Read luganda Abaruumi 10 Bible Online

Abaruumi 10 - luganda bible

Abaruumi 10

¹Ab'oluganda, kye njagala mu mutima gwange era kye nsaba Katonda ku lwabwe kye kino, balokoke.

² Kubanga mbategeeza nga balina okunyiikiririra Katonda, naye si mu kutegeera.

³ Kubanga bwe batamanya butuukirivu bwa Katonda, era bwe bagezaako okutereeza obutuukirivu bwabwe bo bennyini, tebagondera butuukirivu bwa Katonda.

⁴ Kubanga Kristo ye nkomerero y'amateeka olw'okuweesa obutuukirivu buli akkiriza.

⁵ Kubanga Musa awandiika obutuukirivu obuva mu mateeka nti abukola ye aliba omulamu mu bwo.

⁶ Naye obutuukirivu obuva mu kukkiriza bwogera bwe buti nti Toyogeranga mu mutima gwo nti Ani alirinnya mu ggulu? (kwe kuleeta Kristo wansi;)

⁷newakubadde nti Ani alikka emagombe? (kwe kulinnyisa Kristo okuva mu bafu.)

⁸ Naye bwogera butya? Nti, Ekigambo kiri kumpi naawe, mu kamwa ko, ne mu mutima gwo: kye kigambo eky'okukkiriza kye tubuulira:

⁹ kubanga bw'oyatula Yesu nga ye Mukama n'akamwa ko, n'okkiriza mu mutima gwo nti Katonda yamuzuukiza mu bafu, olirokoka:

¹⁰kubanga omuntu akkiriza na mutima okuweebwa obutuukirivu, era ayatula na kamwa okulokoka.

¹¹ Kubanga ebyawandiikibwa byogera nti Buli amukkiriza talikwasibwa nsonyi.

¹² Kubanga tewali njawulo ya Muyudaaya na Muyonaani: kubanga omu ye Mukama waabwe bonna, ye mugagga eri abo bonna abamukaabirira:

¹³ kubanga, Buli alikaabirira erinnya lya Mukama alirokoka.

¹⁴Kale balikaabirira batya gwe batannakkiriza? era balikkiriza batya gwe batannawulirako? era baliwulira batya awatali abuulira?

¹⁵ era balibuulira batya nga tebatumiddwa? nga bwe kyawandiikibwa nti Ebigere byabwe nga birungi nnyo ababuulira enjiri ey'ebirungi!

¹⁶ Naye tebaagondera njiri bonna. Kubanga Isaaya ayogera nti Mukama, ani eyakkiriza ekigambo kyaffe?

¹⁷ Kale okukkiriza kuva mu kuwulira, n'okuwulira mu kigambo kya Kristo.

¹⁸ Naye njogera nti Tebawuliranga? Weewaawo, ddala, Eddoboozi lyabyo lyabuna mu nsi zonna, N'ebigambo byabyo okutuuka ku nkomerero z'ensi.

¹⁹ Naye njogera nti Isiraeri tamanyanga? Musa ye yasooka okwogera nti Ndibakwasa obuggya eri abatali ba ggwanga, Eri eggwanga eritalina magezi ndibasunguwaza.

²⁰ Era Isaaya aguma nnyo n'ayogera nti Navumbulibwa abo abatannoonyanga, Nalagibwa eri abo abatambuulirizangako.

²¹ Naye eri Isiraeri ayogera nti Obudde okuziba nagololera emikono gyange abantu abatawulira era abagaana.