Read lugbara E’doza 17 Bible Online

E’doza 17 - lugbara bible

E’doza 17

¹Iburamu ma eli ka ca kali oromi drini oromi, Yehova nga i e’da Iburamu dri, nga ’yo eri ma tia kini, Ma Mungu Okpoe’ini; mi aci

²ma milia ovuzu ezatakokoru. Te ma nga aziza mani azi ama eselia mi be,ma nga fe mi ezu tre tu.

³Iburamu nga i eco o’bukuru va; te Mungu nga e’yo ’yo eri ’be kini,

⁴Te ma’iruni, mi ndre, aziza mani ovu mi be ’bo, mi nga ovu suru o’biru ma ata.

⁵Yi ngani mi ru omve Iburamu’i dika ku, te ru mini nga ovu Iburahimu’i; mani mi ’bale suru o’biru ma ataru ’borisi.

⁶Ma ,nga mi ’ba efi kazu tu; ma nga fe suru ndu ndu ma enga misi, opi ambo ambo ’diyi nga enga mi alia.

⁷Ma nga aziza mani ’ba ama eselia mi be, ori mi vutiari be indi, fezu erini pa sozu kirikiri kpere a’bianzi yini vusi dria, aziza ’dani ’daniriru, mani ovuzu ani Mungu miniru, ori mini mi vutiariniru indi.

⁸Ma nga angu mini ovuzu alenia ani’baruri fe mi dri, ori mini mi vutiari dri indi, ada angu Kananini dria, ovuzu emi ma afaru ’dani ’dani; ma nga ovu Mungu yiniru.

⁹Mungu nga ’yo Iburahimu ma tia, Te mi’iruni, mi ma mba aziza mani ma ta, mi’i ori mini mi vutiari be, a’bianzi yini vusi dria.

¹⁰Aziza mani emini ngale tani mbale ovupi ama eselia mi be, ori mini mi vutiari beri eri ’di: ’ba agupiru dria ma li yi agele ra.

¹¹Emi nga agele emini ma enyi li; eri nga ovu ecetaru aziza ama eselia emi beri ecezu.

¹²Anzi o’du be aro emi eselia ’diyi dria ma li yi agele ra; ’ba agupiru dria a’bianzi emini vusi, ’ba osile emi vile joari pi, ’ba jele suru andini dri silingisi ovupi emi ma oriru kuri pie dria.

¹³’Ba osile mi vile joari pi, ’ba mini jele silingi minisiri be, ma li yi agele ecekokoru; aziza mani nga ovu emi ruaa aziza ’dani’daniru.

¹⁴’Ba agupiru agele liza kokoru, yini eri ma agele ma enyi lile kuri, ma ja agu nde ’dari ma dri engazu suru erini ma aliasi; eri nyo aziza mani ’bo.

¹⁵Mungu nga ’yo Iburahimu ma tia, Te e’yo oku mini Sarainisi, mi ngani eri ma ru omve Sarai ku, te runi ma ovu Sara’i.

¹⁶Ma nga asi ndriza fe eri dri, azini indi ma nga agupimva fe mi dri eri vurisi; ada ma nga asi ndriza fe eri dri, eri nga ovu suru ndu ndu ma andriru; ’ba, opiru suru drilia ’diyi nga enga eri ma alia ra.

¹⁷Iburahimu nga di i eco va o’bukuru, nga gu gu, nga ’yo i ma asia, ’Ba eli be turu aluri nga mva ti ada ya ? Sara ovupi eli be kali oromiri nga mva osi ra ya?

¹⁸Iburahimu nga ’yo Mungu ma tia, Isimaeli ka te eco ovu idriru mi milianini, onyiru tu fo!

¹⁹Te Mungu nga ’yo ra, ’Dini yo, te oku mini Sarani nga mva ti mi drini, mi nga runi ’da Isaka’i. Ma nga aziza mani fe pa sozu eri be kirikiri ovuzu aziza ’dani ’daniru kpere ori erini eri ma vutia ’diyi vu.

²⁰Te e’yo Isimaelinisi, ma eri e’yo mini ’bo; mi ndre, ma fe asi ndriza eri dri ’bo, ma nga fe eri ma ka efi tu, ma nga fe eri ma ezu kakau tu; eri nga opianzi oti mudri drini iri, ma nga fe eri ma ofu suru amboru.

²¹Te ma nga aziza mani fe pa sozu Isaka be kirikiri, Sarani ngale tile mi dri ewu va ’dorile eli vilerisiri.

²²Eri nga ku e’yo ’yoko ja, azini Mungu nga enga Iburahimu vurisi tu ra.

²³Iburahimuni nga mva ini Isimaeli pi ’du, ’ba dria osile i vile joa ’diyi pie, ’ba dria erini jele i ma silingisi ’diyi pie dria, ada ’ba dria agupiru Iburahimu vile joa ’diyi, nga yi ma agele ma enyi li o’du nde alu ’dasi, Munguni ’yole eri ma tia ’borile.

²⁴Iburahimu ma eli ca de di kali oromi drini oromi, yini eri ma agele liria.

²⁵Mvi Isimaelini de eli be mudri drini na yini eri ma agele liria,

²⁶O’du nde ’da ma vusi Iburahimu pi oli yi ma agele mvi Isimaeli be iri tro;

²⁷oli vini yi be tualu ’ba agupiru eri vile joa ’diyi pi ma agele indi, ’ba jele silingisi ’ba suru andini dri ’diyi pie dria.