Read luganda Ebikolwa By'Abatume 20 Bible Online

Ebikolwa By'Abatume 20 - luganda bible

Ebikolwa By'Abatume 20

¹Akacwano bwe kaamala okukkakkana, Pawulo n'ayita abayigirizwa n'ababuulirira n'abasiibula, n'avaayo okugenda e Makedoni.

²Bwe yayita mu njuyi ziri n'abategeeza ebigambo bingi, n'atuuka e Buyonaani.

³Bwe yamalayo emyezi esatu, era Abayudaaya bwe baamusalira olukwe, bwe yali ng'agenda okuyita mu nnyanja okutuuka e Busuuli, n'alowooza okuddayo mu Makedoni.

⁴ Ne bagenda naye okutuuka mu Asiya Sopateri Omuberoya mutabani wa Puulo; n'Abasessaloniika Alisutaluuko ne Sekundo; ne Gayo Omuderube ne Timoseewo; n'Abasiya Tukiko ne Tulofiimo.

⁵ Bano ne bakulembera ne batulindirira mu Tulowa.

⁶Ffe ne tuva mu Firipi ne tuwanika amatanga oluvannyuma lw'ennaku ez'emigaati egitazimbulukuswa, ne tubatuukako mu Tulowa mu nnaku ttaano; gye twamala ennaku omusanvu.

⁷ Awo ku lunaku olw'olubereberye mu ssabbiiti, bwe twakuŋŋaana okumenya emigaati, Pawulo n'anyumya nabo, ng'ayagala okusitula enkya, n'alwawo mu kwogera okutuusa ettumbi.

⁸Ne wabaawo ettabaaza nnyingi mu kisenge ekya waggulu, mwe twakuŋŋaanira.

⁹Omulenzi erinnya lye Yutuko n'atuula mu ddirisa, n'akwatibwa otulo tungi; awo Pawulo bwe yalwawo ng'akyanyumya, ng'akwatiddwa otulo tungi n'ava mu nju ey'okusatu, n'agwa, n'alondebwa ng'afudde.

¹⁰ Pawulo n'akka n'amugwako n'amuwambaatira n'agamba nti Temukuba biwoobe; obulamu bwe mwebuli munda.

¹¹N'alinnya n'amenya omugaati n'alyako n'alwawo ng'akyanyumya okutuusa enkya, n'alyoka avaayo.

¹²Ne baleeta omulenzi nga mulamu, ne basanyuka si katono.

¹³Naye ffe ne tukulembera okutuuka ku kyombo ne tugenda okutuuka e Aso, nga twagala eyo okusiika Pawulo: kubanga yali alagidde bw'atyo, ng'ayagala ye yennyini okuyita ku lukalu.

¹⁴Bwe yatusanga mu Aso ne tumusiika, ne tujja e Mituleene.

¹⁵Ne tuwanika amatanga okuvaayo ku lunaku olw'okubiri ne tutuuka mu maaso ga Kiyo; ku lw'okusatu ne tugoba ku Samo; ku lw'okuna ne tutuuka mu Mireeto.

¹⁶ Kubanga Pawulo yasiima okuyitira mu Efeso mu kyombo, aleme okulwa mu Asiya; kubanga yali ayanguwa, oba nga kiyinzika okubeera mu Yerusaalemi ku lunaku lwa Pentekoote.

¹⁷Bwe yali mu Mireeto n'atuma mu Efeso n'ayita abakadde b'ekkanisa.

¹⁸ Bwe baatuuka gy'ali n'abagamba nti Mmwe mumanyi okuva ku lunaku olw'olubereberye bwe nnalinnya mu Asiya, bwe nnabanga nammwe mu biro byonna,

¹⁹ nga mpeereza Mukama waffe n'obuwombeefu bwonna n'amaziga n'okukemebwa kwe nnalaba mu nkwe z'Abayudaaya:

²⁰bwe sseekekanga kubabuulira kigambo kyonna ekisaana, n'okubayigiririzanga mu maaso g'abantu ne mu buli nju,

²¹nga ntegeeza Abayudaaya era n'Abayonaani okwenenya eri Katonda n'okukkiriza Mukama waffe Yesu Kristo.

²² Kaakano, laba, bwe nsibiddwa mu mwoyo, ŋŋenda e Yerusaalemi, nga simanyi bye ndiraba eyo,

²³ wabula nga Omwoyo Omutukuvu antegeeza mu buli kibuga ng'agamba nti okusibibwa n'okubonyaabonyezebwa binnindiridde.

²⁴ Naye obulamu bwange sibulowooza nga kintu, nga bwa muwendo gye ndi, ndyoke ntuukirize olugendo lwange n'okuweereza kwe nnaweebwa Mukama waffe Yesu, okutegeezanga enjiri ey'ekisa kya Katonda.

²⁵Kaakano, laba, nze mmanyi nga temukyandaba maaso gange mmwe mwenna be nnayitangamu nga mbuulira obwakabaka.

²⁶ Kyenva mbategeeza leero nti nze ndi mulongoofu olw'omusaayi gwa bonna,

²⁷kubanga sseekekanga kubabuulira kuteesa kwa Katonda kwonna.

²⁸ Mwekuumenga mmwe mwekka n'ekisibo kyonna Omwoyo Omutukuvu mwe yabateeka mmwe okuba abalabirizi, okulundanga ekkanisa ya Katonda gye yeegulira n'omusaayi gwe yennyini.

²⁹ Nze mmanyi nga bwe ndimala okuvaawo emisege emikambwe giriyingira mu mmwe, tegirisaasira kisibo;

³⁰ era mu mmwe mwekka muliva abantu nga boogera ebigambo ebikyamye, okuwalula abayigirizwa ennyuma waabwe.

³¹ Kale mutunule, mujjukire nga saalekanga kulabula n'amaziga buli muntu mu myaka esatu emisana n'ekiro.

³² Era ne kaakano mbasigira Katonda n'ekigambo eky'ekisa kye ekiyinza okuzimba n'okugaba obusika mu abo bonna abatukuzibwa.

³³ Seegombanga ffeeza ya muntu yenna newakubadde zaabu newakubadde ekyambalo.

³⁴ Mmwe mumanyi ng'emikono gino gye gyakolanga bye nneetaaga n'abo abali nange.

³⁵Mbalaze mu byonna bwe kibagwanira okukolanga emirimu bwe mutyo okuyambanga abatalina maanyi, n'okujjukiranga ebigambo bya Mukama waffe Yesu bwe yagamba ye yennyini nti Okugaba kwa mukisa okusinga okutoola.

³⁶ Bwe yayogera bw'atyo n'afukamira n'asabira wamu nabo bonna.

³⁷ Ne bakaaba nnyo bonna, ne bamugwa mu bulago Pawulo ne bamunywegera,

³⁸ nga banakuwala okusinga byonna olw'ekigambo kye yayogera nti tebakyaddayo kumulaba. Ne bamuwerekerako okutuuka ku kyombo.