Read luganda Ekyamateeka Olwokubiri 14 Bible Online

Ekyamateeka Olwokubiri 14 - luganda bible

Ekyamateeka Olwokubiri 14

¹ Mmwe muli baana ba Mukama Katonda wammwe: temwesalanga, so temumwanga kiwalaata kyonna wakati w'amaaso gammwe olw'abafu.

² Kubanga oli ggwanga ttukuvu eri Mukama Katonda wo, era Mukama yakulonda okuba eggwanga ery'envuma gy'ali, okusinga amawanga gonna agali ku maaso g'ensi.

³Tolyanga kintu kyonna kya muzizo.

⁴ Zino ze nsolo ze munaalyanga: ente, endiga n'embuzi,

⁵enjaza n'empeewo n'ennangaazi n'embulabuzi n'entamu n'enteŋŋo n'endiga ey'omu nsiko.

⁶Na buli nsolo eyawulamu ekinuulo, era ekirina ekinuulo ekyaseemu, ezza obwenkulumo, mu nsolo, eyo gye munaalyanga.

⁷Naye zino ze mutalyangako ku ezo ezizza obwenkulumo, oba ku ezo ezirina ekinuulo ekyaseemu: eŋŋamira n'akamyu n'omusu, kubanga bizza obwenkulumo, naye tebyawulamu kinuulo, ebyo si birongoofu gye muli:

⁸n'embizzi, kubanga eyawulamu ekinuulo naye tezza bwekulumo, eyo si nnongoofu gye muli: ku nnyama yaabyo temugiryangako, n'emirambo gyabyo temugikomangako.

⁹Bino bye munaalyanga ku byonna ebiba mu mazzi: buli ekirina amaggwa n'amagamba munaakiryanga:

¹⁰na buli ekitalina maggwa na magamba temukiryanga; si kirongoofu gye muli.

¹¹Ku nnyonyi zonna ennongoofu muyinza okuziryako.

¹²Naye zino ze mutalyangako: ennunda, n'empungu, ne makwanzi;

¹³ne wonzi, n'eddiirawamu, ne kamunye n'engeri ye;

¹⁴na buli namuŋŋoona n'engeri ye;

¹⁵ne maaya, n'olubugabuga, n'olusove, n'enkambo n'engeri yaayo;

¹⁶n'ekiwuugulu, n'ekkufukufu, n'ekiwuugulu eky'amatu;

¹⁷n'ekimbaala, n'ensega, n'enkobyokobyo;

¹⁸ne kasiida, ne ssekanyolya n'engeri ye, n'ekkookootezi, n'ekinyira.

¹⁹Ne byonna ebyewalula ebirina ebiwaawaatiro si birongoofu gye muli: tebiriibwanga.

²⁰Ku nnyonyi zonna ennongoofu muyinza okuziryako.

²¹ Temulyanga ku kintu kyonna ekifa kyokka: oyinza okukiwa munnaggwanga ali munda w'enzigi zo akirye; oba oyinza okukiguza munnaggwanga: kubanga gw'oli ggwanga ttukuvu eri Mukama Katonda wo. Tofumbiranga mwana gwa mbuzi mu mata ga nnyina gwayo.

²² Tolemanga kusolooza kitundu kya kkumi ku bibala byonna eby'ensigo zo, ebinaavanga mu nnimiro buli mwaka.

²³ Era onooliiranga mu maaso ga Mukama Katonda wo mu kifo ky'alyeroboza okutuuza omwo erinnya lye ekitundu eky'ekkumi eky'eŋŋaano yo, n'eky'envinnyo yo, n'eky'amafuta go, n'ebibereberye by'ente zo n'eby'embuzi zo; oyige okutyanga Mukama Katonda wo ennaku zonna.

²⁴ Era oba ng'olugendo lunaakuyinganga okuba olunene, n'okuyinza n'otoyinza kukitwalayo, kubanga ekifo kiyinze okukuba ewala, Mukama Katonda wo ky'alyeroboza okuteeka omwo erinnya lye, Mukama Katonda wo bw'alikuwa omukisa;

²⁵onookiwaanyisangamu effeeza, n'osiba effeeza mu mukono gwo, n'ogenda mu kifo Mukama Katonda wo ky'alyeroboza:

²⁶kale effeeza onoogigulangamu ekintu kyonna emmeeme yo ky'eyagala, ente, oba ndiga, oba nvinnyo, oba ekitamiiza, oba ekintu kyonna emmeeme yo ky'eneekusabanga: era onooliiranga eyo mu maaso ga Mukama Katonda wo, era onoosanyukanga ggwe n'ab'omu nnyumba yo:

²⁷ n'Omuleevi ali munda w'enzigi zo, tomwabuliranga; kubanga talina mugabo newakubadde obusika awamu naawe.

²⁸ Buli myaka esatu bwe giggwangako, onoofulumyanga ekitundu kyonna eky'ekkumi eky'ebibala byo mu mwaka ogwo, n'okiterekanga munda w'enzigi zo:

²⁹n'Omuleevi, kubanga talina mugabo newakubadde obusika awamu naawe, ne munnaggwanga, ne mulekwa, ne namwandu abali munda w'enzigi zo, banajjanga ne balya ne bakkuta; Mukama Katonda wo alyoke akuwe omukisa mu mulinu gwonna ogw'omukono gwo gw'okola.