Read luganda 1 Abakkolinso 12 Bible Online

1 Abakkolinso 12 - luganda bible

1 Abakkolinso 12

¹Kale nno, ab'oluganda, eby'ebirabo eby'omwoyo ssaagala mmwe obutabitegeera.

² Mumanyi bwe mwali ab'amawanga nga mwakyamizibwanga eri ebifaananyi ebitoogera, nga mukyamizibwa mu ngeri yonna.

³ Kyenva mbategeeza nga siwali muntu bw'ayogera mu Mwoyo gwa Katonda agamba nti Yesu akolimiddwa; so siwali muntu ayinza okwogera nti Yesu ye Mukama waffe, wabula mu Mwoyo Omutukuvu.

⁴ Naye waliwo enjawulo z'ebirabo, naye Omwoyo ali omu.

⁵ Era waliwo enjawulo z'okuweereza, era Mukama waffe ali omu.

⁶Era waliwo enjawulo z'okukola, naye Katonda ali omu, akola byonna mu bona.

⁷ Naye buli muntu aweebwa okulagibwa kw'Omwoyo olw'okugasa.

⁸Kubanga omulala Omwoyo amuweesa ekigambo eky'amagezi; n'omulala aweebwa ekigambo eky'okutegeera, ku bw'Omwoyo oyo:

⁹omulala okukkiriza, ku bw'Omwoyo oyo; n'omulala ebirabo eby'okuwonyanga, ku bw'Omwoyo omu;

¹⁰ n'omulala okukolanga eby'amagero; n'omulala okubuuliranga; n'omulala okwawulanga emyoyo: omulala engeri z'ennimi; n'omulala okuvvuunuzanga ennimi:

¹¹ naye ebyo byonna Omwoyo oyo omu ye abikola, ng'agabira buli muntu kinnoomu nga ye bw'ayagala.

¹² Kuba omubiri nga bwe guli ogumu ne guba n'ebitundu ebingi, n'ebitundu byonna eby'omubiri, newakubadde nga bingi, gwe mubiri gumu; era ne Kristo bw'atyo.

¹³ Kubanga mu Mwoyo omu fenna twabatizibwa okuyingira mu mubiri gumu, oba Bayudaaya oba Bayonaani, oba baddu oba ba ddembe; fenna ne tunywesebwa mu Mwoyo omu.

¹⁴Kubanga n'omubiri si kitundu kimu, naye bingi.

¹⁵Ekigere bwe kyogera nti Kubanga siri mukono, siri wa ku mubiri; olwekyo tekibeera ekitali kya ku mubiri.

¹⁶Era okutu bwe kwogera nti Kubanga siri liiso, siri wa ku mubiri; olwekyo tekubeera okutali kwa ku mubiri.

¹⁷Omubiri gwonna singa liiso, okuwulira kwandibadde wa? Gwonna singa kuwulira, okuwunyiriza kwandibadde wa?

¹⁸Naye kaakano Katonda yassaawo ebitundu buli kinnakimu mu mubiri, nga bwe yayagala.

¹⁹Era byonna singa kyali kitundu kimu, omubiri gwandibadde wa?

²⁰Naye kaakano ebitundu biri bingi, naye omubiri gumu.

²¹N'eriiso teriyinza kugamba mukono nti Ggwe sikwetaaga: oba nate omutwe okugamba ebigere nti Mmwe sibeetaaga.

²²Naye, ekisinga ennyo, ebitundu bino eby'omubiri ebirowoozebwa okubeera ebinafu byetaagibwa:

²³n'ebyo eby'oku mubiri bye tulowooza obutaba na kitiibwa nnyo bye twambaza ekitiibwa ekisinga obungi: n'ebitundu byaffe ebitali birungi bye bisinga okubeera n'obulungi;

²⁴naye ebirungi byaffe tebyetaaga: naye Katonda yagattira ddala wamu omubiri, ekitundu ekyabulako ng'akiwa ekitiibwa ekisinga obungi;

²⁵walemenga okubeera okwawula mu mubiri; naye ebitundu biyambaganenga bumu byokka na byokka.

²⁶Era ekitundu ekimu bwe kibonaabona, ebitundu byonna bibonerabonera wamu nakyo; oba ekitundu ekimu bwe kigulumizibwa, ebitundu byonna bisanyukira wamu nakyo.

²⁷ Naye mmwe muli mubiri gwa Kristo, n'ebitundu byagwo, buli muntu.

²⁸ Era Katonda yassaawo mu kkanisa abalala, okusooka batume, ab'okubiri bannabbi, ab'okusatu bayigiriza, nate eby'amagero, nate ebirabo eby'okuwonyanga, abayambi, abafuga, aboogezi b'ennimi.

²⁹Bonna batume? bonna bannabbi? bonna bayigiriza? bonna bakola eby'amagero?

³⁰bonna balina ebirabo eby'okuwonyanga? bonna boogera ennimi? bonna baavvuunula?

³¹ Naye mwegombenga ebirabo ebisinga obukulu. Era mbalaga ekkubo erisinga ennyo obulungi.