Read luganda Abafiripi 2 Bible Online

Abafiripi 2 - luganda bible

Abafiripi 2

¹Kale oba nga waliwo okukubagiza kwonna mu Kristo, oba ng'okusanyusa kwonna okw'okwagala, oba ng'okussa ekimu kwonna okw'Omwoyo, oba ng'okusaasira n'ekisa

²mutuukirize essanyu lyange, mulowoozenga bumu, nga mulina okwagala kumu, omwoyo gumu, nga mulowooza bumu;

³ temukolanga kintu kyonna olw'okuyomba newakubadde olw'ekitiibwa ekitaliimu, wabula mu buwombeefu buli muntu agulumizenga munne okusinga bwe yeegulumiza yekka;

⁴ temutunuuliranga buli muntu ebibye yekka, era naye buli muntu n'eby'abalala.

⁵Mmwe mubeerengamu okulowooza kuli, era okwali mu Kristo Yesu;

⁶ oyo bwe yasooka okubeera mu kifaananyi kya Katonda, teyalowooza kintu ekyegombebwa okwenkanankana ne Katonda,

⁷ naye yeggyako ekitiibwa, bwe yatwala engeri y'omuddu, n'abeera mu kifaananyi ky'abantu;

⁸ era bwe yalabikira mu mutindo ogw'obuntu, ne yeetoowaza, nga muwulize okutuusa okufa, era okufa okw'oku musalaba.

⁹ Era Katonda kyeyava amugulumiza ennyo n'amuwa erinnya liri erisinga amannya gonna;

¹⁰ buli vviivi lifukaamirirenga erinnya lya Yesu, ery'eby'omu ggulu n'eby'oku nsi n'ebya wansi w'ensi,

¹¹era buli lulimi lwatulenga nga Yesu Kristo ye Mukama waffe, Katonda Kitaffe aweebwe ekitiibwa.

¹² Kale, abaagalwa bange, nga bwe mwawuliranga ennaku zonna, si nga nze lwe mbeerawo lwokka, naye kaakano okusinga ennyo nga ssiriiyo, mutuukirizenga obulokozi bwammwe bennyini n'okutya n'okukankana;

¹³ kubanga Katonda yakoza mu mmwe okwagala n'okukola, olw'okusiima kwe okulungi.

¹⁴ Mukolenga byonna awatali kwemulugunyanga n'empaka;

¹⁵ mulemenga okubaako kye munenyezebwa newakubadde ettima, abaana ba Katonda abatalina mabala wakati w'emirembe egyakyama emikakanyavu, gye mulabikiramu ng'ettabaaza z'omu nsi,

¹⁶ nga mwolesa ekigambo eky'obulamu; ndyoke mbeere n'okwenyumiriza ku lunaku lwa Kristo, kubanga ssaddukira bwereere, so ssaafubira bwereere.

¹⁷ Naye newakubadde nga nfukibwa ku ssaddaaka n'okuweereza okw'okukkiriza kwammwe, nsanyuka era nsanyukira wamu nammwe mwenna:

¹⁸ era nammwe bwe mutyo musanyuke era musanyukire wamu nange.

¹⁹Naye nsuubira mu Mukama waffe Yesu, okubatumira amangu Timoseewo, nange ndyoke ngume omwoyo, bwe ndimala okutegeera ebifa gye muli.

²⁰ Kubanga sirina muntu mulala alina emmeeme eyenkana n'ey'oyo, aligenderera ebyammwe mu mazima.

²¹ Kubanga abo bonna beenoonyeza byabwe ku bwabwe, si bya Yesu Kristo.

²²Naye ekimutegeezesa mukimanyi, nga yaweerezanga wamu nange olw'enjiri, ng'omwana eri kitaawe.

²³Kale oyo nsuubira okumutuma amangu, kyokka bwe ndimala okulaba ebifa gye ndi:

²⁴ naye nsuubira mu Mukama waffe nti nange ndijja mangu.

²⁵ Naye nnalaba nga kigwanye okubatumira Epafuloddito muganda wange, era mukozi munnange, era mulwanyi munnange, naye ye mutume wammwe era omuweereza w'ebintu bye nneetaaga;

²⁶kubanga yabalumirwa omwoyo mmwe mwenna, ne yeeraliikirira nnyo, kubanga mwawulira nga yalwala:

²⁷kubanga okulwala yalwala yali kumpi n'okufa: naye Katonda yamusaasira; so si ye yekka, naye era nange, ennaku endala zireme okweyongera ku nnaku ze nnina.

²⁸Kyenva njagala ennyo okumutuma, bwe mulimulaba nate mulyoke musanyuke, nange nkendeeze ku kunakuwala kwange.

²⁹ Kale mu mwanirizanga mu Mukama waffe n'essanyu lyonna; era abafaanana ng'oyo mubassengamu ekitiibwa:

³⁰kubanga yabulako katono afe olw'omulimu gwa Kristo, bwe yasingawo obulamu bwe alyoke atuukirize ekyabulako mu kuweereza kwammwe gye ndi.