Read lugbara E’doza 21 Bible Online

E’doza 21 - lugbara bible

E’doza 21

¹Yehova nga Sarani andri erini ’yole ’borile, Yehova nga ’ye Sara vu erini olule ’borile.

²Sara nga di mva isu eri ma alia, nga agimva ti Iburahimu dri, Iburahimuni dezu ’bori ti, ewu nde Munguni e’yoni ’yole eri ma tia ’borisi.

³Iburahimu nga mva tile eri dri, Sarani tileniri, ma ru ’da Isaka’i.

⁴Iburahimu nga mva erini ma agele li o’du erinini caria aro ’boria, Munguni ndra azile eri ma tia ’borile.

⁵Iburahimuni de eli be turu alu mvi Isakani osiria eri driria.

⁶Sara nga ’yo ra, Mungu fe mani guzu; ’ba dria alu alu e’yo ’diri eripiri yi nga gu ma be.

⁷Eri nga ’yo ra, A’di eco te ’yo Iburahimu ma tia kini, Sarani nga ba fe anzi dri ndruzu, ya? Te ma ti agimva eri dri, erini deria ’boria.

⁸Mva nde zo ra, nga ba ti ku; o’du Isakani ba ti kuzu ’borisi Iburahimu nga omu amboru ’ba.

⁹Te Sara nga Hagari Misiri ezoruri ma mvi erini tile Iburahimu driri ndre erini yi ’baria aparakaru.

¹⁰E’yo ’disi eri nga ’yo Iburahimu ma tia, Mi dro oku ati’boru ’eli pi mvi be ra; a’disiku oku ati’boru ’diri ma mvi ngani ovu kari’baru ma mvi Isaka be ku.

¹¹E’yo ’diri ovu candiru tu Iburahimu ma milia mvi ini ma e’yosi.

¹²Mungu nga ’yo Iburahimu ma tia, E’yo mva pini oku mini ati’boru beri ma ovu mi milia candiru ku; mi ma eri o’duko Sarani e’yo dria erini ’yole mi tiari ma alia, a’disiku ori mini nga ovu omvezaru Isaka ma alia.

¹³Te ma nga vini oku ati’boruri ma mvi ofu ovuzu sururu erini ovule ori minirisi.

¹⁴Iburahimu nga di enga o’bitisi drio, nga mikate pi ’du yi kereari be, nga yi fe Hagari dri, yi ’bazu eri ma gbudria mva be, nga eri ma ti pe, Eri fu ra, muzu acizu abasi angu rokoru Beerisebaaria.

¹⁵Yi kereari ka i de ra, eri nga mva la ku pati obibi ma etia.

¹⁶Eri nga mu ra, nga ri va otizaru eri be re, yi ma esele vu ekile ’bani adrile ’ye gbilerile; erini ’yole kini, Ma ma ndre mvani draria kurisi. Eri nga di ri otizaru eri be ’dini, nga i ma o’duko enga uru awu wuzu.

¹⁷Mungu nga mva ma o’duko eri ra; malaika Munguni nga Hagarini omve engazu ’bua, nga ’yo eri tia, E’yo ngoni ’ye i mini ya, Hagari la? Mi ru ku, Munguni o’duko mvani pari erini ovuzuriari erile ’borisi.

¹⁸Mi enga uru, mi ’du mva uru, mi bi eri mi dria; mani ngale eri ’bale ovuzu suru amborurisi.

¹⁹Mungu nga di eri ma mile zi ra, eri nga ani yi a’di ndre ra; eri nga di mu yi nde eko kerea tre, nga yi mvuza fe mva dri.

²⁰Mungu ovu mva nde be, eri zo ra; eri adri angu roko driaria, eri nga ofu ’ba osu gbipiriru.

²¹Eri nga adri angu rokoru Paraniaria; andri nga oku je eri dri angu Misirinia.

²²Te eri nga eca ’dini ewu ’dasi, Abimeleki pi Fikoli ’ba amboru asikari erini ongulumuru ’diyi ma driliari be nga ’yo Iburahimu ma tia kini, Mungu ovu mi be e’yo dria mini ’yeleri ma alia;

²³e’yo ’disi curu’do mi so oyo ma dri Mungu ma rusi ’doa kini mi ngani ’ye ma be lokirisi ku, kani mva mani be, kani mva mani ma mvi pie dria, te ekile asi ndriza mani ’yele mi vu ’borile, mi nga ’ye ma be ’dini, azini angu mini ndra ovuzu alenia ani’boruri be adria.

²⁴Iburahimu nga ’yo ra, Ma nga oyo nde so ra.

²⁵Iburahimu nga ega Abimeleki ma dria yi a’di Abimeleki ma ati’bani ’pale okposiri ma e’yosi.

²⁶Abimeleki nga ’yo ra, Ma nini a’di ’ye e’yo ’dirini yari ku; te mi oluni ndra e’yo ’diri ma tia ku, ma erini vini e’yoni drio ku, pe lu andru a’dule.

²⁷Iburahimu nga kabilo piyi fe Abimeleki dri ti be, yi nga iri tro e’yo aziza azi yi ma eselia.

²⁸Iburahimu nga kabiloanzi kariceru aziri, kabilo o’biru ’diyi ma eselia, ’du o’ba ndu.

²⁹Abimeleki nga ani ’yo Iburahimu ma tia kini, Kabiloanzi kariceru aziri mini o’bale ndu ’diyi ma efini ngoni ya?

³⁰Eri nga ’yo ra, Mi nga kabiloanzi kariceru aziri ’diyi a’i ma dria, e’yoni ma ovu ecetaru ma dri kini ma ga yi a’di ’diri ma’i ada.

³¹E’yo ’disi eri ’da pari nde ma ru Beeriseba’i; yini iri tro oyo sole ’daarisi.

³²Yi nga di aziza azi Beerisebaa. Abimeleki pi nga enga uru Fikoli ’ba amboru asikari erini ongulumuru ’diyi ma ’driliari be, yi nga ii mvi yi vile angu Filisitiaria.

³³Iburahimu nga iti pati sa Beerisebaa ’daa, nga Yehova Mungu ’Dani ’Daniri ma ru omve ’daa.

³⁴Iburahimu nga ovu ani’boru ’ba Filisitiaa ’diyi ma angua o’du kakau.