Read luganda Lukka 17 Bible Online

Lukka 17 - luganda bible

Lukka 17

¹N'agamba abayigirizwa be nti Tekiyinzika ebisittaza obutajja; naye zimusanze oyo abireeta!

² Waakiri oyo okusibwa olubengo mu bulago bwe, okusuulibwa mu nnyanja, okusinga okusittaza omu ku abo abato.

³ Mwekuumenga muganda wo bw'ayonoonanga, omubuuliriranga; bwe yeenenyanga, omusonyiwanga.

⁴ Era bw'akwonoonanga emirundi omusanvu ku lunaku olumu, era emirundi omusanvu n'akukyukira ng'agamba nti Nneenenyezza; omusonyiwanga.

⁵ Abatume ne bagamba Mukama waffe nti Otwongereko okukkiriza.

⁶ Mukama waffe n'agamba nti Singa mulina okukkiriza okutono ng'akaweke ka kaladaali, mwandigambye omusikamiini guno nti Siguka osimbibwe mu nnyanja; era gwandibawulidde.

⁷Naye ani ku mmwe, alina omuddu ng'alima oba ng'alunda endiga, bw'ayingira ng'ava mu lusuku, alimugamba nti Jjangu mangu ago otuule olye;

⁸naye atamugamba nti Jjula emmere ndye, weesibe, ompeereze, mmale okulya n'okunywa; naawe olyoke olye era onywe?

⁹Amwebaza omuddu oyo olw'okukola by'alagiddwa?

¹⁰Era nammwe bwe mutyo, bwe mumalanga okukola byonna bye mwalagirwa, mugambenga nti Ffe tuli baddu abatasaana; ebyatugwanira okukola bye tukoze.

¹¹ Awo olwatuuka bwe baali mu kkubo nga bagenda e Yerusaalemi yali ng'ayita wakati wa Samaliya ne Ggaliraaya.

¹² Awo bwe yayingira mu mbuga emu ne bamusisinkana abantu kkumi abagenge, abaayimirira ewala;

¹³ne boogerera waggulu ne bagamba nti Yesu, Mukama waffe, otusaasire.

¹⁴ Bwe yabalaba n'abagamba nti Mugende mwerage eri bakabona. Awo olwatuuka bwe baali nga bagenda ne balongoosebwa.

¹⁵Awo omu ku bo, bwe yalaba ng'awonye, n'akomawo n'atendereza Katonda n'eddoboozi ddene;

¹⁶n'avuunama awali ebigere bye, ng'amwebaza: era oyo yali Musamaliya.

¹⁷Yesu n'addamu n'agamba nti Ekkumi bonna tebalongoosebbwa? naye bali omwenda bali ludda wa?

¹⁸Tebalabise abakomawo okutendereza Katonda, wabula omugenyi ono?

¹⁹ N'amugamba nti Yimuka, ogende: okukkiriza kwo kukuwonyezza.

²⁰ Bwe yabuuzibwa Abafalisaayo nti Obwakabaka bwa Katonda bujja ddi? n'abaddamu n'agamba nti Obwakabaka bwa Katonda tebujja nga bweyolese:

²¹ so tebaligamba nti Laba, buli wano! oba nti Buli wali! kubanga, laba, obwakabaka bwa Katonda buli munda yammwe.

²²N'agamba abayigirizwa be nti Ennaku zigenda okujja lwe mulyegomba okulaba olumu ku nnaku z'Omwana w'omuntu, so temulirulaba.

²³ Kale balibagamba nti Laba, wali! Laba, wano! temugendanga, so temugobereranga;

²⁴ kubanga okumyansa bwe kumyansiza ku luuyi olumu olw'eggulu, nga bwe kumasamasiza ne ku luuyi olulala olw'eggulu, bw'atyo Omwana w'omuntu bw'aliba ku lunaku lwe.

²⁵ Naye okusooka kimugwanira okubonyaabonyezebwa ebingi n'okugaanibwa ab'emirembe gino.

²⁶ Era nga bwe byali mu nnaku za Nuuwa, bwe bityo bwe biriba ne mu nnaku z'Omwana w'omuntu.

²⁷ Baali nga balya, nga banywa, nga bawasa, nga bawayira, okutuusa ku lunaku Nuuwa lwe yayingira mu lyato, amataba ne gajja, ne gabazikiriza bonna.

²⁸ Era nga bwe byali mu nnaku za Lutti; baali nga balya, nga banywa, nga bagula, nga batunda, nga basiga, nga bazimba,

²⁹ naye ku lunaku luli Lutti lwe yava mu Sodomu, omuliro n'ekibiriiti ne bitonnya okuva mu ggulu ne bibazikiriza bonna:

³⁰bwe bityo bwe biriba ku lunaku Omwana w'omuntu lw'alibikkulibwa.

³¹ Ku lunaku olwo, alibeera waggulu ku nnyumba, n'ebintu bye nga biri mu nnyumba, takkanga kubiggyamu; n'ali mu lusuku bw'atyo taddanga nnyuma.

³²Mujjukire mukazi wa Lutti.

³³ Buli anoonya okulokola obulamu bwe alibubuza; naye buli abubuza alibuwonya.

³⁴Mbagamba nti Mu kiro ekyo babiri baliba ku kitanda kimu; omu alitwalibwa, n'omulala alirekebwa.

³⁵ Abakazi babiri baliba nga baseera wamu; omu alitwalibwa, n'omulala alirekebwa.

³⁶[Ababiri baliba mu lusuku; omu alitwalibwa, n'omulala alirekebwa.]

³⁷ Ne baddamu ne bamugamba nti Wa, Mukama waffe? N'abagamba nti Awaba omulambo eyo n'ensega we zirikuŋŋaanira.