Read lugbara E’doza 1 Bible Online

E’doza 1 - lugbara bible

E’doza 1

¹Okokele Mungu ’ba ’bu pi nyaku be.

²Mungu ’ba ’bu pi nyaku be. Nyaku nde ovu pirini, afa alenia yo, angu biza ovu yi aliru ma dria; te Orindi Munguni ri yi nde ma dria ’dani.

³Mungu ’yo ra, Diza ma ovu indi; diza nga di di ani.

⁴Mungu ndre diza nde ovu onyiru; Mungu nga di diza nde ma esele co angu biza be ndu ndu.

⁵Mungu nga diza ma ru ’da Etu’i, nga angu biza ma ru ’da Ini’i. Te ondre indi, o’biti indi, o’du alu.

⁶Mungu ’yo ra, Afa ajaza ma ovu yi nde ma eselia agadua, ma awa yi pi ma esele yi azini be ndu ndu.

⁷Mungu nga di afa ajaza nderi ede ra, nga yi afa ajaza nde ma etiari pi ma esele co yi afa ajaza ma drilia ururi be ndu ndu. Te eri nga i ’ye ’dini.

⁸Mungu nga afa ajaza nderi ma ru ’da ’Bu’i. Te ondre indi, o’biti indi, o’du iriri.

⁹Mungu ’yo ra, Yi ’bu ma etiari ma oku yi pari alua, angu a’wiru ma e’da i beni. Eri nga i ’ye ’dini.

¹⁰Mungu nga di angu a’wiru ma ru ’da Nyaku’i, ’da vini yi te yi okupi tualuri ma ru Miri’i. Te Mungu ndre eri ovu onyiru.

¹¹Mungu ’yo ra, Nyaku ma idu ase, afa idiza ori ’yapi ’diyi pie, pati efi kapi suruti vusi orini ovuzu alenia ’diyi pie dria, nyaku ma dria. Eri nga i ’ye ’dini.

¹²Nyaku nga di ase idu ra, afa idiza ori ’yapi suruti vusi ’diyi pie, pati efi kapi orini ovuzu alenia ’diyi pie, suruti yini vusi. Te Mungu ndre eri ovu onyiru.

¹³Ondre indi, o’biti indi, o’du nari.

¹⁴Mungu ’yo ra, Diza ndu ndu ma ovu afa ajaza ’buari ma alia ci, etu pi ma esele cozu ini be ra; yi ma ovu ecetaru, ewu pi ecezu o’du pie, eli pie,

¹⁵yi ma ovu dizaru afa ajaza ’buari ma alia, diza fezu nyaku ma dria. Te eri nga i ’ye ’dini.

¹⁶Mungu nga di diza ambo ambo ede iri, diza amboruri dri cezu opiru etu ma drilia, diza wereri dri cezu opiru ini ma drilia; eri ede vini ’bi’bio indi.

¹⁷Mungu nga yi ’ba afa ajaza ’buari ma alia diza fezu nyaku ma dria,

¹⁸dri cezu opiru etu pi ma drilia ini be indi, diza pi ma esele cozu angu biza be ndu ndu. Te Mungu ndre eri ovu onyiru.

¹⁹Ondre indi, o’biti indi, o’du suri.

²⁰Mungu ’yo ra, Yi mirini ma ezu afa acipi ovupi idri be ’diyi tre tre, aria ma sa nyaku ma drilia uru afa ajaza ’buari ma angu walaruria.

²¹Te Mungu nga anyapa amboru ovupi yia ’diyi ’ba ra, anyapa dria idri be acipi aci yi ndeni ezule tre ’diyi pie, suruti yini vusi, aria dria opile be ’diyi pie dria suruti yini vusi. Te Mungu ndre eri ovu onyiru.

²²Mungu nga di asi ndriza fe yi dri, kini, Emi ma ti, emi ma ezu tre, emi ma ga yi mirini ma alia tre ani, aria ma ezu tre nyaku ma dria indi.

²³Ondre indi, o’biti indi, o’du towiri.

²⁴Mungu ’yo ra, Nyaku ma ezu anyapa idri be ’diyi tre tre, suruti yini vusi: anyapa akua ’diyi pi, afa acipi aci valesi ’diyi pie, anyapa asea ’diyi pie dria suruti yini vusi. Te eri nga i ’ye ’dini.

²⁵Mungu nga di anyapa asea ’diyi o’ba ra suruti yini vusi, anyapa akua ’diyi pie suruti yini vusi, afa dria acipi aci valesi nyakua ’diyi pie dria suruti yini vusi. Te Mungu ndre eri ovu onyiru.

²⁶Mungu ’yo ra, Ama ma ede ’ba wura amani vusi, e’daza amani vusi indi; yi ma adri opiru e’bi miria ’diyi pi ma drilia, aria ’bua ’diyi pie, anyapa akua ’diyi pie, angu wudrikuru driari pie, afa acipi aci valesi nyaku dria ’diyi pie dria.

²⁷Mungu nga di ’ba ’ba i ma ngulupi ma wura vusi, ada ’ba eri wura Munguniri vusi; o’ba yi agupi pi oku be.

²⁸Mungu nga asi ndriza fe yi dri, Mungu nga ’yo yi tia, Emi ma ti, emi ma ezu kakau, ma ga nyakua tre, nyaku ma ovu di emi ma palaa; emi ma ovu di ani e’bi miria ’diyi pi ma drilia opiru beni, aria ’bua ’diyi pie, afa idriru acipi nyaku ma dria ’diyi pie dria.

²⁹Mungu ’yo ra, Emi ndre, ma fe emi dri afa idiza dria ori ’yapi ovupi nyaku dria ma dria ’diyi pi, pati dria ovupi patiefi ori fepi ’diyi be ’diyi be ’bo; yi nga ovu emi dri nyakaru.

³⁰Ma fe vini ase ibiru nyakaru anyapa dria asea ’diyi pi dri ’bo, aria dria ’bua ’diyi pie, afa dria acipi aci valesi nyaku dria ovupi idri be ’diyi pie dria. Eri nga ovu ’dini.

³¹Te Mungu ndre afa erini o’bale ’diyi dria, te mi ndre, eri onyiru tu. Ondre indi, o’biti indi, o’du aziari.