Read luganda Abaebbulaniya 10 Bible Online

Abaebbulaniya 10 - luganda bible

Abaebbulaniya 10

¹ Kubanga amateeka bwe galina ekisiikirize eky'ebirungi ebyali bigenda okujja, so si kifaananyi kyennyini eky'ebigambo, ne ssaddaaka ezitajjulukuka, ze bawaayo obutayosa buli mwaka buli mwaka, tebayinza ennaku zonna kutuukiriza abo abazisemberera.

²Kubanga tezandirekeddwayo kuweebwayo? kubanga abasinza bwe bamala okunaazibwa ddala omulundi ogumu, tebandibadde na kwetegeerako bibi nate.

³ Naye mu ezo mulimu okujjukizanga ebibi buli mwaka buli mwaka.

⁴Kubanga tekiyinzika omusaayi gw'ente ennume n'embuzi okuggyako ebibi.

⁵ Ng'ajja mu nsi, kyava ayogera nti Ssaddaaka n'ebiweebwayo tewabyagala, Naye wanteekerateekera omubiri;

⁶Tewasiima ebyokebwa ebiramba n'ebiweebwayo olw'ebibi;

⁷Ne ndyoka njogera nti Laba, nzize (Mu muzingo gw'ekitabo ekyampandiikwako) Okukola by'oyagala, ai Katonda.

⁸Bw'ayogera waggulu nti Ssaddaaka n'ebiweebwayo n'ebyokebwa ebiramba n'ebiweebwayo olw'ebibi tewabyagala so tewabisiima (ebyo bye biweebwayo ng'amateeka bwe gali),

⁹n'alyoka ayogera nti Laba, nzize okukola by'oyagala. Aggyawo eky'olubereberye, alyoke anyweze eky'okubiri.

¹⁰ Mu ebyo by'ayagala twatukuzibwa olw'okuwaayo omubiri gwa Yesu Kristo omulundi ogumu.

¹¹ Na buli kabona ayimirira buli lunaku ng'aweereza ng'awaayo emirundi emingi ssaddaaka ezitajjulukuka, ezitayinza kuggyako bibi emirembe gyonna:

¹²naye oyo bwe yamala okuwaayo ssaddaaka emu olw'ebibi okutuusa emirembe gyonna, n'alyoka atuula ku mukono ogwa ddyo ogwa Katonda;

¹³ ng'alindirira oluvannyuma abalabe be okufuusibwa entebe ey'ebigere bye.

¹⁴Kubanga olw'okuwaayo ssaddaaka emu yatuukiriza okutuusa emirembe gyonna abatukuzibwa.

¹⁵Era n'Omwoyo Omutukuvu ye mujulirwa gye tuli: kubanga bw'amala okwogera nti

¹⁶Eno ye ndagaano gye ndiragaana nabo Oluvannyuma lw'ennaku ziri, bw'ayogera Mukama; Nditeeka amateeka gange ku mutima gwabwe, Era ne ku magezi gaabwe ndigawandiika; n'alyoka ayogera nti

¹⁷ N'ebibi byabwe n'obujeemu bwabwe siribijjukira nate.

¹⁸Naye awali okuggibwako ebyo, tewakyali kuwangayo ssaddaaka olw'ekibi.

¹⁹ Kale ab'oluganda, bwe tulina obugumu okuyingira mu kifo ekitukuvu olw'omusaayi gwa Yesu,

²⁰ mu kkubo lye yatukubira, eriggya eddamu, eriyita mu ggigi, gwe mubiri gwe;

²¹ era bwe tulina kabona omunene afuga ennyumba ya Katonda;

²² tusemberenga n'omwoyo ogw'amazima olw'okukkiriza okutuukiridde, emitima gyaffe nga gimansirwako okuggyamu omwoyo omubi, n'emibiri gyaffe nga ginaazibwa n'amazzi amalungi:

²³ tunyweze okwatulanga essuubi lyaffe obutasagaasagana; kubanga eyasuubiza mwesigwa:

²⁴ era tulowoozaganenga fekka na fekka okukubirizanga okwagala n'ebikolwa ebirungi;

²⁵ obutalekanga kukuŋŋaana wamu, ng'abalala bwe bayisa, naye nga tubuulirira; era nga tweyongeranga okukola ebyo bwe tutyo, nga bwe mulaba olunaku luli nga lunaatera okutuuka.

²⁶ Kuba bwe tugenderera okwonoona nga tumaze okuweebwa okutegeera amazima, tewasigaddeeyo nate ssaddaaka olw'ebibi,

²⁷wabula okulindirira n'obuti omusango, n'obukambwe obw'omuliro ogugenda okwokya abalabe.

²⁸Anyooma amateeka ga Musa afa awatali kusaasirwa olw'abajulirwa ababiri oba basatu:

²⁹ mulowooza mutya, okubonerezebwa oyo kw'alisaanyizibwa kulyenkana wa okusinga okuba okubi eyalinnyiririra ddala Omwana wa Katonda, n'alowooza omusaayi gw'endagaano ogwamutukuza obutaba mutukuvu, n'agirira ekyejo Omwoyo ow'ekisa?

³⁰ Kubanga tumumanyi oyo eyayogera nti Eggwanga lyange, nze ndiwalana. Era nate nti Mukama alisalira omusango abantu be.

³¹ Kigambo kya ntiisa okugwa mu mikono gya Katonda omulamu.

³² Naye mujjukire ennaku ez'edda, bwe mwamala okwakirwa, ze mwagumiikiririzaamu okufuba okunene okw'ebibonoobono;

³³ olulala bwe mwafuuka ekyerolerwa olw'ebivume n'okulaba ennaku; olulala, bwe mwassa ekimu n'abo abaakolerwa ebyo.

³⁴ Kubanga mwasaasira abasibe, era mwagumiikiriza n'essanyu okunyagibwako ebintu byammwe, nga mutegeera nga mulina mwekka ebintu ebisinga obulungi era eby'olubeerera.

³⁵ Kale temusuulanga bugumu bwammwe, obuliko empeera ennene.

³⁶ Kubanga mwetaaga okugumiikiriza, bwe mulimala okukola Katonda by'ayagala mulyoke muweebwe ekyasuubizibwa.

³⁷ Kubanga wakyasigaddeyo akaseera katono nnyo, Ajja alituuka, so talirwa.

³⁸ Naye omutuukirivu wange aliba mulamu lwa kukkiriza: Era bw'addayo ennyuma, emmeeme yange temusanyukira.

³⁹Naye ffe tetuli ba kudda nnyuma mu kuzikirira, naye tuli ba kukkiriza olw'okulokola obulamu.