Read luganda Yokaana 11 Bible Online

Yokaana 11 - luganda bible

Yokaana 11

¹ Awo waaliwo omuntu eyali omulwadde, Lazaalo ow'e Bessaniya, mu mbuga Malyamu ne Maliza muganda we mwe baali;

² Malyamu oyo eyasiiga Mukama waffe amafuta n'amuttaanya ebigere n'enviiri ze ye yalina mwannyina Lazaalo eyali alwadde.

³Awo bannyina abo ne bamutumira, nga bagamba nti Mukama waffe, laba, gw'oyagala alwadde.

⁴ Naye Yesu bwe yawulira, n'agamba nti Obulwadde buno si bwa kufa wabula olw'ekitiibwa kya Katonda, Omwana wa Katonda abe n'ekitiibwa olw'obwo.

⁵Naye Yesu yayagala Maliza ne muganda we ne Lazaalo.

⁶Awo bwe yawulira ng'alwadde, n'ayosaawo ate ennaku bbiri mu kifo kye yalimu.

⁷Ate n'alyoka agamba abayigirizwa nti Tuddeyo e Buyudaaya.

⁸ Abayigirizwa ne bamugamba nti Labbi, kaakano Abayudaaya baali basala amagezi okukukuba amayinja, ate gy'oba odda?

⁹ Yesu n'addamu nti Essaawa ez'emisana si kkumi na bbiri? Omuntu bw'atambula emisana teyeesittala, kubanga alaba omusana ogw'ensi eno.

¹⁰ Naye omuntu bw'atambula ekiro, yeesittala, kubanga omusana teguli mu ye.

¹¹ Yayogera bw'ati, n'alyoka abagamba nti Mukwano gwaffe Lazaalo yeebase; naye ŋŋenda okumuzuukusa.

¹²Awo abayigirizwa ne bamugamba nti Mukama waffe, oba yeebase, anaazuukuka.

¹³Naye Yesu yayogera ku kufa kwe: naye bo ne balowooza nti ayogera ku kwebaka kwa tulo.

¹⁴Awo Yesu n'alyoka ababuulira lwatu nti Lazaalo afudde.

¹⁵Nange nneesiimye ku lwammwe kubanga saaliyo, mulyoke mukkirize; naye tugende gy'ali.

¹⁶ Awo Tomasi ayitibwa Didumo n'agamba bayigirizwa banne nti Naffe tugende tufiire wamu naye.

¹⁷Awo Yesu bwe yatuuka, n'asanga nga yaakamala ennaku nnya mu ntaana.

¹⁸Naye Bessaniya yali kumpi ne Yerusaalemi nga sutadyo kkumi na ttaano;

¹⁹Abayudaaya bangi baali bazze eri Maliza ne Malyamu okubakubagiza olwa mwannyinaabwe.

²⁰Awo Maliza bwe yawulira nga Yesu ajja, n'agenda okumusisinkana: naye Malyamu n'asigala mu nju.

²¹ Awo Maliza n'agamba Yesu nti Mukama wange, singa wali wano, mwannyinaze teyandifudde.

²²Era kaakano mmanyi nga byonna by'onoosaba Katonda, Katonda anaabikuwa.

²³Yesu n'amugamba nti Mwannyoko ajja kuzuukira

²⁴ Maliza n'amugamba nti Mmanyi nti alizuukirira ku kuzuukira kw'olunaku olw'enkomerero.

²⁵Yesu n'amugamba nti Nze kuzuukira, n'obulamu: akkiriza nze, newakubadde ng'afudde, aliba mulamu:

²⁶ na buli muntu mulamu akkiriza nze talifa emirembe n'emirembe. Okkiriza ekyo?

²⁷ N'amugamba nti Weewaawo, Mukama wange: nze nzikirizza nga ggwe Kristo, Omwana wa Katonda, ajja mu nsi.

²⁸Bwe yamala okwogera bw'ati, n'agenda, n'ayita muganda we Malyamu kyama, ng'agamba nti Omuyigiriza azze, akuyita.

²⁹Naye bwe yawulira, n'agolokoka mangu, n'ajja gy'ali.

³⁰ Yesu yali tannatuuka mu mbuga, naye ng'akyali mu kifo Maliza kye yamusangamu.

³¹Awo Abayudaaya abaali naye mu nnyumba, nga bamukubagiza, bwe baalaba Malyamu ng'ayimiridde mangu okufuluma, ne bamugoberera, nga balowooza nti agenda ku ntaana okukaabira eyo.

³² Awo Malyamu bwe yatuuka Yesu gy'ali n'amulaba, n'agwa ku bigere bye, n'amugamba nti Mukama wange, singa wali wano, mwannyinaze teyandifudde.

³³ Awo Yesu bwe yamulaba ng'akaaba, n'Abayudaaya abazze naye nga bakaaba, n'asinda mu mwoyo, ne yeeraliikirira,

³⁴n'agamba nti Mwamuteeka wa? Ne bamugamba nti Mukama waffe, jjangu olabe.

³⁵ Yesu n'akaaba amaziga.

³⁶Awo Abayudaaya ne boogera nti Laba bw'abadde amwagala.

³⁷Naye abamu ku bo ne boogera nti Omuntu ono, eyazibula amaaso ga muzibe w'amaaso teyayinza kulobera ono okufa?

³⁸ Awo Yesu bwe yasinda ate mu nda ye, n'atuuka ku ntaana. Yali mpuku, ng'eteekeddwako ejjinja kungulu.

³⁹ Yesu n'agamba nti Muggyeewo ejjinja. Maliza, mwannyina w'oli eyafa, n'amugamba nti Mukama wange, kaakano awunya: kubanga yaakamala ennaku nnya.

⁴⁰ Yesu n'amugamba nti Sikugambye nti Bw'onokkiriza, onoolaba ekitiibwa kya Katonda?

⁴¹Awo ne baggyawo ejjinja. Yesu n'ayimusa amaaso waggulu, n'ayogera nti Kitange, nkwebaza kubanga wampulira.

⁴² Nange nnamanya ng'ompulira bulijjo: naye njogedde ku lw'ekibiina ekinneetoolodde, bakkirize nga ggwe wantuma.

⁴³Bwe yamala okwogera bw'ati, n'ayogerera waggulu n'eddoboozi ddene nti Lazaalo, fuluma ojje.

⁴⁴Eyali afudde n'afuluma, ng'azingiddwa mu mabugo amagulu n'emikono; n'ekiremba nga kisibiddwa mu maaso ge. Yesu n'abagamba nti Mumusumulule, mumuleke agende.

⁴⁵ Awo bangi ab'omu Bayudaaya, abajja ewa Malyamu, bwe baalaba ky'akoze, ne bamukkiriza.

⁴⁶Naye abamu ku bo ne bagenda eri Abafalisaayo, ne bababuulira Yesu by'akoze.

⁴⁷Awo bakabona abakulu n'Abafalisaayo ne bakuŋŋaanya olukiiko, ne bagamba nti Tukole tutya? kubanga omuntu oyo akola obubonero bungi.

⁴⁸Bwe tunaamuleka bwe tutyo, bonna banaamukkiriza: n'Abaruumi balijja, balitunyagako ensi yaffe n'eggwanga lyaffe.

⁴⁹Naye omu ku bo, Kayaafa, eyali kabona asinga obukulu mu mwaka ogwo, n'abagamba nti Mmwe temuliiko kye mumanyi,

⁵⁰ so temulowooza nga kibagwanidde omuntu omu afiirire abantu, n'eggwanga lyonna lireme okubula.

⁵¹ Ekyo teyakyogera mu magezi ge yekka; naye kubanga yali kabona asinga obukulu mu mwaka ogwo, yalagula nti Yeus agenda okufiirira eggwanga eryo;

⁵² so si lwa ggwanga eryo lyokka, naye akuŋŋaanyize wamu abaana ba Katonda abaasaasaana.

⁵³Awo okuva ku lunaku olwo ne bateesa okumutta.

⁵⁴Awo Yesu n'atatambula nate mu Buyudaaya mu lwatu, naye n'avaayo n'agenda mu kifo ekiri okumpi n'eddungu, mu kibuga ekiyitibwa Efulayimu; n'abeera eyo n'abayigirizwa.

⁵⁵ Naye Okuyitako okw'Abayudaaya kwali kunaatera okutuuka: bangi abaava mu byalo ne balinnya e Yerusaalemi Okuyitako nga kukyali, beerongoose.

⁵⁶Awo Yesu ne bamunoonya, ne boogera bokka na bokka, nga bayimiridde mu yeekaalu, nti Mulowooza mutya? Tajje ku mbaga?

⁵⁷Naye bakabona abakulu n'Abafalisaayo baali balagidde nti Omuntu bw'ategeera w'ali, ababuulire balyoke bamukwate.