Read luganda Yakobo 1 Bible Online

Yakobo 1 - luganda bible

Yakobo 1

¹ Yakobo, omuddu wa Katonda ne Mukama waffe Yesu Kristo, eri ebika ekkumi n'ebibiri ebyasaasaana, mbalamusizza.

² Mulowoozenga byonna okuba essanyu, baganda bange, bwe munaagwanga mu kukemebwa okutali kumu;

³ nga mutegeera ng'okugezebwa kw'okukkiriza kwammwe kuleeta okugumiikiriza.

⁴Era omulimu gw'okugumiikiriza gutuukirirenga, mulyoke mubeere abaatuukirira, abalina byonna, abataweebuuka mu kigambo kyonna.

⁵ Naye oba ng'omuntu yenna ku mmwe aweebuuka mu magezi, asabenga Katonda atamma awa bonna so takayuka; era galimuweebwa.

⁶ Naye asabenga mu kukkiriza, nga taliiko ky'abuusabuusa: kubanga abuusabuusa afaanana ng'ejjengo ery'ennyanja eritwalibwa empewo ne lisuukundibwa.

⁷Kubanga omuntu oyo talowoozanga ng'aliweebwa ekintu kyonna eri Mukama waffe;

⁸omuntu ow'emyoyo ebiri, atanywera mu makubo ge gonna.

⁹ Naye ow'oluganda omukopi yeenyumirizenga olw'obukulu bwe:

¹⁰ era n'omugagga yeenyumirizenga olw'okukopawala kwe: kubanga aliggwaawo ng'ekimuli ky'omuddo.

¹¹ Kubanga enjuba evaayo n'omusana omungi n'ewotosa omuddo; n'ekimuli kyagwo ne kigwa n'obulungi bw'ekifaananyi kyagwo ne bubula: era n'omugagga bw'atyo bw'aliwotoka mu kutambula kwe.

¹² Alina omukisa omuntu agumiikiriza okukemebwa: kubanga bw'alimala okusiimibwa aliweebwa engule ey'obulamu, Mukama waffe gye yasuubiza abamwagala.

¹³Omuntu yenna bw'akemebwanga, tayogeranga nti Katonda ye ankema: kubanga Katonda takemeka na bubi, era ye yennyini takema muntu yenna:

¹⁴ naye buli muntu akemebwa, ng'awalulwa okwegomba kwe ye n'asendebwasendebwa.

¹⁵Okwegomba okwo ne kulyoka kuba olubuto ne kuzaala okwonoona: n'okwonoona okwo, bwe kumala okukula, ne kuzaala okufa.

¹⁶Temwerimbalimbanga, baganda bange abaagalwa.

¹⁷ Buli kirabo kirungi, na buli kitone kituukirivu kiva waggulu, nga kikka okuva eri Kitaffe ow'ebyaka, atayinza kuba na kufuukafuuka newakubadde ekisiikirize eky'okukyuka.

¹⁸ Olw'okuteesa kwe yatuzaala n'ekigambo eky'amazima, tulyoke tubeere ng'omwaka omubereberye ogw'ebitonde bye.

¹⁹ Ekyo mukimanyi, baganda bange abaagalwa. Naye buli muntu abeerenga mwangu wa kuwulira, alwengawo okwogera, alwengawo okusunguwala:

²⁰ kubanga obusungu bw'omuntu tebukola butuukirivu bwa Katonda.

²¹ Kale muteekenga wala obugwagwa bwonna n'obubi obusukkiridde, mutoolenga n'obuwombeefu ekigambo ekisigibwa ekiyinza okulokola obulamu bwammwe.

²² Naye mubeerenga bakozi ba kigambo, so si bawulizi buwulizi, nga mwerimbalimba.

²³Kubanga omuntu yenna bw'aba omuwulizi w'ekigambo, so nga si mukozi, oyo afaanana ng'omuntu eyeeraba amaaso ag'obuzaaliranwa bwe mu ndabirwamu:

²⁴kubanga yeeraba n'agenda, amangu ago ne yeerabira bw'afaananye.

²⁵ Naye atunula mu mateeka amatuukirivu ag'eddembe n'anyiikiriramu, nga si muwulizi eyeerabira naye mukozi akola, oyo anaaweebwanga omukisa mu kukola kwe.

²⁶ Omuntu yenna bwe yeerowooza nga wa ddiini, bw'ataziyiza lulimi lwe, naye nga yeerimba omutima gwe, eddiini y'oyo teriiko kyegasa.

²⁷Eddiini ennongoofu eteriimu kko mu maaso ga Katonda Kitaffe ye eno, okulambulanga abafuuzi ne bannamwandu mu bunaku bwabwe, n'okwekuumanga obutaba na mabala ag'omu nsi.