Read luganda Lukka 18 Bible Online

Lukka 18 - luganda bible

Lukka 18

¹ N'abagerera olugero bwe kibagwanira okusabanga bulijjo, obutakoowanga;

²n'agamba nti Waaliwo omulamuzi mu kibuga kimu, ataatya Katonda, era nga tassaamu muntu kitiibwa;

³era waaliwo nnamwandu mu kibuga ekyo; n'ajjanga w'ali ng'agamba nti Nnamula n'omulabe wange.

⁴N'atasooka kukkiriza; naye oluvannyuma n'ayogera munda mu ye nti Newakubadde nga sitya Katonda, era nga sissaamu muntu kitiibwa;

⁵ naye olw'okunteganya nnamwandu ono kw'anteganya nnaamulamula, aleme okuntengezza ng'ajja olutata.

⁶Mukama waffe n'agamba nti Muwulire omulamuzi oyo atali mutuukirivu ky'agamba.

⁷Kale ne Katonda taliramula balonde be abamukaabirira emisana n'ekiro, ng'akyagumiikiriza?

⁸Mbagamba nti Alibalamula mangu. Naye Omwana w'omuntu bw'alijja, aliraba okukkiriza ku nsi?

⁹N'abalala abaali beerowooza ku bwabwe okuba abatuukirivu nga banyooma abalala bonna, n'abagamba olugero luno, nti

¹⁰Abantu babiri baalinnya mu yeekaalu okusaba, omu Mufalisaayo, omulala muwooza.

¹¹ Omufalisaayo n'ayimirira n'asaba yekka ebigambo bino nti Ai Katonda, nkwebaza kubanga siri nga bantu balala bonna, abanyazi, abalyazaamaanyi, abenzi, newakubadde ng'ono omuwooza.

¹² Nsiiba emirundi ebiri mu ssabbiiti; mpaayo ekitundu eky'ekkumi ku byonna bye nfuna.

¹³ Naye omuwooza n'ayimirira wala, n'atayagala na kuyimusa maaso ge mu ggulu, naye ne yeekuba mu kifuba ng'agamba nti Ai Katonda, onsaasire nze alina ebibi.

¹⁴ Mbagamba nti Oyo yakka okuddayo mu nnyumba ye ng'aweereddwa obutuukirivu okusinga oli; kubanga buli eyeegulumiza alitoowazibwa; n'oyo eyeetoowaza aligulumizibwa.

¹⁵ Awo ne baleeta n'abaana abato w'ali, okubakomako: naye abayigirizwa bwe baabalaba, ne bababoggolera.

¹⁶Naye Yesu n'abayita ng'agamba nti Muleke abaana abato bajje gye ndi, temubagaana: kubanga abali ng'abo obwakabaka bwa Katonda bwe bwabwe.

¹⁷ Mazima mbagamba nti Buli atakkirizenga bwakabaka bwa Katonda ng'omwana omuto, talibuyingiramu n'akatono.

¹⁸ N'omuntu omukulu omu n'amubuuza ng'agamba nti Omuyigiriza omulungi, nkole ki okusikira obulamu obutaggwaawo?

¹⁹Yesu n'amugamba nti Ompitira ki omulungi? tewali mulungi wabula omu, ye Katonda.

²⁰ Amateeka ogamanyi nti Toyendanga, Tottanga, Tobbanga, Towaayirizanga, Ossangamu ekitiibwa kitaawo ne nnyoko.

²¹N'agamba nti Ebyo byonna nnabikwatanga okuva mu buto bwange.

²² Yesu bwe yawulira n'amugamba nti Okyaweebuuseeko kimu; tunda by'oli nabyo byonna, obigabire abaavu, kale oliba n'obugagga mu ggulu: olyoke ojje ongoberere.

²³Naye bwe yawulira ebyo n'anakuwala nnyo kubanga yali mugagga nnyo.

²⁴Awo Yesu bwe yamulaba n'agamba nti Nga kizibu abalina obugagga okuyingira mu bwakabaka bwa Katonda!

²⁵Kubanga kyangu eŋŋamira okuyita mu nnyindo y'empiso, okusinga omugagga okuyingira mu bwakabaka bwa Katonda.

²⁶Abaawulira ne bagamba nti Kale ani ayinza okulokoka?

²⁷Naye n'agamba nti Ebitayinzika eri abantu biyinzika eri Katonda.

²⁸Peetero n'agamba nti Laba, ffe twaleka ebyaffe ne tukugoberera.

²⁹N'abagamba nti Mazima mbagamba nti Tewali muntu eyaleka ennyumba, oba mukazi, oba ba luganda, oba bazadde, oba baana, olw'obwakabaka bwa Katonda,

³⁰ataweebwa nate emirundi mingi mu biro bino, ne mu biro ebigenda okujja obulamu obutaggwaawo.

³¹ N'atwala abo ekkumi n'ababiri n'abagamba nti Laba, tulinnya e Yerusaalemi, n'ebyo byonna ebyawandiikibwa bannabbi birituukirira ku Mwana w'omuntu.

³²Kubanga aliweebwayo mu b'amawanga aliduulirwa, aligirirwa ekyejo, aliwandirwa amalusu:

³³balimukuba enkoba balimutta; era ku lunaku olw'okusatu alizuukira.

³⁴ Nabo ne batategeerawo ku ebyo n'ekimu; n'ekigambo ekyo kyali kibakwekeddwa, ne batategeera ebyayogerwa.

³⁵ Awo olwatuuka bwe yali ng'anaatera okutuuka e Yeriko, omuzibe w'amaaso yali ng'atudde ku kkubo ng'asabiriza;

³⁶awo bwe yawulira ekibiina nga kiyita, n'abuuza nti kiki ekyo.

³⁷Ne bamubuulira nti Yesu Omunazaaleesi ayita.

³⁸N'ayogerera waggulu ng'agamba nti Yesu, omwana wa Dawudi, onsaasire.

³⁹N'abo abaali bakulembedde ne bamuboggolera okusirika; naye ye ne yeeyongera nnyo okwogerera waggulu nti Ggwe omwana wa Dawudi, onsaasire.

⁴⁰Yesu n'ayimirira, n'alagira okumuleeta w'ali; awo bwe yasembera okumpi n'amubuuza

⁴¹nti Oyagala nkukolere ki? N'agamba nti Mukama wange, njagala okuzibula.

⁴² Yesu n'amugamba nti Zibula: okukkiriza kwo kukulokodde.

⁴³Amangu ago n'azibula, n'amugoberera ng'agulumiza Katonda: n'abantu bonna bwe baalaba ne batendereza Katonda.