Read lugbara E’doza 15 Bible Online

E’doza 15 - lugbara bible

E’doza 15

¹E’yo ’diyi ma vutia e’yo Yehovani nga eca Iburamu vu afa ndrezasi kini, Mi ru ku, Iburamu: ma gombere mini, orodri mini amboru turi’i indi.

²Iburamu nga ’yo, Te di Opi Yehova la, mi nga afa ngoni fe ma dri, mani ovule mvakokorurisi, azini karimva ngapi afa ma vile joa ’diyi nyapiri eri Eliezeri ’ba, Damasikiari’i ya?

³Iburamu nga’yo, Mi ndre, mi feni nga ori ma dri ku; te mi ndre, ’ba yini osile ma vile joari nga ovu karimva afa mani nyapiriruni.

⁴Te mi ndre, e’yo Yehovani nga eca eri vu kini, Agu ’diri ngani ovu karimva mi afa nyapiniri’i ku; te ’ba ngapi efupi mi ngulupi ma ruaa mini ngale tileniri nga ovu afa mini nyazu karimvaruni.

⁵Eri nga eri ji amve, nga ’yo tinia, Mi ndre ’bua curu’do, mi la ’bi’bio ma kalafe fo, mi ka eco yi ma kalafe lazaru raria. Eri nga ’yo eri ma tia kini, Ori mini ma kalafe nga ovu ’dini.

⁶Eri nga Yehovani a’i ra; eri nga e’yo nde la eri dri e’yo kililiru.

⁷Eri nga ’yo eri tia, Ma Yehova ndra mi ofupi angu Uri ’ba Kalideyaa ’diyinia, angu ’dori fepi mi dri mi ma afaruri’i.

⁸Te eri nga ’yo ra, Te di Opi Yehova la, ma nga ni ma nga eri a’i ma afaruri eceta ngorisi ya?

⁹Eri nga ’yo eri tia, Mi eji mani tikari capi eli be nari pi, ndriandri capi eli be nari pie, kabiloago capi eli be nari pie, a’balau angarioruri pie, a’balau o’bururi be dria.

¹⁰Eri nga afa ’diyi eji dria, nga yi oli ra yi esele asizu iri iri, nga o’ba otizaru, esele alu pi oti yi i agyi be oti oti; te eri asini ariaru ’diyi eselesi ku.

¹¹Aria za nyapi ’diyi nga esi va za ma dria, te Iburamu nga yi odro ra.

¹²Te etuni ’deria, o’du koza ’be di Iburamuni dii; te mi ndre, uri angu biza inicicirurini nga e’de eri ma dria uriuriru tu.

¹³Yehova nga ’yo Iburamu ma tia, Mi ma ni adaru ori mini nga ovu ani’baru angu andinia, nga azi nga ’ba ’dayi dri ati’baru, yi nga yi inza eli turu su;

¹⁴te suru nde yini azi ngazu yi vu ’diyi ma e’yo ma nga li indi, te vutinia yi nga efu afa be kakau.

¹⁵Te mi nga mu a’bipi mini vu asi anzurusi; yi nga mi sa de mi eli be tre.

¹⁶Te a’bianzi su ’diyi bani nga emvi ’doani; ’ba Amorini ’diyi ma e’yo onzini nga ecale tre kurisi.

¹⁷Te eri nga eca ’dini, etu ka ’de ’bo anguni biria, mi ndre, aci acika beri pi alaka aci diza beri be nga aga za asile ’diyi ma eselesi.

¹⁸O’du nde ’dasi Yehova nga aziza azi Iburamu be kini, Ma fe angu ’diri ori mini dri ’bo, engazu yi ara Misiriari vu cazu yi ara amboru Ufirate vu,

¹⁹’ba Kenini piyi, ’ba Kenizini pie, ’ba Kadimonini pie,

²⁰’ba Hitini pie, ’ba Perizini pie, ’ba Refaimuni pie,

²¹’ba Amorini pie, ’ba Kananini pie, ’ba Girigasini pie, ’ba Yebusini pie dria.