Read luganda Yokaana 7 Bible Online

Yokaana 7 - luganda bible

Yokaana 7

¹ Oluvannyuma lw'ebyo Yesu n'atambula mu Ggaliraaya: kubanga teyayagala kutambula mu Buyudaaya kubanga Abayudaaya baali basala amagezi okumutta.

² Naye embaga y'Abayudaaya yali enaatera okutuuka, ye y'ensiisira.

³ Awo baganda be ne bamugamba nti Va wano, ogende e Buyudaaya, abayigirizwa bo nabo balabe emirimu gyo gy'okola.

⁴Kubanga tewali akolera kigambo mu kyama wabula nga naye yennyini ayagala amanyike mu lwatu. Bw'okola ebyo, weeyoleke eri ensi.

⁵Kubanga ne baganda be tebaamukkiriza.

⁶ Awo Yesu n'abagamba nti Ekiseera kyange tekinnaba kutuuka; naye ekiseera kyammwe ennaku zonna kibeerawo nga kyeteeseteese.

⁷ Ensi teyinza kukyawa mmwe; naye ekyawa nze, kubanga nze ntegeeza ebyayo nti emirimu gyayo mibi.

⁸Mmwe mwambuke ku mbaga: nze sinnaba kwambuka ku mbaga eno; kubanga ekiseera kyange tekinnaba kutuukirizibwa.

⁹Bwe yamala okubagamba ebyo n'asigala e Ggaliraaya.

¹⁰Naye baganda be bwe baamala okwambuka ku mbaga, naye n'ayambuka, si lwatu, naye nga mu kyama.

¹¹Awo Abayudaaya ne bamunoonya ku mbaga, ne bagamba nti Ali ludda wa?

¹²Ne waba okumuunyamuunya kungi mu bibiina. Abalala ne bagamba ku ye nti Mulungi; abalala ne bagamba nti Nedda, naye akyamya ekibiina.

¹³ Naye tewaali yamwogerako lwatu kubanga baatya Abayudaaya.

¹⁴Awo mu mbaga wakati Yesu n'ayambuka ku yeekaalu, n'ayigiriza.

¹⁵ Abayudaaya ne beewuunya ne bagamba nti Ono amanya atya okusoma nga tayigirizibwangako?

¹⁶ Awo Yesu n'abaddamu n'agamba nti Okuyigiriza kwange si kwange, naye kw'oli eyantuma.

¹⁷Omuntu bw'ayagala okukola oli by'ayagala, alitegeera okuyigiriza kuno oba nga kwava eri Katonda, oba nga nze njogera bya magezi gange.

¹⁸ Ayogera eby'amagezi ge, anoonya ekitiibwa ky'oyo eyamutuma, oyo wa mazima, so obutali butuukirivu tebuli mu ye.

¹⁹ Musa teyabawa mateeka, so mu mmwe tewali akwata amateeka? Musalira ki amagezi okunzita?

²⁰ Ekibiina ne baddamu nti Oliko dayimooni: ani asala amagezi okukutta?

²¹ Yesu n'addamu n'agamba nti Nnakola omulimu gumu, nammwe mwenna mwewuunya.

²² Musa kyeyava abawa okukomola (si kubanga kwa Musa naye kwa bajjajja); ne ku ssabbiiti mukomola omuntu.

²³ Omuntu bw'akomolebwa ku ssabbiiti, amateeka ga Musa galeme okusoba; munsunguwalira kubanga nnafuula omuntu omulamu ddala ku ssabbiiti?

²⁴ Temusalanga musango okusinziira ku ndabika, naye musalenga omusango ogw'ensonga.

²⁵ Awo abamu ab'omu Yerusaalemi ne bagamba nti Gwe banoonya okutta si ye wuuno?

²⁶Naye, laba, ayogera lwatu, so tebaliiko kye bamugamba. Abakulu bamanyidde ddala ng'ono ye Kristo?

²⁷ Naye ono tumanyi gy'ava: naye Kristo bw'ajja, tewali ategeera gy'ava.

²⁸Awo Yesu n'ayogerera waggulu mu yeekaalu ng'ayigiriza n'agamba nti Nze mummanyi, era ne gye nva mumanyiiyo; nange sajja ku bwange nzekka, naye oli eyantuma ye wa mazima, gwe mutamanyi mmwe.

²⁹ Nze mummanyi; kubanga nava gy'ali, era ye yantuma.

³⁰ Awo bali ne basala amagezi okumukwata, naye tewaali eyamuteekako omukono, kubanga ekiseera kye kyali nga tekinnaba kutuuka.

³¹ Naye bangi ab'omu kibiina ne bamukkiriza; ne bagamba nti Kristo bw'alijja, alikola obubonero bungi okusinga ono bwe yakola?

³²Abafalisaayo ne bawulira ekibiina nga bamwemuunyamuunyaamu batyo; bakabona abakulu n'Abafalisaayo ne batuma abambowa okumukwata.

³³ Awo Yesu n'agamba nti Esigaddeyo ebbanga ttono nga nkyali nammwe, ndyoke ŋŋende gy'ali eyantuma.

³⁴ Mulinnoonya, so temulindaba; era gye ndi, mmwe temuyinza kujjayo.

³⁵Awo Abayudaaya ne boogeragana bokka na bokka nti Ono ayagala kugenda wa, ffe gye tutalimulabira? Ayagala kugenda eri abo abaasaasaanira mu Bayonaani, ayigirize Abayonaani?

³⁶Kigambo ki ekyo ky'agamba nti Mulinnoonya, so temulindaba; era gye ndi, mmwe temuyinza kujjayo?

³⁷ Naye ku lunaku olw'enkomerero, lwe lukulu olw'embaga, Yesu yayimirira n'ayogerera waggulu, n'agamba nti Omuntu bw'alumwa ennyonta, ajje gye ndi anywe.

³⁸ Akkiriza nze, ng'ekyawandiikibwa bwe kigamba nti emigga gy'amazzi amalamu girifuluma mu lubuto lwe.

³⁹ Ekyo yakyogera ku Mwoyo, gwe baali bagenda okuweebwa abamukkiriza; kubanga Omwoyo yali tannaba kugabibwa; kubanga Yesu yali tannaba kugulumizibwa.

⁴⁰ Awo ab'omu kibiina bwe baawulira ebigambo ebyo ne bagamba nti Mazima, ono ye nnabbi oli.

⁴¹ Abalala ne bagamba nti Ono ye Kristo. Naye abalala ne bagamba nti Nedda, Kristo ava mu Ggaliraaya?

⁴² Ekyawandiikibwa tekigamba nti Kristo ava mu zzadde lya Dawudi, mu Besirekemu, embuga Dawudi mwe yali?

⁴³ Bwe kityo ne wabaawo okwawukana mu kibiina ku lulwe.

⁴⁴ Abalala ne baagala okumukwata, naye tewali eyamussaako emikono.

⁴⁵ Awo abambowa ne baddayo eri bakabona abakulu n'Abafalisaayo; nabo ne babagamba nti Ekibalobedde ki okumuleeta?

⁴⁶ Abambowa ne baddamu nti Tewali muntu eyali ayogedde bw'atyo.

⁴⁷Awo Abafalisaayo ne babaddamu nti Era nammwe abakyamizza?

⁴⁸ Aluwa mu bakulu eyamukkiriza, oba mu Bafalisaayo?

⁴⁹Naye ekibiina kino abatategeera mateeka bakolimiddwa.

⁵⁰ Nikoodemo (ye yajja gy'ali edda, ye munnaabwe) n'abagamba nti

⁵¹ Ye mpisa yaffe okusalira omuntu omusango nga tebannawulira bigambo bye n'okutegeera ky'akoze?

⁵² Ne baddamu ne bamugamba nti Naawe wava Ggaliraaya? Noonya, olabe, nnabbi tava mu Ggaliraaya.

⁵³[Buli muntu n'addayo eka: