Read luganda Okubikkulirwa 16 Bible Online

Okubikkulirwa 16 - luganda bible

Okubikkulirwa 16

¹ Ne mpulira eddoboozi eddene eriva mu yeekaalu, nga ligamba bamalayika omusanvu nti Mugende, mufuke ebibya omusanvu eby'obusungu bwa Katonda ku nsi.

² Ow'olubereberye n'agenda, n'afuka ekibya kye ku nsi; ne wabaawo ebbwa ebbi ezzibu ku bantu abalina enkovu y'ensolo, era abasinza ekifaananyi kyayo.

³ Ow'okubiri n'afuka ekibya kye mu nnyanja; ne wabaawo omusaayi ng'ogw'omufu, na buli mwoyo omulamu ne gufa, n'ebyo ebyali mu nnyanja.

⁴ Ow'okusatu n'afuka ekibya kye mu migga ne mu nsulo z'amazzi, ne wabaawo omusaayi.

⁵ Ne mpulira malayika w'amazzi ng'ayogera nti Ggwe mutuukirivu, ggwe abaawo era eyabaawo, ggwe Mutukuvu, kubanga wasala omusango bw'otyo:

⁶ kubanga baafuka omusaayi gw'abatukuvu n'ogwa bannabbi, omusaayi ggwe gw'obawadde okunywa: basaanidde.

⁷ Ne mpulira ekyoto nga kyogera nti Weewaawo, Mukama Katonda, Omuyinza w'ebintu byonna, gya mazima era gya nsonga emisango gyo.

⁸Ow'okuna n'afuka ekibya kye ku njuba; n'eweebwa okwokya abantu n'omuliro.

⁹ Abantu ne bookebwa okwokya okunene: ne bavuma erinnya lya Katonda alina amaanyi ku bibonyoobonyo ebyo; ne bateenenya okumuwa ekitiibwa.

¹⁰ Ow'okutaano n'afuka ekibya kye ku ntebe y'obwakabaka ey'ensolo; obwakabaka bwayo ne buzikizibwa: ne beeruma ennimi zaabwe olw'obulumi,

¹¹ne bavuma Katonda ow'omu ggulu olw'obulumi bwabwe n'olw'amabwa gaabwe, so tebeenenya mu bikolwa byabwe.

¹²Ow'omukaaga n'afuka ekibya kye ku mugga omunene Fulaati; n'amazzi gaagwo ne gakalira, ekkubo lya bakabaka abava ebuvanjuba liryoke liteekebweteekebwe.

¹³ Ne ndaba nga giva mu kamwa k'ogusota, ne mu kamwa k'ensolo, ne mu kamwa ka nnabbi w'obulimba, emizimu emibi esatu, nga giri ng'ebikere:

¹⁴ kubanga gye mizimu gya balubaale, egikola obubonero; egigenda eri bakabaka b'ensi zonna, okubakuŋŋaanya eri olutalo olw'oku lunaku olukulu olwa Katonda, Omuyinza w'ebintu byonna.

¹⁵ (Laba, njija ng'omubbi. Aweereddwa omukisa atunula, n'akuuma ebyambalo bye, aleme okugenda obwereere, era baleme okulaba ensonyi ze.)

¹⁶ Ne gibakuŋŋaanyiza mu kifo ekiyitibwa mu Lwebbulaniya Kalu-Magedoni.

¹⁷ Ow'omusanvu n'afuka ekibya kye ku bbanga; eddoboozi eddene ne liva mu yeekaalu, mu ntebe y'obwakabaka, nga lyogera nti Kikoleddwa:

¹⁸ ne wabaawo okumyansa n'amaloboozi n'okubwatuka; ne wabaawo ekikankano ekinene, nga tekibangawo kasookedde abantu baba ku nsi, ekikankano ekinene, ekikulu bwe kityo.

¹⁹ N'ekibuga ekinene ne kyawukanamu ebitundu bisatu, n'ebibuga eby'amawanga ne bigwa: ne Babulooni ekinene ne kijjukirwa mu maaso ga Katonda, okukiwa okunywa ekikompe eky'obukambwe bw'obusungu bwe.

²⁰ Na buli kizinga ne kidduka, so n'ensozi tezaalabika.

²¹ N'omuzira omunene, buli mpeke ng'obuzito obwa ttalanta, ne gukka okuva mu ggulu ku bantu: n'abantu ne bavvoola Katonda olw'ekibonyoobonyo eky'omuzira; kubanga ekibonyoobonyo kyagwo kinene nnyo.