Read luganda 2 Abakkolinso 3 Bible Online

2 Abakkolinso 3 - luganda bible

2 Abakkolinso 3

¹ Tutanula nate okwetendereza fekka? oba twetaaga ebbaluwa ng'abalala, ez'okutendereza eri mmwe, oba eziva gye muli?

² Mmwe muli bbaluwa yaffe, ewandiikiddwa mu mitima gyaffe, abantu bonna gye bategeera, gye basoma;

³ nga mulabisibwa okuba ebbaluwa ya Kristo, ffe gye twamuweererezaamu, etaawandiikibwa na bwino, wabula Omwoyo gwa Katonda omulamu; si ku bipande eby'amayinja, wabula ku bipande gy'emitima egy'omubiri.

⁴Era bwe tutyo bwe twesiga Katonda ku bwa Kristo:

⁵ si kubanga fekka tulina obuyinza, okulowooza ekigambo kyonna ng'ekiva gye tuli; naye obuyinza bwaffe buva eri Katonda;

⁶ era eyatuyinzisa ng'abaweereza b'endagaano empya; si baweereza ba nnukuta, wabula ab'omwoyo: kubanga ennukuta etta, naye omwoyo guleeta obulamu.

⁷ Naye oba nga okuweereza okw'okufa okwali mu nnukuta, okwasalibwa ku mayinja, kwajjira mu kitiibwa, abaana ba Isiraeri n'okuyinza ne batayinza kwekaliriza maaso ga Musa olw'ekitiibwa ky'amaaso ge; ekyali kigenda okuggwaawo:

⁸ okuweereza okw'omwoyo tekulisinga kuba na kitiibwa?

⁹ Kuba oba ng'okuweereza okw'omusango kye kitiibwa, okuweereza okw'obutuukirivu kweyongera nnyo okusukkiriza ekitiibwa.

¹⁰ Kubanga ekyaweebwa ekitiibwa tekyakiweebwa mu kigambo kino, olw'ekitiibwa ekisinga ekyo.

¹¹Kuba oba ng'ekyaggwaawo kyalina ekitiibwa, eky'olubeerera kisinga nnyo okuba n'ekitiibwa.

¹²Kale nga bwe tulina essuubi eryenkana awo, twogera n'obuvumu bungi,

¹³ so si nga Musa eyeebikkanga ku maaso ge, abaana ba Isiraeri balemenga okwekaliriza enkomerero y'ekyo ekyali kiggwaawo:

¹⁴ naye amagezi gaabwe gaakakanyazibwa: kubanga n'okutuusa leero eky'okubikkako kiri kikyaliwo mu kusomebwa kw'endagaano ey'edda nga tekinnaggibwawo; ekyo kivaawo mu Kristo.

¹⁵Naye n'okutuusa leero, ebya Musa bwe bisomebwa, eky'okubikkako kiri ku mutima gwabwe.

¹⁶ Naye bwe gukyukira Mukama waffe, eky'okubikkako kiggibwawo.

¹⁷ Naye Mukama waffe gwe Mwoyo: era awaba Omwoyo gwa Mukama waffe we waba eddembe.

¹⁸ Naye ffe fenna, bwe tumasamasa ng'endabirwamu ekitiibwa kya Mukama waffe amaaso gaffe nga gaggiddwako eky'okubikkako, tufaananyizibwa engeri eri okuva mu kitiibwa okutuuka mu kitiibwa, nga ku bwa Mukama waffe Omwoyo.