Read luganda Lukka 20 Bible Online

Lukka 20 - luganda bible

Lukka 20

¹ Awo olwatuuka ku lunaku lumu ku ezo, yali ng'ayigiriza abantu mu yeekaalu, ng'abuulira enjiri, bakabona abakulu n'abawandiisi wamu n'abakadde ne bamujjira;

²ne boogera nga bamugamba nti Tubuulire; buyinza ki obukukoza bino? Oba ani eyakuwa obuyinza obwo?

³N'addamu n'abagamba nti Nange ka mbabuuze ekigambo kimu; mumbuulire:

⁴okubatiza kwa Yokaana kwava mu ggulu nantiki mu bantu?

⁵Ne bateesa bokka na bokka, nga bagamba nti Bwe tunaagamba nti Kwava mu ggulu; anaagamba nti Kiki ekyabalobera okumukkiriza?

⁶Naye bwe tunaagamba nti Kwava mu bantu; abantu bonna banaatukuba amayinja: kubanga bakkiririza ddala Yokaana okuba nnabbi.

⁷Ne baddamu nti tebamanyi gye kwava.

⁸Yesu n'abagamba nti Kale nange siibabuulire mmwe buyinza obunkoza bino gye bwava.

⁹ N'asooka okubuulira abantu olugero luno nti Omuntu omu yasimba olusuku lw'emizabbibu, n'alusigira abalimi, n'agenda mu nsi endala n'alwayo.

¹⁰ Awo mu biro by'omwaka abalimi n'abatumira omuddu, bamuwe ku bibala by'omu lusuku lw'emizabbibu: naye abalimi ne bamukuba, ne bamusindika nga talina kintu.

¹¹N'ayongera okutuma omuddu omulala; n'oyo ne bamukuba, ne bamuswaza ne bamusindika nga talina kintu.

¹²N'ayongera okutuma ow'okusatu: n'oyo naye ne bamufumita ne bamugoba.

¹³Oyo mukama w'olusuku lw'emizabbibu n'agamba nti Nnaakola ntya? Ka ntume omwana wange omwagalwa: mpozzi oyo balimussaamu ekitiibwa.

¹⁴Naye abalimi bwe baamulaba, ne bateesa bokka na bokka, nga bagamba nti Ono ye musika: tumutte, obusika bube bwaffe.

¹⁵Ne bamugoba mu lusuku lw'emizabbibu ne bamutta. Kale alibakola atya mukama w'olusuku lw'emizabbibu?

¹⁶Alijja n'azikiriza abalimi abo, n'olusuku lw'emizabbibu aliruwa abalala. Bwe baawulira ebyo, ne bagamba nti Bireme okubaawo.

¹⁷ Naye ye n'abatunuulira n'agamba nti Kale kiki kino ekyawandiikibwa nti Ejjinja abazimbi lye baagaana, Eryo lye lyafuuka omutwe ogw'oku nsonda?

¹⁸ Buli agwa ku jjinja eryo alimenyekamenyeka; naye oyo gwe lirigwako, lirimufuumuula ng'enfuufu.

¹⁹ Awo abawandiisi ne bakabona abakulu ne basala amagezi okumussaako emikono mu kiseera ekyo; ne batya abantu; kubanga baategeera nti ku bo kw'ageredde olugero olwo.

²⁰ Ne bamulabirira, ne batuma abakessi nga beefuula abatuukirivu, balandukire ku bigambo bye, balyoke bamuweeyo eri okufuga okw'owessaza n'eri obuyinza bwe.

²¹Ne bamubuuza, nga bagamba nti Omuyigiriza, tumanyi ng'oyogera era ng'oyigiriza eby'amazima, so tososola mu bantu, naye oyigiriza mazima ekkubo lya Katonda:

²²Kirungi ffe okuwanga Kayisaali omusolo, nantiki si weewaawo?

²³Naye n'ategeera obukuusa bwabwe, n'abagamba nti Mundage eddinaali.

²⁴Ekifaananyi ekiriko n'obuwandiikeko by'ani? Bo ne bagamba nti Bya Kayisaali.

²⁵N'abagamba nti Kale ebya Kayisaali mumusasulenga Kayisaali, n'ebya Katonda mumusasulenga Katonda.

²⁶Ne batayinza kuggya nsonga mu kigambo ekyo mu maaso g'abantu, ne beewuunya ky'azzeemu, ne basirika.

²⁷ Abasaddukaayo abamu ne bajja gy'ali, abagamba nti tewali kuzuukira; ne bamubuuza,

²⁸ nga bagamba nti Omuyigiriza, Musa yatuwandiikira nti Muganda w'omuntu bw'afanga ng'alina omukazi, nga talina mwana, muganda we awase omukazi oyo addizeewo muganda we ezzadde.

²⁹Kale waaliwo ab'oluganda musanvu: ow'olubereberye n'awasa omukazi, n'afa nga talina mwana;

³⁰n'ow'okubiri;

³¹n'ow'okusatu n'amuwasa; era bwe batyo bali omusanvu ne bafa, ne batalekaawo baana.

³²Oluvannyuma n'omukazi n'afa.

³³Kale mu kuzuukira aliba muk'ani ku abo? kubanga bonna omusanvu baamuwasa.

³⁴Yesu n'abagamba nti Abaana b'ensi eno bawasa, bafumbizibwa:

³⁵naye bali abasaanyizibwa okutuuka mu nsi eyo ne mu kuzuukira okw'omu bafu, tebawasa, so tebafumbizibwa:

³⁶ kubanga n'okufa tebayinza kufa nate: kubanga bali nga bamalayika; era be baana ba Katonda, nga bwe bali abaana b'okuzuukira.

³⁷ Okumanya ng'abafu bazuukira, ne Musa yakiraga ku Kisaka bwe yamuyita Mukama Katonda wa Ibulayimu, era Katonda wa Isaaka, era Katonda wa Yakobo.

³⁸ Naye ye si Katonda wa bafu, naye wa balamu: kubanga bonna baba balamu ku bubwe.

³⁹Abawandiisi abamu ne baddamu, nga bagamba nti Omuyigiriza, oyogedde bulungi.

⁴⁰Kubanga tebaayaŋŋanga kumubuuza kigambo kyonna nate.

⁴¹ N'abagamba nti Boogera batya nga Kristo ye mwana wa Dawudi?

⁴² Kubanga Dawudi yennyini ayogera mu kitabo kya Zabbuli nti Mukama yagamba Mukama wange nti Tuula ku mukono gwange ogwa ddyo,

⁴³Okutuusa lwe ndifuula abalabe bo entebbe y'ebigere byo.

⁴⁴Dawudi amuyita Mukama we, kale mwana we atya?

⁴⁵Awo abantu bonna bwe baali nga bamuwulira, n'agamba abayigirizwa be nti

⁴⁶ Mwekuumenga abawandiisi, abaagala okutambuliranga mu ngoye empanvu, abaagala okulamusibwanga mu butale, n'entebe ez'oku manjo mu makuŋŋaaniro, n'ebifo eby'ekitiibwa ku mbaga;

⁴⁷abanyaga ennyumba za bannamwandu, abasaba ennyo mu bunnanfuusi: abo balisalirwa omusango ogusinga obunene.