Read luganda 2 Abasessaloniika 2 Bible Online

2 Abasessaloniika 2 - luganda bible

2 Abasessaloniika 2

¹ Naye tubeegayirira, ab'oluganda, olw'okujja kwa Mukama waffe Yesu Kristo n'olw'okukuŋŋaana kwaffe gy'ali;

²obutasagaasagana mangu mu magezi gammwe, newakubadde okweraliikirira newakubadde olw'omwoyo, newakubadde olw'ebbaluwa efaanana ng'evudde gye tuli, nti olunaku lwa Mukama waffe lutuuse;

³ omuntu yenna tabalimbanga mu kigambo kyonna kyonna: kubanga olunaku olwo terulijja wabula ng'okwawukana kuli kumaze kubaawo, era omuntu oli ow'okwonoona nga alimala okubikkulwa, omwana w'okuzikirira,

⁴ aziyiza era eyeegulumiza okusinga buli kintu ekiyitibwa Katonda oba ekisinzibwa, n'okutuula n'atuula mu yeekaalu ya Katonda, nga yeeraga yekka nti ye Katonda.

⁵Temujjukira, nga bwe nnali nga nkyali gye muli, nababuulira ebyo?

⁶Era ne kaakano ekirobera mukimanyi, alyoke abikkuke mu ntuuko ze.

⁷ Kubanga ne kaakano ekyama eky'obujeemu weekiri kikola: wabula kyokka aziyiza kaakano okutuusa lw'aliggibwawo.

⁸ Awo omujeemi oli n'alyoka abikkuka, Mukama waffe Yesu gw'alitta n'omukka ogw'omu kamwa ke, era gw'alizikiriza n'okulabisibwa kw'okujja kwe;

⁹ naye okujja kw'oyo kuli mu kukola kwa Setaani n'amaanyi gonna n'obubonero n'eby'amagero eby'obulimba,

¹⁰ n'okukyamya kwonna okutali kwa butuukirivu eri abo ababula; kubanga tebakkiriza kwagala mazima, balyoke balokoke.

¹¹ Katonda kyava abasindikira okukyamya okukola, bakkirize eby'obulimba:

¹²bonna balyoke basalirwe omusango abatakkiriza mazima naye abasanyukira obutali butuukirivu.

¹³ Naye kitugwanidde ffe okwebazanga Katonda ennaku zonna ku lwammwe, ab'oluganda abaagalwa Mukama waffe, kubanga Katonda yabalondera obulokozi okuva ku lubereberye mu kutukuzibwa Omwoyo n'okukkiriza amazima:

¹⁴ bye yabayitira n'enjiri yaffe, olw'okufuna ekitiibwa kya Mukama waffe Yesu Kristo.

¹⁵Kale nno, ab'oluganda, muyimirirenga, era munywezenga bye mwaweebwa ne muyigirizibwa, oba mu kigambo oba mu bbaluwa yaffe.

¹⁶ Naye Mukama waffe Yesu Kristo yennyini, ne Katonda Kitaffe, eyatwagala n'atuwa okusanyusa okutaggwaawo n'essuubi eddungi mu kisa,

¹⁷abasanyuse emitima gyammwe aginywezenga mu buli kikolwa n'ekigambo ekirungi.