Read lugbara E’doza 12 Bible Online

E’doza 12 - lugbara bible

E’doza 12

¹Yehova nga ’yo Iburamu ma tia, Mi fu angu miniarisi amve, mi ku ori’ba mini piyi, ’ba mi ati ma joa ’diyi be, mi fi angu mani ngale ecele mi driria.

²Te ma nga mi ofu ovuzu suru amboru, ma nga asi ndriza fe mi dri, ma nga mi ru ’ba amboru, mi ma ovu di asi ndrizaru.

³Ma nga asi ndriza fe ’ba asi ndriza fepi mi driri dri, ma nga ’ba mi tripiri tri ra; ori’ba wudrikurua ’diyi dria nga asi ndriza isu misi.

⁴’Dini Iburamu nga di mu, Yehovani ’yole eri ma tiarile ra; Loti nga mu eri be indi. Iburamu ma eli ca di kali aziri drini towi ’bo, erini ndra engazu Haraniarisi.

⁵Iburamu nga oku erini Sarai pi ’du ji, adripi ma mvi Loti pie, afa dria yini okule ’diyi pie, ’ba yini isule Harania ’daa ’diyi pie; yi nga fu muzu angu Kananinia; yi nga di ca angu Kananinia ra.

⁶Iburamu nga aga angu nde ma eselesi cazu pari Sekemua, kpere kumara Morearia. ’Ba Kananini de ndra angu ndea ’indi.

⁷Yehova nga i e’da Iburamu vu, nga ’yo tinia, Ma nga angu ’diri fe ori mini dri Eri nga ani pari edeta edezuri si dale Yehova i e’dapi i eri driri dri.

⁸Eri nga enga ’dasi, nga fu mu oni Beteli ma kala etuni efurialeruria, nga i ma hema aso ’daa, de Betelini etuni ’derialeru, Aini etuni efurialeru; eri nga pari edeta edezuri si Yehova dri ’daa, nga Yehova ma ru omve.

⁹Te Iburamu aci drile ’dani kala Urulerurialeru.

¹⁰Te liki nga ’de angua ra. Iburamu nga si Misiria ’a’azu ’dale, likini ovule okporu tu anguarisi.

¹¹Eri nga di eca ’dini, erini ’yeria firia Misiria eri nga ’yo oku erini Sarai ma tia ’dini, Mi ndre nga, ma ni ra mi oku e’dapi ndrizaru turi;

¹²eri nga eca ’dini, ’ba Misiria ’diyi ka nga mi ne ra, yi nga ’yo ’dini ’Di bani oku erini; yi nga a fu ra, te yi nga mi ku idriru.

¹³Mi ma ’yo, ma zi mi tia, kini mi ma amvini, e’yo mani ma nga ovu onyiru misi beni, yi ma fu ma e’yo minisi ku beni.

¹⁴Te eri nga ovu ’dini, Iburamuni caria Misiria ’boria, ’ba Misiria ’diyi nga ndre oku nde ovu ndrizaru tu.

¹⁵’Ba opiru Farauni ’diyi nga eri ndre ra, nga e’yo erini olu inzizaru Farau tia. Yi nga di oku nde ’du ofi Farau vile joa ani.

¹⁶Eri nga ani Iburamuni ’ye onyiru eri ma e’yosi; eri ovu kabilo piyi be, ti pie, akanya agoru ’diyi pie, ati’ba pie, ezoanzi ati’boru ’diyi pie, akanya andriru ’diyi pie, ngamia pie dria.

¹⁷Yehova nga Farau pi inza ’ba eri vile joa ’diyi be inzata ambo ambo ’diyisi, Sarai oku Iburamuniri ma e’yosi.

¹⁸Farau nga di Iburamuni omve, nga ’yo tinia, E’yo mini ’yele Ma be ’diri ngoni ya? Mi oluni ma tia kini eri oku mini ku a’disi ya?

¹⁹Mi ’yo, Eri ma amvini, ’dini a’disi ya, mani eri ’duzu oku maniru ani ’dini? Te di curu’do mi ndre, oku miniri ’do, mi ’du di eri, mi mvi eri be geri minia.

²⁰Farau nga e’yo azi ’ba ma tia eri ma e’yosi; yi nga eri ji ku geria, eri’i oku erini pie, afa dria erini ovuzu yi be ’diyi pie dria.