Read luganda Yokaana 14 Bible Online

Yokaana 14 - luganda bible

Yokaana 14

¹ Omutima gwammwe tegweraliikiriranga: mukkirize Katonda, era nange munzikirize.

²Mu nnyumba ya Kitange mulimu ebifo bingi eby'okubeeramu. Singa tekiri bwe kityo, nandibagambye; kubanga ŋŋenda okubateekerateekera ekifo.

³ Era oba nga ŋŋenda okubateekerateekera ekifo, ndikomawo nate ne mbatwala gye ndi; nze gye ndi, nammwe mubeere eyo.

⁴Era gye ŋŋenda, ekkubo mulimanyi.

⁵Tomasi n'amugamba nti Mukama waffe, tetumanyi gy'ogenda; ekkubo tulimanyi tutya?

⁶ Yesu n'amugamba nti Nze kkubo, n'amazima n'obulamu: tewali ajja eri Kitange, wabula ng'ayita mu nze.

⁷Singa muntegedde, ne Kitange mwandimumanye: okusooka kaakano mumutegeera era mumulabye.

⁸Firipo n'amugamba nti Mukama waffe, tulage Kitaffe, kale kinaatumala.

⁹ Yesu n'amugamba nti Kasookedde mbeera nammwe, ebiro ebingi bwe bityo, era tontegeeranga, Firipo? Alabye ku nze, ng'alabye ku Kitange; kiki ekikwogeza ggwe nti tulage Kitaffe?

¹⁰ Tokkiriza nga nze ndi mu Kitange, ne Kitange ali mu nze? Ebigambo bye mbagamba nze, sibyogera ku bwange nzekka; naye Kitange bw'abeera mu nze akola emirimu gye.

¹¹ Munzikirize nga nze ndi mu Kitange, ne Kitange mu nze: oba munzikirize olw'emirimu gyokka.

¹² Ddala ddala mbagamba nti Akkiriza nze emirimu gye nkola nze, naye aligikola; era alikola egisinga egyo obunene; kubanga nze ŋŋenda eri Kitange.

¹³ Na buli kye munaasabanga mu linnya lyange, ekyo nnaakikolanga, Kitange agulumirizibwenga mu Mwana.

¹⁴ Bwe munansabanga ekigambo mu linnya lyange, ekyo nnaakikolanga.

¹⁵ Oba nga munjagala, munaakwatanga ebiragiro byange.

¹⁶ Nange ndisaba Kitange, naye alibawa Omubeezi omulala, abeerenga nammwe emirembe n'emirembe.

¹⁷ Omwoyo ow'amazima: ensi gw'eteyinza kukkiriza; kubanga temulaba, so temutegeera: mmwe mumutegeera; kubanga abeera gye muli, era anaabanga mu mmwe.

¹⁸Siribaleka bamulekwa; nkomawo gye muli.

¹⁹ Esigadde ekiseera kitono, ensi obutandaba nate; naye mmwe mundaba: kubanga nze ndi mulamu nammwe muliba balamu.

²⁰ Ku lunaku olwo mulitegeera mmwe nga nze ndi mu Kitange, nammwe mu nze, nange mu mmwe.

²¹ Alina ebiragiro byange, n'abikwata, oyo nga ye anjagala: anjagala anaayagalibwanga Kitange, nange nnaamwagalanga, nnaamulabikiranga.

²² Yuda (atali Isukalyoti) n'amugamba nti Mukama waffe, kibadde kitya ggwe okugenda okutulabikira ffe, so si eri ensi?

²³ Yesu n'amuddamu n'amugamba nti Omuntu bw'anjagala, anaakwatanga ekigambo kyange: ne Kitange anaamwagalanga, era tunajjanga gy'ali, tunaatuulanga gy'ali.

²⁴ Atanjagala takwata bigambo byange: n'ekigambo kye muwulira si kyange, naye kya Kitange eyantuma.

²⁵Ebigambo ebyo mbabuulidde nga nkyali nammwe.

²⁶ Naye Omubeezi, Omwoyo Omutukuvu, Kitange gw'alituma mu linnya lyange, oyo alibayigiriza byonna, alibajjukiza byonna bye nnabagamba.

²⁷ Emirembe mbalekera; emirembe gyange ngibawa: si ng'ensi bw'ewa, nze bwe mbawa. Omutima gwammwe tegweraliikiriranga so tegutyanga.

²⁸ Muwulidde bwe mbagambye nti ŋŋenda, era nkomawo gye muli. Singa munjagala, mwandisanyuse kubanga ŋŋenda eri Kitange: kubanga Kitange ansinga obukulu.

²⁹ Kaakano mbagambye nga tekinnaba kubaawo, lwe kiribaawo mulyoke mukkirize.

³⁰ Sikyayogera nnyo nate nammwe; kubanga afuga ensi ajja: naye tandiiko kigambo;

³¹ naye ensi etegeere nga njagala Kitange, era Kitange bwe yandagira, bwe ntyo bwe nkola. Mugolokoke, tuve wano.