Read luganda 1 Abakkolinso 16 Bible Online

1 Abakkolinso 16 - luganda bible

1 Abakkolinso 16

¹ Naye okukuŋŋaanyizanga ebintu abatukuvu, nga bwe nnalagira ekkanisa ez'e Ggalatiya, nammwe mukolenga bwe mutyo.

² Ku lunaku olw'olubereberye mu ssabbiiti buli muntu mu mmwe aterekenga ewuwe nga bw'ayambiddwa, ebintu bireme okukuŋŋaanyizibwa lwe ndijja.

³Era bwe ndituuka be mulisiima mu bbaluwa abo be ndituma okutwala ekisa kyammwe mu Yerusaalemi:

⁴era oba nga kirinsaanira nange okugenda, baligenda nange.

⁵ Naye ndijja gye muli bwe ndiba nga mmaze okuyita mu Makedoni; kubanga ndiyita mu Makedoni:

⁶ naye mpozzi ndituula gye muli katono, oba n'okumala ndimalayo biro bya ttoggo byokka, mmwe mulyoke munsibirire gye ndigenda yonna.

⁷ Kubanga ssaagala kubalaba kaakano nga mpita buyisi: kubanga nsuubira okulwayo katono gye muli, Mukama waffe bw'alikkiriza.

⁸ Naye ndirwayo mu Efeso okutuusa ku Pentekoote;

⁹ kubanga oluggi olunene era olw'emirimu emingi lunziguliddwawo, era abalabe bangi.

¹⁰ Naye oba nga Timoseewo alijja, mulabe abeerenga gye muli awatali kutya; kubanga akola omulimu gwa Mukama waffe era nga nze:

¹¹ kale omuntu yenna tamunyoomanga. Naye mumusibirire n'emirembe, ajje gye ndi: kubanga nsuubira okumulaba awamu n'ab'oluganda.

¹² Naye ebya Apolo ow'oluganda, nnamwegayirira nnyo okujja gye muli awamu n'ab'oluganda: n'atayagalira ddala kujja mu kiseera kino; naye alijja bw'alifuna ebbanga.

¹³ Mutunulenga, munywerenga mu kukkiriza, mubeerenga basajja, mubeerenga ba maanyi.

¹⁴Byonna bye mukola bikolebwenga mu kwagala.

¹⁵ Naye mbeegayirira, ab'oluganda (mumanyi ennyumba ya Suteefana, nga gwe mwaka omubereberye ogw'omu Akaya, era nga beeteeseteese okuweereza abatukuvu),

¹⁶ nammwe muwulirenga abali ng'abo, na buli muntu akolera awamu naffe afuba.

¹⁷Era nsanyukira okujja kwa Suteefana ne Folutunaato ne Akayiko: kubanga ebyabula ku lwammwe baabituukiriza.

¹⁸ Kubanga baawummuza omwoyo gwange n'ogwammwe: kale mukkirizenga abali ng'abo.

¹⁹ Ekkanisa ez'omu Asiya zibalamusizza. Akula ne Pulisika babalamusizza nnyo mu Mukama waffe, n'ekkanisa eri mu nnyumba yaabwe.

²⁰ Ab'oluganda bonna babalamusizza. Mulamusagane n'okunywegera okutukuvu.

²¹ Kuno kwe kulamusa kwange Pawulo n'omukono gwange.

²² Omuntu yenna bw'atayagalanga Mukama waffe, akolimirwenga. Mukama waffe ajja.

²³Ekisa kya Mukama waffe Yesu Kristo kibeerenga nammwe.

²⁴Okwagala kwange kubeerenga nammwe mwenna mu Kristo Yesu. Amiina.