Read luganda Ekyamateeka Olwokubiri 6 Bible Online

Ekyamateeka Olwokubiri 6 - luganda bible

Ekyamateeka Olwokubiri 6

¹Kale kino kye kiragiro, amateeka n'emisango, Mukama Katonda wammwe bye yalagira okubayigiriza, mulyoke mubikolenga mu nsi, gye musomokera okugenda okugirya:

² otyenga Mukama Katonda wo, okwekuumanga amateeka ge gonna n'ebiragiro bye, bye nkulagira ggwe n'omwana wo n'omuzzukulu wo, ennaku zonna ez'obulamu bwo; era olyoke owangaale ennaku nnyingi.

³ Kale wulira, ggwe Isiraeri, okwatenga okukola kutyo; olabenga ebirungi, era mwale nnyo, nga Mukama Katonda wa bajjajja bo bwe yakusuubiza, mu nsi ekulukuta n'amata n'omubisi gw'enjuki.

⁴ Wulira, ggwe Isiraeri: Mukama Katonda waffe ye Mukama omu:

⁵ era onooyagalanga Mukama Katonda wo n'omutima gwo gwonna, nemmeeme yo yonna, n'amaanyi go gonna.

⁶ Era ebigambo bino bye nkulagira leero binaabanga ku mutima gwo:

⁷era onoonyiikiranga okubiyigiriza abaana bo, era onoobyogerangako bw'onootuulanga mu nnyumba yo, era bw'onootambuliranga mu kkubo, era bw'onoogalamiranga, era bw'onoogolokokanga.

⁸ Era onoobisibanga okuba akabonero ku mukono gwo, era binaabanga eby'oku kyenyi wakati w'amaaso go.

⁹ Era onoobiwandiikanga ku mifubeeto gy'ennyumba yo, ne ku nzigi zo.

¹⁰ Awo olulituuka Mukama Katonda wo bw'alikuyingiza mu nsi gye yalayirira bajjajja bo, Ibulayimu ne Isaaka ne Yakobo okugikuwa: ebibuga ebinene ebirungi by'otaazimba,

¹¹n'ennyumba ezijjula ebirungi byonna, z'otajjuza, n'ebidiba ebyasimibwa, by'otaasima, ensuku ez'emizabibu n'emizeyituuni, gy'otaasimba, n'olya n'okkuta;

¹² n'olyoka weekuuma olemenga okwerabira Mukama, eyakuggya mu nsi y'e Misiri, mu nnyumba y'obuddu.

¹³ Onootyanga Mukama Katonda wo; era oyo onoomuweerezanga, era erinnya lye ly'onoolayiranga.

¹⁴ Temugobereranga bakatonda balala, ku bakatonda ab'amawanga agabeetoolodde;

¹⁵ kubanga Mukama Katonda wo ali wakati wammwe ye Katonda ow'obuggya; obusungu bwa Mukama Katonda wo buleme okukubuubuukirako, n'akuzikiriza okukuggya ku maaso g'ensi.

¹⁶ Temukemanga Mukama Katonda wammwe, nga bwe mwamukemera e Masa.

¹⁷ Munaanyiikiranga okwekuuma ebiragiro bya Mukama Katonda wammwe n'ebyo bye yategeeza, n'amateeka ge, ge yakulagira.

¹⁸Era onookolanga ekiri mu maaso ga Mukama ekituukirivu era ekirungi: olyoke olabenga ebirungi, era oyingire olye ensi ennungi Mukama gye yalayirira bajjajja bo,

¹⁹okugobamu abalabe bo bonna mu maaso go, nga Mukama bwe yayogera.

²⁰ Omwana wo bw'akubuuzanga mu biro ebigenda okujja, ng'ayogera nti Ebyo bye yategeeza, n'amateeka, n'emisango Mukama Katonda waffe bye yabalagira, amakulu gaabyo ki?

²¹N'olyoka ogamba omwana wo nti Twali baddu ba Falaawo mu Misiri; Mukama n'atuggya mu Misiri n'engalo ez'amaanyi:

²² era Mukama n'alaga obubonero n'eby'amagero, ebinene era ebizibu, ku Misiri, ku Falaawo, ne ku nnyumba ye yonna, mu maaso gaffe:

²³n'atuggya omwo, alyoke atuyingize, okutuwa ensi gye yalayirira bajjajja baffe.

²⁴ Era Mukama n'atulagira okukolanga amateeka ago gonna, okutyanga Mukama Katonda waffe, olw'obulungi bwaffe ennaku zonna, alyoke atukuumenga tuleme okufa, nga leero.

²⁵ Era kinaabanga butuukirivu gye tuli, bwe tunaakwatanga okukola ekiragiro kino kyonna mu maaso ga Mukama Katonda waffe, nga bwe yatulagira.