakkusizza ebirungi; N'abagagga abagobye nga tebalina kintu.

⁵⁴ Abedde Isiraeri omuddu we Ajjukire ekisa kye

⁵⁵ (Nga bwe yagamba bajjajjaffe) Eri Ibulayimu n'ezzadde lye, emirembe gyonna.

⁵⁶Awo Malyamu n'amalayo emyezi ng'esatu, n'akomawo ewuwe.

⁵⁷Awo ebiro bya Erisabesi ne bituuka okuzaala: n'azaala omwana wa bulenzi.

⁵⁸Baliraanwa be n'ab'ekika kye ne bawulira nga Mukama amugulumiririzza ekisa kye, ne basanyukira wamu naye.

⁵⁹ Awo olwatuuka ku lunaku olw'omunaana, ne bajja okukomola omwana; baali baagala okumutuuma erinnya lya kitaawe Zaakaliya.

⁶⁰ Nnyina n'addamu n'agamba nti Nedda, naye anaatuumibwa Yokaana.

⁶¹Ne bamugamba nti Tewali wa mu kika kyo ayitibwa linnya eryo.

⁶²Ne bawenya kitaawe, bw'ayagala okumutuuma.

⁶³N'ayagala ekipande eky'okuwandiikako, n'awandiika, n'agamba nti Erinnya lye Yokaana. Ne beewuunya bonna.

⁶⁴Amangu ago akamwa ke ne kazibuka, n'olulimi lwe ne lusumulukuka, n'ayogera nga yeebaza Katonda.

⁶⁵Bonna abaali baliraanyeewo ne batya. N'ebigambo ebyo byonna ne bibuna mu nsi yonna ey'ensozi ey'e Buyudaaya.

⁶⁶Ne bonna abaabiwulira ne babissa mu mitima gyabwe, ne bagamba nti Kale omwana oyo aliba ki? kubanga omukono gwa Mukama gwali wamu naye.

⁶⁷Kitaawe Zaakaliya n'ajjuzibwa Omwoyo Omutukuvu, n'alagula, ng'agamba nti

⁶⁸ Atenderezebwe Mukama, Katonda wa Isiraeri; Kubanga akyalidde abantu be, era abanunudde,

⁶⁹ Era atuyimusirizza ejjembe ery'obulokozi Mu nnyumba y'omuddu we Dawudi.

⁷⁰(Nga bwe yayogerera mu kamwa ka bannabbi be abatukuvu, abaaliwo kasookedde ensi ebaawo),

⁷¹Okulokolebwa mu balabe baffe, ne mu mikono gy'abo bonna abatukyawa;

⁷² Okutuukiriza ekisa kye yasuubiza bajjajjaffe, N'okujjukira endagaano ye entukuvu;

⁷³ Okutuukiriza ekirayiro kye yalayirira jjajjaffe Ibulayimu,

⁷⁴ Okukituwa ffe; ffe bwe tulokolebwa mu mikono gy'abalabe baffe, Tulyoke tumuweereze nga tetuliiko kye tutya,

⁷⁵Mu butukuvu ne mu butuukirivu mu maaso ge ennaku zaffe zonna.

⁷⁶ Naawe, omwana, oliyitibwa nnabbi w'Oyo Ali waggulu ennyo: Kubanga olikulembera Mukama okulongoosa amakubo ge;

⁷⁷ Okumanyisa abantu be obulokozi, Ebibi byabwe bibaggibweko,

⁷⁸ Olw'ekisa kya Katonda waffe ekirungi, Emmambya kyevudde etusalira eva mu ggulu,

⁷⁹ Okwakira abatuula mu nzikiza, ne mu kisiikirize ky'olumbe, Okuluŋŋamya ebigere byaffe mu kkubo ery'emirembe.

⁸⁰ Omwana n'akula, n'ayongerwako amaanyi mu mwoyo, n'abeera mu malungu okutuusa ku lunaku lwe yayolesebwa eri Isiraeri.