Read luganda 1 Timoseewo 5 Bible Online

1 Timoseewo 5 - luganda bible

1 Timoseewo 5

¹ Tonenyanga mukadde, naye omubuuliriranga nga kitaawo; abavubuka ng'ab'oluganda:

²abakazi abakadde nga nnyoko; abato nga bannyoko mu bulongoofu bwonna.

³Obawenga ekitiibwa bannamwandu ababa bannamwandu ddala.

⁴Naye nnamwandu yenna bw'aba n'abaana oba bazzukulu, basookenga okuyiga okwegendereza eri ab'omu nnyumba zaabwe, n'okusasula bakadde baabwe: kubanga ekyo kye kikkirizibwa mu maaso ga Katonda.

⁵ Naye abeera nnamwandu ddala n'alekebwa yekka, asuubira Katonda, n'anyiikiranga okusaba n'okwegayiriranga emisana n'ekiro.

⁶Naye oyo awoomerwa ebinyumu ng'afudde newakubadde ng'akyali mulamu.

⁷Era n'ebyo obalagire, balemenga okubaako eky'okunenyezebwa.

⁸Naye omuntu yenna bw'atajjanjaba babe, n'okusinga ab'omu nnyumba ye, nga yeegaanyi okukkiriza, era nga ye mubi okusinga atakkiriza.

⁹Nnamwandu yenna tawandiikibwanga nga tannatuusa myaka nkaaga, eyafumbirwa omusajja omu,

¹⁰ asiimibwa mu bikolwa ebirungi; oba nga yaleranga abaana, oba nga yayanirizanga abagenyi, oba nga yanaazanga abatukuvu ebigere, oba nga yabeeranga ababonaabona, oba nga yagobereranga nnyo buli kikolwa ekirungi.

¹¹Naye bannamwandu abakyali abato obagaanenga: kubanga bwe balikabawala eri Kristo, nga baagala okufumbirwa;

¹²nga bazza omusango kubanga basuula okukkiriza kwabwe okw'olubereberye.

¹³ Era ate bayiga okubeeranga abagayaavu, nga baatambulatambula okubuna amayumba; naye tebagayaala bugayaazi, era naye balina olugambo n'akajanja, nga boogera ebitasaana.

¹⁴ Kyenva njagala abakyali abato bafumbirwenga, bazaalenga abaana, bafugenga ennyumba, balemenga okuwa omulabe ebbanga w'ayima okuvuma:

¹⁵kubanga waliwo kaakano abaakyuka okugoberera Setaani

¹⁶Omukazi yenna akkiriza bw'abanga ne bannamwandu, abayambenga, era ekkanisa eremenga okuzitoowererwa, eryoke eyambenga bannamwandu ddala ddala.

¹⁷ Abakadde abafuga obulungi basaanyizibwe okuweebwanga ekitiibwa emirundi ebiri, okusinga abafuba mu kigambo n'okuyigiriza.

¹⁸ Kubanga ekyawandiikibwa kyogera nti tosibanga mumwa gwa nte ewuula eŋŋaano. Era nti akola emirimu asaanira empeera ye.

¹⁹ Tokkirizanga kiroope ku mukadde awatali bajulirwa babiri oba basatu.

²⁰ Aboonoona obanenyezanga mu maaso g'abantu bonna, era n'abalala balyoke batyenga.

²¹ Nkukuutirira mu maaso ga Katonda, ne Kristo Yesu, ne bamalayika abalonde, weekuumenga ebyo awatali kusaliriza, nga tokola kigambo olw'obuganzi.

²² Toyanguyirizanga kussaako mikono ku muntu yenna, so tossanga kimu na bibi by'abantu abalala: weekuume obeerenga mulongoofu.

²³Tonywanga mazzi gokka, naye onywanga ne ku mwenge katono olw'olubuto lwo n'olw'okulwalalwala.

²⁴Waliwo abantu ebibi byabwe biba mu lwatu; nga bibakulembera okugenda mu musango; era n'abalala bibavaako nnyumba.

²⁵Era bwe kityo n'ebikolwa ebirungi biba mu lwatu; ne bwe kitaba bwe kityo tebirirema kwolesebwa.