Read luganda Lukka 2 Bible Online

Lukka 2 - luganda bible

Lukka 2

¹Awo olwatuuka mu nnaku ezo etteeka ne liva eri Kayisaali Augusito ab'ensi zonna okuwandiikibwa.

²Okwo kwe kuwandiikibwa okwasooka okubaawo Kuleniyo bwe yali nga y'afuga Obusuuli.

³Bonna ne bagenda okwewandiika, buli muntu mu kibuga kyabo.

⁴Ne Yusufu n'ava e Nazaaleesi mu kibuga eky'e Ggaliraaya, n'alinnya e Buyudaaya, okugenda mu kibuga kya Dawudi, ekiyitibwa Besirekemu kubanga yali wa mu nnyumba era wa mu kika kya Dawudi,

⁵ yeewandiike ne Malyamu, gwe yali ayogereza, ng'ali lubuto.

⁶Awo olwatuuka baali bali eyo, ennaku ze ez'okuzaala ne zituuka.

⁷ N'azaala omwana we omubereberye; n'amubikka mu ngoye ez'obwana obuwere n'amuzazika mu kisibo, kubanga tebaalaba bbanga mu kisulo ky'abagenyi.

⁸Waaliwo abasumba mu nsi eyo abaatuulanga ku ttale, nga bakuuma ekisibo kyabwe ekiro mu mpalo.

⁹Awo malayika wa Mukama n'ayimirira we baali, n'ekitiibwa kya Mukama ne kibeetooloola nga kimasamasa, ne batya nnyo.

¹⁰Malayika n'abagamba nti Temutya; kubanga, laba, mbaleetera ebigambo ebirungi eby'essanyu eringi eririba eri abantu bonna:

¹¹kubanga leero azaaliddwa gye muli Omulokozi mu kibuga kya Dawudi, ye Kristo Mukama waffe.

¹²Kano ke kabonero gye muli; munaalaba omwana omuwere ng'abikkiddwa mu ngoye ez'obwana obuwere ng'azazikiddwa mu kisibo.

¹³ Awo amangu ago waaliwo ne malayika oyo bangi ab'omu ggye ery'omu ggulu nga batendereza Katonda, nga bagamba nti

¹⁴ Ekitiibwa kibe eri Katonda waggulu ennyo; Ne mu nsi emirembe gibe mu bantu abasiimibwa.

¹⁵Awo olwatuuka, bamalayika bwe baava gye baali okugenda mu ggulu, abasumba ne bagambagana nti Kale tugende e Besirekemu tulabe ekigambo kino ekibaddeyo, Mukama ky'atutegeezezza.

¹⁶Ne bajja mangu, ne balaba Malyamu ne Yusufu n'omwana omuwere ng'azazikiddwa mu kisibo.

¹⁷ Awo bwe baalaba, ne bategeeza ekigambo kye baabuulirwa ku mwana oyo.

¹⁸Bonna abaawulira ne beewuunya ebyo abasumba bye baababuulira.

¹⁹ Naye Malyamu ne yeekuumanga ebigambo ebyo byonna, ng'abirowooza mu mutima gwe.

²⁰Awo abasumba ne baddayo, nga bagulumiza nga batendereza Katonda olw'ebigambo byonna bye baawulira, bye baalaba, nga bwe baabuulirwa.

²¹ Awo ennaku omunaana bwe zaatuuka ez'okumukomoleramu, n'atuumibwa erinnya lye Yesu, liri eryayogerwa malayika nga tannaba kuba mu lubuto.

²² Awo ennaku bwe zaatuuka ez'okulongooka kwabwe ng'amateeka ga Musa bwe gali, ne bamutwala ne bamwambusa e Yerusaalemi, okumwanjulira Mukama

²³ (nga bwe kyawandiikibwa mu mateeka ga Mukama nti Buli kisajja ekiggulanda kinaayitibwanga kitukuvu eri Mukama),

²⁴ n'okuwaayo ssaddaaka nga bwe kyayogerwa mu mateeka ga Mukama, bukaamukuukulu bubiri, oba obuyiba obuto bubiri.

²⁵ Era, laba, waaliwo omuntu mu Yerusaalemi erinnya lye Simyoni, omuntu oyo yali mutuukirivu, era atya Katonda, ng'alindirira okusanyusibwa kwa Isiraeri: era Omwoyo Omutukuvu yali ku ye.

²⁶Oyo yabikkulirwa Omwoyo Omutukuvu nti taliraba kufa nga tannalaba ku Kristo wa Mukama.

²⁷N'ajjira mu Mwoyo mu yeekaalu: abakadde be bwe baayingiza omwana Yesu okumukola nga bw'eri empisa y'amateeka,

²⁸awo ye n'amukwata mu mikono gye, ne yeebaza Katonda n'agamba nti

²⁹Mukama wange, kaakano osiibula omuddu wo Emirembe, ng'ekigambo kyo bwe kyali;

³⁰ Kubanga amaaso gange galabye obulokozi bwo,

³¹Bwe wateekateeka mu maaso g'abantu bonna:

³² Okuba omusana ogw'okumulisa amawanga N'okuba ekitiibwa ky'abantu bo Isiraeri.

³³Kitaawe ne nnyina ne beewuunyanga ebigambo ebyo ebyamwogerwako;

³⁴awo Simyoni n'abasabira omukisa, n'agamba Malyamu nnyina nti Laba, ono ateekeddwawo bangi mu Isiraeri bagwenga bayimirirenga, n'okuba akabonero akavumibwa;

³⁵era ggwe ekitala kirikufumita mu mmeeme; ebirowoozo eby'emitima emingi biryoke bibikkulwe.

³⁶Awo waaliwo Ana, nnabbi omukazi, omuwala wa Fanweri, ow'omu kika kya Aseri (yali yaakamala emyaka mingi, yabeera ne bba emyaka musanvu okuva mu buto bwe,

³⁷naye yali nnamwandu nga yaakamala emyaka kinaana mu ena), ataavanga mu yeekaalu, ng'asinza n'okusiibanga n'okwegayiriranga ekiro n'emisana.

³⁸Oyo bwe yajja mu kiseera ekyo ne yeebaza Katonda, n'abuulira ebigambo bye eri bonna abaali balindirira okununulibwa kwa Yerusaalemi.

³⁹Awo bwe baamala okutuukiriza byonna ebiri mu mateeka ga Mukama, ne baddayo e Ggaliraaya, mu kibuga ky'ewaabwe e Nazaaleesi.

⁴⁰Awo omwana n'akula, n'ayongerwako amaanyi, n'ajjuzibwa amagezi: ekisa kya Katonda ne kibanga ku ye.

⁴¹Awo bakadde be baagendanga e Yerusaalemi buli mwaka ku mbaga ey'Okuyitako.

⁴²Awo bwe yali yaakamala emyaka kkumi n'ebiri, ne bayambuka nga bw'eri empisa y'embaga:

⁴³awo bwe baatuusa ennaku zaabwe, baali nga baddayo, omwana oyo Yesu n'asigala mu Yerusaalemi, ne bakadde be ne batamanya:

⁴⁴naye bwe baalowooza ng'ali mu kisinde kyabwe, ne batambula olugendo lwa lunaku lumu, ne bamunoonya mu baganda baabwe ne mu mikwano gyabwe:

⁴⁵bwe bataamulaba ne baddayo e Yerusaalemi, nga bamunoonya.

⁴⁶Awo olwatuuka bwe waayitawo ennaku ssatu ne bamusanga mu yeekaalu, ng'atudde wakati mu bayigiriza, ng'abawuliriza, ng'ababuuza:

⁴⁷bonna abaamuwulira ne bawuniikirira olw'amagezi ge n'okuddamu kwe.

⁴⁸Awo bwe baamulaba ne basamaalirira: nnyina n'amugamba nti Mwana wange, kiki ekitukozezza ggwe bw'otyo? laba, kitaawo nange twakunoonya nga tunakuwadde.

⁴⁹ N'abagamba nti Mwannoonyeza ki? Temwamanya nga kiŋŋwanidde okubeera mu bigambo bya Kitange?

⁵⁰Ne batategeera kigambo ekyo kye yabagamba.

⁵¹N'aserengeta nabo n'ajja e Nazaaleesi, n'abagonderanga: nnyina ne yeekuumanga ebigambo ebyo byonna mu mutima gwe.

⁵² Awo Yesu ne yeeyongerangako amagezi n'okukula, ne mu kisa eri Katonda n'eri abantu.