Read luganda Ekyamateeka Olwokubiri 32 Bible Online

Ekyamateeka Olwokubiri 32 - luganda bible

Ekyamateeka Olwokubiri 32

¹ Wulira, ggwe eggulu, nange naayogera; N'ensi ewulire ebigambo by'akamwa kange:

² Okuyigiriza kwange kunaatonnya ng'enkuba, Okwogera kwange kunaagwa ng'omusulo; Ng'obukubakuba ku ssubi eggonvu, Era ng'oluwandaggirize ku muddo:

³ Kubanga naatendera erinnya lya Mukama: Muwe obukulu Katonda waffe.

⁴ Lwazi, omulimu gwe gwatuukirira; Kubanga amakubo ge gonna musango: Katonda ow'obwesigwa atalina bubi, Wa mazima oyo era wa nsonga.

⁵ Baakolanga ebitali bya butuukirivu eri ye, si baana be, lye bbala lyabwe: Gye mirembe emikakanyavu egyakyama.

⁶ Bwe musasula Mukama bwe mutyo, Mmwe abantu abasirusiru abatalina magezi? Si ye kitaawo eyakugula? Ye yakukola, ye yakunyweza.

⁷Jjukira ennaku ez'edda, Lowooza emyaka gy'emirembe emingi: Buuza kitaawo, anaakulaga; Abakadde bo, banaakubuulira.

⁸ Ali waggulu ennyo bwe yawa amawanga obusika bwabwe, Bwe yayawula abaana b'abantu, Yassaawo ensalo z'amawanga Ng'omuwendo bwe gwali ogw'abaana ba Isiraeri.

⁹Kubanga omugabo gwa Mukama be bantu be; Yakobo gwe muteeko gw'obusika bwe.

¹⁰ Yamusanga mu nsi ey'eddungu, Era mu kigumbo ekyereere ensolo we zikaabira; Yamwetooloolanga, yamujjanjabanga. Yamukuumanga ng'emmunye y'eriiso lye:

¹¹ Ng'empungu esaasaanya ekisu kyayo, Epaapaalira ku bwana bwayo, Yayanjuluza ebiwaawaatiro bye, n'abatwala, N'abasitulira ku byoya bye.

¹² Mukama yekka ye yamukulembera, So tewabanga katonda mulala wamu naye.

¹³ Yamulinnyisa ku bifo ebigulumivu eby'ensi, N'alya ekyengera eky'ennimiro; N'amunuunyanga omubisi gw'enjuki okuva mu lwazi, N'amafuta okuva mu lwazi olw'embaalebaale;

¹⁴ Omuzigo gw'ente n'amata g'endiga, N'amasavu g'abaana b'endiga, N'endiga ennume ez'engeri ey'e Basani, n'embuzi emmandwa, N'eŋŋaano eya ssava ng'amasavu g'ensigo; N'onywanga omwenge oguva mu musaayi gw'omuzabbibu.

¹⁵ Naye Yesuluuni n'asavuwala, n'asamba: Wasavuwala, wanenewala, wafuuka munyirivu: N'alyoka aleka Katonda eyamukola, N'anyooma Olwazi olw'obulokozi bwe.

¹⁶ Baamukwasanga obuggya ne bakatonda abalala, Baamusunguwazanga n'eby'emizizo.

¹⁷ Baawanga ssaddaaka balubaale abatali Katonda, Bakatonda be bataamanyanga, Bakatonda abaggya abaakajja bayimuke, Bajjajja bammwe be bataatyanga.

¹⁸ Lwazi eyakuzaala tomujjukira, Era weerabidde Katonda eyakuzaala.

¹⁹ Mukama n'akiraba n'abatamwa Olw'okusunguwaza kwa batabani be ne bawala be.

²⁰ N'ayogera nti Naabakisa amaaso gange, Ndiraba enkomerero yaabwe bw'eriba: Kubanga gye mirembe egy'ekyejo ekingi, Abaana omutali kukkiriza.

²¹ Bankwasanga obuggya n'ekyo ekitali Katonda; Bansunguwazanga n'ebigambo byabwe ebitaliimu: Nange ndibakwasa obuggya eri abo abatali ggwanga; Ndibasunguwaza n'eggwanga essirusiru.

²² Kubanga omuliro gukoledde mu busungu bwange, Era gwase okutuuka mu magombe aga wansi ennyo, Era gwokya ensi n'ekyengera kyayo, Era gukoleeza ensozi we zisibuka.

²³ Ndibatuumako obubi; Ndimalira obusaale bwange ku bo:

²⁴Balikoozimba n'enjala, n'okwokya okungi kulibamalawo, N'okuzikirira okukambwe; N'amannyo g'ensolo ndibasindikira, N'obusagwa bw'ebyewalula eby'omu nfuufu.

²⁵ Ebweru ekitala kinaabafuulanga bamulekwa, Ne mu bisenge entiisa; Kinaazikirizanga omulenzi era n'omuwala, Ayonka era n'omusajja ameze envi.

²⁶ Nayogera nti Nandibasaasaanyizza wala, Nandimazeeyo okujjukirwa kwabwe mu bantu:

²⁷ Singa saatya kusunguwaza kwa mulabe, Abaabakyawa baleme okwerimba, Baleme okwogera nti Omukono gwaffe gugulumizibwa, Era Mukama si y'akoze bino byonna.

²⁸ Kubanga lye ggwanga eritamanyi kuteesa bigambo, So temuli kutegeera mu bo.

²⁹ Singa ba magezi ne bategeera ekyo, Ne balowooza enkomerero yaabwe ey'oluvannyuma!

³⁰ Omu yandigobye atya olukumi, N'ababiri bandiddusizza batya akakumi, Lwazi waabwe singa teyabatunda, Era Mukama singa teyabagabula?

³¹ Kubanga olwazi lwabwe teruliŋŋanga olwazi lwaffe, Newakubadde abalabe baffe bennyini nga be basala omusango.

³²Kubanga omuzabbibu gwabwe gwava ku muzabbibu ogw'e Sodoma, Ne mu nnimiro ez'e Ggomola: Ezabbibu zaabwe zabbibu za mususa, Ebirimba byazo bikaawa:

³³Omwenge gwabwe busagwa bwa misota, Era busagwa bukambwe bwa mbalasaasa.

³⁴ Kino tekyaterekwa gye ndi, Nga kiteekeddwako akabonero mu bugagga bwange?

³⁵ Okuwalana kwange, n'okusasula, Obudde bwe bulituuka ekigere kyabwe ne kiseerera: Kubanga olunaku lwabwe olw'okulaba ennaku luli kumpi, N'ebigenda okubajjira biryanguwa.

³⁶ Kubanga Mukama alisalira abantu be omusango, Era alyejjusa olw'abaddu be; Bw'aliraba ng'obuyinza bwabwe buweddewo, So tewali asigaddewo, oba musibe oba atali musibe.

³⁷Era alyogera nti Bakatonda baabwe bali ludda wa, Olwazi lwe beesiganga;

³⁸ Abaalyanga amasavu ag'essaddaaka zaabwe, Abaanywanga omwenge ogw'ekyo kye baawangayo ekyokunywa Bagolokoke bababeere, Babe ekigo kyammwe,

³⁹ Mulabe kaakano nga nze, nze wuuyo, So tewali katonda wamu nange: Nze nzita, era nze mpa obulamu; Nfumise, era mponya: So tewali ayinza okulokola okuggya mu mukono gwange.

⁴⁰ Kubanga ngolola omukono gwange eri eggulu, Ne njogera nti Nga bwe ndi omulamu emirembe gyonna,

⁴¹ Bwe ndiwagala ekitala kyange ekimasamasa, Omukono gwange ne gukwata ku musango; Ndiwalana eggwanga ku balabe bange, Ndisasula abo abankyawa.

⁴² Obusaale bwange ndibutamiiza omusaayi, N'ekitala kyange kirirya ennyama; N'omusaayi gw'abo abattibwa n'abawambe, Okuva ku mutwe gw'abo abakulembera abalabe,

⁴³ Musanyuke, mmwe amawanga, wamu n'abantu be: Kubanga aliwalana eggwanga ly'omusaayi gw'abaddu be, Era alisasula abalabe be okubonerezebwa, Era alitangirira ensi ye, abantu be.

⁴⁴Musa n'ajja n'ayogerera ebigambo byonna eby'oluyimba luno mu matu g'abantu, ye ne Koseya omwana wa Nuni.

⁴⁵Musa n'amalira ddala okwogera ebigambo ebyo byonna eri Isiraeri yenna:

⁴⁶ n'abagamba nti Muteeke omutima gwammwe ku bigambo byonna bye mbategeeza leero; bye muliragira abaana bammwe, okukwata ebigambo byonna eby'amateeka ago okubikolanga.

⁴⁷ Kubanga si kigambo ekitaliimu gye muli; kubanga bwe bulamu bwammwe, era olw'ekigambo ekyo kyemunaavanga muwangaala ennaku zammwe ku nsi gye musomokera Yoludaani okugirya.

⁴⁸Mukama n'agamba Musa ku lunaku olwo

⁴⁹ nti Linnya ku lusozi luno Abalimu, ku lusozi Nebo, oluli mu nsi ya Mowaabu, olwolekera Yeriko; olengere ensi ya Kanani gye mpa abaana ba Isiraeri okuba obutaka:

⁵⁰ ofiire ku lusozi lw'olinnyako, okuŋŋaanyizibwe eri abantu bo; nga Alooni muganda wo bwe yafiira ku lusozi Koola, n'akuŋŋaanyizibwa eri abantu be:

⁵¹ kubanga mwansobyako wakati mu baana ba Isiraeri ku mazzi ag'e Meriba mu Kadesi, mu ddungu Zini; kubanga temwantukuza wakati mu baana ba Isiraeri.

⁵² Kubanga olirengera ensi mu maaso go; naye toligendayo mu nsi gye mpa abaana ba Isiraeri.