Read luganda 2 Timoseewo 4 Bible Online

2 Timoseewo 4 - luganda bible

2 Timoseewo 4

¹ Nkukuutirira mu maaso ga Katonda ne Kristo Yesu, alisalira omusango abalamu n'abafu, era n'olw'okulabika kwe n'obwakabaka bwe;

² buuliranga ekigambo; kubiririzanga mu bbanga erisaaniramu n'eritasaaniramu; weranga, nenyanga, buuliriranga n'okugumiikiriza kwonna n'okuyigiriza.

³ Kubanga ebiro birijja lwe batalikkiriza kuwulira kuyigiriza kwa bulamu; naye, amatu nga gabasiiwa balikuŋŋaanya abayigiriza ng'okwegomba kwabwe bo bwe kuli;

⁴ baliziba amatu okulekanga amazima, balikyama okugobereranga enfumo obufumo.

⁵ Naye ggwe tamiirukukanga mu byonna, bonaabonanga, kolanga omulimu ogw'omubuulizi w'enjiri, tuukirizanga okuweereza kwo.

⁶ Kubanga nze kaakano nfukibwa, n'ebiro eby'okuteebwa kwange bituuse.

⁷Nnwanye okulwana okulungi, olugendo ndutuusizza, okukkiriza nkukuumye:

⁸ ekisigaddeyo, enterekeddwa engule ey'obutuukirivu, Mukama waffe gy'alimpeera ku lunaku luli, asala emisango egy'ensonga: so si nze nzekka, naye era ne bonna abaagala okulabika kwe.

⁹ Fuba okujja gye ndi mangu:

¹⁰ kubanga Dema yandekawo, ng'ayagala emirembe egya kaakano, n'agenda e Ssessaloniika; Kulesuke e Ggalatiya, Tito e Dalumatiya.

¹¹ Lukka ye ali awamu nange yekka. Twala Makko, omuleete wamu naawe; kubanga angasa olw'okuweereza.

¹² Naye Tukiko nnamutuma mu Efeso.

¹³Ekyambalo kye nnaleka mu Tulowa ewa Kappo, bw'oliba ng'ojja, kireete, n'ebitabo, naye, okusinga, biri eby'amaliba.

¹⁴ Alegezanda omuweesi w'ebikomo yankola obubi bungi: Mukama waffe alimusasula ng'ebikolwa bye bwe byali:

¹⁵oyo naawe omwekuumanga; kubanga yaziyiza nnyo ebigambo byaffe.

¹⁶ Mu kuwoza kwange okw'olubereberye siwali eyannyamba, naye bonna banjabulira: nsaba baleme okukibalirwa.

¹⁷ Naye Mukama waffe yayimirira kumpi nange, n'ampa amaanyi; nze ndyoke ntuukirize kye mbuulira, era ab'amawanga bonna balyoke bawulire: ne ndokoka mu kamwa k'empologoma.

¹⁸Mukama waffe anandokolanga mu buli kikolwa ekibi, era anankuumanga okutuusa ku bwakabaka bwe obw'omu ggulu: aweebwenga ekitiibwa emirembe n'emirembe Amiina.

¹⁹ Lamusa Pulisika ne Akula, n'ennyumba ya Onesifolo.

²⁰ Erasuto yabeera mu Kkolinso: naye Tulofiimo nnamuleka mu Mireeto ng'alwadde.

²¹Fuba okujja ebiro by'empewo nga tebinnatuuka. Ewubulo akulamusizza, ne Pudente, ne Lino, ne Kulawudiya, n'ab'oluganda bonna.

²²Mukama waffe abeerenga n'omwoyo gwo. Ekisa kibeerenga nammwe.