Read luganda 1 Abasessaloniika 5 Bible Online

1 Abasessaloniika 5 - luganda bible

1 Abasessaloniika 5

¹ Naye eby'entuuko n'ebiro, ab'oluganda, temwetaaga kubiwandiikirwa.

² Kubanga mwekka mumanyidde ddala ng'olunaku lwa Mukama waffe lujja ng'omubbi ekiro, bwe lutyo.

³ Bwe baliba nga boogera nti Mirembe, siwali kabi, okuzikiriza okw'amangu ne kulyoka kubajjira, ng'okulumwa bwe kujjira omukazi ali olubuto; so tebaliwona n'akatono.

⁴Naye mmwe, ab'oluganda, temuli mu kizikiza, olunaku luli okubasisinkaniriza ng'omubbi:

⁵ kubanga mmwe mwenna muli baana ba kutangaala, era muli baana ba musana: tetuli ba kiro newakubadde ab'ekizikiza;

⁶kale nno tulemenga okwebaka ng'abalala, naye tutunulenga tulemenga okutamiira.

⁷Kubanga abeebaka beebaka kiro; n'abatamiira batamiira kiro.

⁸ Naye ffe, kubanga tuli ba musana, tulemenga okutamiira, nga twambadde eky'omu kifuba eky'okukkiriza n'okwagala, n'enkuufiira, essuubi ly'obulokozi.

⁹ Kubanga ffe Katonda teyatuteekerawo busungu, wabula okuweebwa obulokozi ku bwa Mukama waffe Yesu Kristo,

¹⁰ eyatufiirira ffe, bwe tutunula oba bwe twebaka tulyoke tubeere abalamu wamu naye.

¹¹ Kale musanyusaganenga, era muzimbaganenga buli muntu munne, era nga bwe mukola.

¹² Naye tubeegayirira, ab'oluganda, okumanyanga abafuba okukola emirimu mu mmwe, ababafuga mu Mukama waffe, abababuulirira;

¹³n'okubassangamu ekitiibwa ennyo nnyini mu kwagala olw'omulimu gwabwe. Mubeerenga n'emirembe mu mmwe.

¹⁴ Era tubabuulirira, ab'oluganda, munenyenga abatatambula bulungi, mugumyenga abalina omwoyo omunafu, muyambenga abatalina maanyi, mugumiikirizenga eri bonna.

¹⁵ Mulabe omuntu yenna alemenga okuwalana ekibi olw'ekibi; naye ennaku zonna mugobererenga ekirungi mwekka na mwekka n'eri bonna.

¹⁶ Musanyukenga ennaku zonna;

¹⁷ musabenga obutayosa;

¹⁸ mwebazenga mu kigambo kyonna kyonna: kubanga ekyo Katonda ky'abaagaliza mu Kristo Yesu gye muli.

¹⁹ Temuzikizanga Mwoyo;

²⁰temunyoomanga bunnabbi;

²¹ mugezengako ku bigambo byonna; munywerezenga ddala ekirungi;

²² mwewalenga buli ngeri ya bubi.

²³ Era Katonda ow'emirembe yennyini abatukulize ddala; era omwoyo gwammwe n'obulamu n'omubiri byonna awamu bikuumibwenga awatali kunenyezebwa mu kujja kwa Mukama waffe Yesu Kristo.

²⁴ Abayita mwesigwa, n'okukola ye alikola.

²⁵ Ab'oluganda, mutusabirenga.

²⁶ Mulamuse ab'oluganda bonna n'okunywegera okutukuvu.

²⁷Mbalayiza Mukama waffe okusomera ebbaluwa eno ab'oluganda bonna.

²⁸Ekisa kya Mukama waffe Yesu Kristo kibeerenga wamu nammwe.