Read luganda 2 Abasessaloniika 3 Bible Online

2 Abasessaloniika 3 - luganda bible

2 Abasessaloniika 3

¹ Ebisigaddeyo, ab'oluganda, mutusabirenga ekigambo kya Mukama waffe kiwulukuke, kiweebwenga ekitiibwa, era nga mu mmwe;

²era tulokoke eri abantu abatalina magezi, ababi; kubanga okukkiriza si kwa bonna.

³ Naye Mukama waffe mwesigwa, alibanyweza, anaabakuumanga eri omubi.

⁴ Era twesiga Mukama waffe mu bigambo byammwe, nga mukola bye tulagira era munaabikolanga.

⁵Era Mukama waffe aluŋŋamyenga emitima gyammwe okutuuka mu kwagala kwa Katonda ne mu kugumiikiriza kwa Kristo.

⁶ Era tubalagira, ab'oluganda, mu linnya lya Mukama waffe Yesu Kristo, mweyawulenga eri buli ow'oluganda atatambula bulungi, newakubadde mu mpisa ze baaweebwa ffe.

⁷ Kubanga mmwe mwennyini mumanyi bwe kibagwanira okutugobereranga: kubanga tetwalema kutambula bulungi mu mmwe;

⁸ so tetulyanga mmere ya muntu yenna ya bwereere, naye mu kufuba n'okukoowa twakolanga emirimu ekiro n'emisana obutazitoowerera muntu ku mmwe:

⁹ si kubanga tetulina buyinza, naye tweweeyo gye muli ng'ekyokulabirako mulyoke mutugobererenga.

¹⁰ Kubanga era bwe twali gye muli, twabalagira bwe tutyo nti Omuntu yenna bw'agaananga okukola emirimu, n'okulya talyanga.

¹¹ Kubanga tuwulira nti eriyo abamu abatatambula bulungi mu mmwe nga tebakola mirimu gyabwe n'akatono, wabula egy'abalala.

¹² Abali bwe batyo tubalagira era tubabuulirira mu Mukama waffe Yesu Kristo, okukolanga emirimu n'obuteefu balyoke balyenga emmere yaabwe bo.

¹³ Naye mmwe, ab'oluganda, temukoowanga mu kukola obulungi.

¹⁴ Era omuntu yenna bw'atagonderanga kigambo kyaffe mu bbaluwa eno, oyo mumwetegerezanga, so temwegattanga naye, ensonyi ziryoke zimukwate.

¹⁵ So temumulowoozanga nga mulabe, naye mumubuuliriranga ng'ow'oluganda.

¹⁶ Era Mukama waffe ow'emirembe yennyini abawenga emirembe ennaku zonna mu bigambo byonna. Mukama waffe abeerenga nammwe mwenna.

¹⁷ Kuno kwe kulamusa kwange Pawulo n'omukono gwange, ke kabonero mu bbaluwa yonna: bwe ntyo bwe mpandiika.

¹⁸Ekisa kya Mukama waffe Yesu Kristo kibeerenga nammwe mwenna.