Read luganda Firemooni 1 Bible Online

Firemooni 1 - luganda bible

Firemooni 1

¹ Pawulo, omusibe wa Kristo Yesu ne Timoseewo ow'oluganda, eri Firemooni omwagalwa era mukozi munnaffe,

² ne Apofiya ow'oluganda ne Alukipo mulwanyi munnaffe, n'ekkanisa eri mu nnyumba yo:

³ ekisa n'emirembe ebiva eri Katonda Kitaffe ne Mukama waffe Yesu Kristo bibeerenga gye muli.

⁴Nneebaza Katonda wange ennaku zonna, nga nkwogerako mu kusaba kwange,

⁵bwe nnawulira okwagala kwo n'okukkiriza kw'olina eri Mukama waffe Yesu n'eri abatukuvu bonna;

⁶ okussa ekimu okw'okukkiriza kwo kulyoke kukolenga omulimu, mu kutegeerera ddala buli kigambo ekirungi ekiri mu mmwe, olwa Kristo.

⁷ Kubanga nnajaguza nnyo ne nsanyuka olw'okwagala kwo, kubanga emyoyo gy'abatukuvu wagiwummuza, ow'oluganda.

⁸Kale, newakubadde nga nnina obuvumu bwonna mu Kristo okukulagira ekisaana,

⁹naye olw'okwagala nkwegayirira bwegayirizi, kuba nfaanana nga bwe ndi, Pawulo omukadde, era kaakano omusibe wa Kristo Yesu:

¹⁰ nkwegayirira olw'omwana wange, gwe nnazaalira mu busibe bwange, Onnessimo,

¹¹ataakugasanga edda, naye kaakano atugasa ggwe nange:

¹²gwe nkomyawo gy'oli yennyini, ye gwe mwoyo gwange:

¹³ nze gwe mbadde njagala okubeera naye gye ndi, alyoke ampeerezenga mu kifo kyo mu busibe bw'enjiri:

¹⁴ naye ssaayagala kukola kigambo nga toteesezza, obulungi bwo buleme okubeera mu kuwalirizibwa, wabula mu kwagala.

¹⁵Kubanga mpozzi kyeyava ayawukana naawe ekiseera, olyoke obeerenga naye emirembe n'emirembe;

¹⁶ nga takyali muddu nate, naye okusinga omuddu, ow'oluganda omwagalwa, okusinga ennyo gye ndi, naye okusingira ddala eri ggwe mu mubiri era ne mu Mukama waffe.

¹⁷Kale oba ng'ondowooza nze okubeera munno, musembeze oyo nga nze.

¹⁸Naye oba nga yakwonoona oba abanjibwa, mbalira nze ekyo;

¹⁹ nze Pawulo mpandiise n'omukono gwange, nze ndisasula: nneme okukugamba nga nkubanja era naawe wekka nate.

²⁰Kale, ow'oluganda, onsanyuse mu Mukama waffe: owummuze omwoyo gwange mu Kristo.

²¹Nkuwandiikidde nga nneesiga obugonvu bwo, nga mmanyi ng'olikola era okusinga bye njogera.

²² Naye era nate onnongoosereze aw'okusula: kubanga nsuubira olw'okusaba kwammwe muliweebwa okundaba.

²³ Epafula musibe munnange mu Kristo Yesu, akulamusizza;

²⁴ ne Makko, Alisutaluuko, Dema, Lukka, bakozi bannange.

²⁵Ekisa kya Mukama waffe Yesu Kristo kibeerenga n'omwoyo gwammwe. Amiina.