Read luganda Yokaana 17 Bible Online

Yokaana 17 - luganda bible

Yokaana 17

¹ Yesu yayogera ebyo; n'ayimusa amaaso ge mu ggulu n'agamba nti Kitange, ekiseera kituuse; gulumiza Omwana wo, Omwana wo akugulumize:

² nga bwe wamuwa obuyinza ku balina omubiri bonna, era bonna be wamuwa, abawe obulamu obutaggwaawo.

³ Buno bwe bulamu obutaggwaawo, okutegeera ggwe Katonda omu ow'amazima, n'oyo gwe watuma, Yesu Kristo.

⁴ Nze nkugulumizizza ku nsi kubanga omulimu gwe wampa okukola ngukomekkerezza.

⁵ Ai Kitange, ne kaakano ngulumiza ggwe wamu naawe mu kitiibwa kiri kye nnali nakyo awamu naawe ng'ensi tennabaawo.

⁶ Njolesezza erinnya lyo abantu be wampa okubaggya mu nsi: baali babo, n'obampa nze; nabo bakutte ekigambo kyo.

⁷Kaakano bategedde nga byonna bye wampa biva mu ggwe:

⁸ kubanga ebigambo bye wampa mbibawadde; ne babiganya, ne bategeera mazima nga nnava gy'oli, ne bakkiriza nga ggwe wantuma.

⁹ Nze mbasabira abo; sisabira nsi, wabula bo be wampa; kubanga babo;

¹⁰ era ebyange byonna bibyo, n'ebibyo byange: nange ngulumizibwa mu bo.

¹¹Siri mu nsi nate, naye bano bali mu nsi, nange njija gy'oli. Kitange Omutukuvu, obakuumenga mu linnya lyo be wampa, babeerenga bumu, nga ffe.

¹² Bwe nnali nabo be wampa nnabakuumanga mu linnya lyo: era ne mbazibira, tekubulanga muntu ku bo, wabula omwana w'okubula; ebyawandiikibwa bituukirire.

¹³ Naye kaakano njija gy'oli; na bino mbyogera mu nsi babe n'essanyu lyange nga lituukiridde mu bo.

¹⁴ Mbawadde ekigambo kyo; era ensi yabakyawa, kubanga si ba nsi nga nze bwe siri wa nsi.

¹⁵Sisaba ggwe kubaggya mu nsi, naye obakuumenga mu bubi.

¹⁶Si ba nsi, nga nze bwe siri wa nsi.

¹⁷ Obatukuze mu mazima: ekigambo kyo ge mazima,

¹⁸ Nga bwe wantuma mu nsi, nange bwe nnabatuma mu nsi.

¹⁹ Era nze nneetukuza ku bwabwe, nabo bennyini batukuzibwe mu mazima.

²⁰ So sibasabira bano bokka, naye n'abo abanzikiriza olw'ekigambo kyabwe;

²¹ bonna babeerenga bumu; nga ggwe, Kitange, bw'oli mu nze, nange mu ggwe, era nabo babeerenga mu ffe: ensi ekkirize nga ggwe wantuma.

²² Nange ekitiibwa kye wampa nkibawadde; babeerenga bumu, nga ffe bwe tuli obumu;

²³ nze mu bo, naawe mu nze, batuukiririre okuba obumu; ensi etegeerenga nga ggwe wantuma, n'obaagala bo, nga bwe wanjagala nze.

²⁴Kitange, be wampa, njagala, we ndi nze, nabo we baba babeeranga nange; balabe ekitiibwa kyange kye wampa: kubanga wanjagala nze ng'ensi tennatondebwa.

²⁵Kitange Omutuukirivu, ensi teyakutegeera, naye nze nnakutegeera; na bano baategeera nga ggwe wantuma;

²⁶era nnabategeeza erinnya lyo era nditegeeza; okwagala kwe wanjagala kubeerenga mu bo, nange mu bo.