Read lugbara E’doza 11 Bible Online

E’doza 11 - lugbara bible

E’doza 11

¹Isu de angu wudrikuru dria ma ti ndra alu azini e’yo ’yoza yini ndra alu indio

²Te eri nga eca ’dini, yini aciria muria etuni efurialeru, yi nga angu isu dalakaru Sinaria; yi nga ovu ’daa.

³Yi nga ’yo yi eselia, Ama mu, ama ma ’ba biriki, ama ma eve yi teketeke. Oni paria yi ovu biriki be, afa ebizuri paria yi ovu odri be.

⁴Yi nga ’yo, Ama mu, ama ma si aku amboru pi, jo izuru driniri cazu kpere ’buari be, amani ru kuza isuzu ani, ama kazu ama erezu saaru angu wudrikuru dria ma alia ku.

⁵Te Yehova nga esi va aku pi ondrezu jo izururi be, anzi ’banini sile ’diyi.

⁶Yehova nga ’yo, Mi ndre, yi suru alu, yi dria ma ti ’yoza vini alu; te e’yo ’diri eri e’yo yini e’dole ’yeleri; te curu’do yi ngani afa azini yini lele ’yeleri ku ’yekokoru ku.

⁷Ama mu, ama ma si va, ama ma osa ti ’yoza yini, yi ma va yi agyi ma e’yo ’yoza ku beni.

⁸’Dini Yehova nga yi ere ndu ndu engazu ’darisi angu wudrikuru dria ma dria, yi nga di aku nde ku siko ja ani.

⁹E’yo ’disi ’da di runi Babeli’i, Yehovani ti ’yoza ’ba angu wudrikurua ’diyini osale ’daarisi; te engazu ’dasi Yehova nga yi ere ndu ndu angu wudrikuru dria ma dria.

¹⁰A’bianzi Semini yi ’di. Semi ma eli ka ca turu alu ’bo, eri nga Aripakisadini ti de eli iri aga yi tiza ma vutia ’bo;

¹¹Semi ovu idriru erini Aripakisadini tizu ’bori ma vutia eli turu towi, nga agianzi oti lezoanzi be.

¹²Aripakisadi ma eli ka ca kali na drini towi, eri nga Selani ti;

¹³Aripakisadi ovu idriru erini Selani ’tizu ’bori ma vutia eli turu su drini na, nga agianzi oti ezoanzi be.

¹⁴Sela ma eli ka ca kali na, eri Inga Eberini ti;

¹⁵Sela ovu idriru erini Eberini tizu ’bori ma vutia eli ’turu su drini na, nga agianzi oti ezoanzi be.

¹⁶Eberi ma eli ka ca kali na drini su, eri nga Pelegini ti;

¹⁷Eberi ovu idriru erini Pelegini tizu ’bori ma vutia eli turu su drini kali na, nga agianzi oti ezoanzi be.

¹⁸Pelegi ma eli ka ca kali na, eri nga Reuni ti;

¹⁹Pelegi ovu idriru erini Reuni tizu ’bori ma vutia eli turu iri drini oromi, eri nga agianzi oti ezoanzi be.

²⁰Reu ma eli ka ca kali na drini iri eri nga Serugini ti;

²¹Reu ovu idriru erini Serugini tizu ’bori ma vutia eli turu iri drini aziri, eri nga agianzi oti ezoanzi be.

²²Serugi ma eli ka ca kali na, eri nga Nahorini ti;

²³Serugi ovu idriru erini Nahorini tizu ’bori ma vutia eli turu iri, eri nga agianzi oti ezoanzi be.

²⁴Nahori ma eli ka ca kali iri drini oromi, eri nga Terani ti;

²⁵Nahori ovu idriru erini Terani tizu ’bori ma vutia eli turu alu drini mudri drini oromi, eri nga agianzi oti ezoanzi be.

²⁶Tera ma eli ka ca kali aziri, eri nga Iburamu pi oti, Nahori pie, Harani be.

²⁷A’bianzi Terani yi ’di. Tera ti Iburamu pi, Nahori pie, Harani be; Harani ti Lotini.

²⁸Te Harani dra ati Tera ma ageiasi angu Uri ’ba Kalideyaa ’diyini yini eri osizuria.

²⁹Iburamu pi Nahori be nga oku je yi dri; Iburamu ma oku ma ru Sarai’i, oku Nahorini Milika, Harani Milika pi otipi Isika beri ma zi’i.

³⁰Te Saraini ndra ondoni; mvani yo.

³¹Tera nga mvi erini Iburamu pi ’du ji, Loti Harani mvi mva erini ma nwa pie, Sarai eri ma zia mvi Iburamu ma okururi pie dria, yi fu yi be tualu Uri ’ba Kalideyaa ’diyiniasi, muzu angu Kananinia; yi nga ca Harania, nga ovu ’daa.

³²O’du Terani dria ca eli turu iri drini towi; Tera dra di Harania ’daa.