Read luganda Abaruumi 9 Bible Online

Abaruumi 9 - luganda bible

Abaruumi 9

¹Njogera amazima mu Kristo, sirimba, omwoyo gwange nga guntegeereza mu Mwoyo Omutukuvu,

²nga nnina ennaku nnyingi n'okulumwa okutamala mu mutima gwange.

³ Kubanga nandyagadde nze mwene okukolimirwa Kristo olwa baganda bange, ab'ekika kyange mu mubiri:

⁴ be Baisiraeri; abaweebwa okufuuka abaana, n'ekitiibwa, n'endagaano, n'okuteekerwa amateeka, n'okuweerezanga Katonda, n'ebyasuubizibwa;

⁵ abalina bajjajja abo, era omwava Kristo mu mubiri, afuga byonna, Katonda atenderezebwa emirembe gyonna. Amiina.

⁶ Naye si kubanga ekigambo kya Katonda kyavaawo. Kubanga abava mu Isiraeri, si be Baisiraeri bonna:

⁷so si kubanga lye zzadde lya Ibulayimu, kyebava babeera abaana bonna: naye, Mu Isaaka ezzadde lyo mwe linaayitirwanga.

⁸Kwe kugamba nti abaana ab'omubiri, abo si be baana ba Katonda; naye abaana b'okusuubiza be babalibwa okuba ezzadde.

⁹ Kubanga ekigambo kino kye ky'okusuubiza, nti Ng'ebiro ebyo bwe biri ndijja, ne Saala aliba n'omwana.

¹⁰ Naye si ekyo kyokka; era naye ne Lebbeeka bwe yalina olubuto olw'omu, Isaaka jjajjaffe

¹¹kubanga nga tebannazaalibwa, so nga tebannakola kirungi oba kibi, okuteesa kwa Katonda mu kulonda kulyoke kunywere, si lwa bikolwa, wabula ku bw'oyo ayita,

¹² n'agambibwa nti Omukulu aliba muddu wa muto.

¹³ Nga bwe kyawandiikibwa nti Yakobo n'amwagala, naye Essawu n'amukyawa.

¹⁴ Kale tunaayogera tutya? Obutali butuukirivu buli eri Katonda? Kitalo.

¹⁵ Kubanga agamba Musa nti Ndisaasira gwe ndisaasira, era ndikwatirwa ekisa gwe ndikwatirwa ekisa.

¹⁶ Kale bwe kityo si ky'oyo ayagala newakubadde addukana, wabula kya Katonda asaasira.

¹⁷ Kubanga ebyawandiikibwa bigamba Falaawo nti Kyennava nkuyimiriza, ndyoke njoleseze amaanyi gange mu ggwe, era erinnya lyange liryoke libuulirwe mu nsi zonna.

¹⁸ Kale bwe kityo asaasira gw'ayagala okusaasira, era akakanyaza gw'ayagala okukakanyaza.

¹⁹Kale onoŋŋamba nti Kiki ekimunenyesa nate? Kubanga ani aziyiza by'ayagala?

²⁰ Naye ekisinga, ggwe omuntu, ggwe ani awakana ne Katonda? Ekibumbe kirigamba eyakibumba nti Kiki ekyakunkoza bw'oti?

²¹ Oba omubumbi talina buyinza ku bbumba, mu kitole kimu okukola ekibya kimu eky'ekitiibwa, n'ekirala eky'ensonyi?

²² Kiki, oba nga Katonda bwe yayagala okulaga obusungu bwe, n'okumanyisa obuyinza bwe, yagumiikiriza n'okulindirira ennyo ebibya eby'obusungu ebyateekerwateekerwa okuzikirira:

²³ alyoke amanyise obugagga obw'ekitiibwa kye ku bibya eby'okusaasirwa, bye yateekerateekera edda ekitiibwa,

²⁴ye ffe, n'okuyita be yayita, si mu Bayudaaya bokka, era naye ne mu b'amawanga?

²⁵ Era nga bw'ayogera mu Koseya nti Ndibayita abantu bange, abatali bantu bange; Era ataayagalwa, ayagaliddwa.

²⁶ Awo mu kifo kye baagambirwamu nti Mmwe temuli bantu bange, Mwe baliyitirwa abaana ba Katonda omulamu.

²⁷ Era Isaaya ayogerera waggulu ebya Isiraeri nti Omuwendo gw'abaana ba Isiraeri oba guliba ng'omusenyu gw'ennyanja, ekitundu ekirisigalawo kye kirirokoka:

²⁸kubanga Mukama alikola ekigambo kye ku nsi, ng'akituukiriza era ng'akisalako.

²⁹ Era nga Isaaya bwe yasooka okwogera nti Singa Mukama Ow'eggye teyatulekerawo zzadde, Twandifuuse nga Sodomu, era twandifaanayizibbwa nga Ggomola.

³⁰ Kale tunaayogera tutya? Nti ab'amawanga, abataagobereranga butuukirivu, baatuuka ku butuukirivu, bwe butuukirivu obuva mu kukkiriza;

³¹ naye Isiraeri, mu kugobereranga amateeka ag'obutuukirivu, teyatuuka ku mateeka gali.

³² Lwa ki? Kubanga tebaabugobereranga nga bayima mu kukkiriza, wabula nga mu bikolwa. Beesittala ku jjinja eryo eryesittalwako:

³³ nga bwe kyawandiikibwa nti Laba, nteeka mu Sayuuni ejjinja eryesittalwako n'olwazi olugwisa: Era akkiriza oyo talikwasibwa nsonyi.