Read lugbara E’doza 22 Bible Online

E’doza 22 - lugbara bible

E’doza 22

¹Eri nga eca ’dini e’yo ’diyi ma vutia, Mungu nga Iburahimuni o’bi, nga ’yo eri tia, Iburahimu! Eri nga a’i ra, Ma ’do.

²Eri nga ’yo ra, Mi ’du curu’do mvi mini ilipiliru, mini lele avasiri, adani Isaka’i, mi mu angu Moriania, mi fe eri edeta vezaniriru oni ’daa ’diyi ma azi, mani ngale e’yoni olule mi tiari, ma dria.

³Iburahimu nga di ani enga o’biti drio, nga enyi rizuri ’ba akanya erini ma dria, nga karile erini yi ’du iri, mvi Isaka be; eri nga eja osi edeta vezanirini, nga enga ra, nga mu pari Munguni e’yoni olule eri ma tia ’boria.

⁴O’du narisi Iburahimu nga i ma mile enga uru, nga pari nde ndre re ’dale.

⁵Iburahimu nga di ’yo karile erini ma tia, Emi te ’doa akanya be; ma’i mva be, ama nga mu ’dale, ama nga Mungu inzi ’dale, ama nga emu emi vu dika ndo.

⁶Iburahimu nga edeta vezaniri ma eja ’du ’ba mvi Isaka ma dria; eri nga aci pi ’du eli be i ma dria; yi nga mu iri tro tualu.

⁷Isaka nga ’yo i ati Iburahimu ma tia kini, Ma ati la! Eri nga ’yo ra, Ma ’do, mva mani. Eri ’yo ra, Mi ndre, aci eja be yi ’di; te kabilomva edeta vezaniri ngoa ya?

⁸Iburahimu nga ’yo ra kini, Mungu ma ngulupini nga kabilomva edeta vezaniri fe ra, mva mani. ’Dini yi iri tro nga mu tualu.

⁹Yi nga eca pari ndraka Munguni e’yoni olule eri ma tiaria, Iburahimu nga pari edeta edezuri si ’dale, nga eja oti drinia kililiru, nga i mvi Isakani ombe, nga eri ’ba pari edeta edezuri ma dria eja dria.

¹⁰Iburahimu nga i dri eju eli ’duzu i mvini lizu.

¹¹Te malaika Yehovani nga eri omve engazu ’bualeru kini, Iburahimu la, Iburahimu la! Eri nga ’yo ra, Ma ’do.

¹²Eri nga ’yo eri tia, Mi ’ba mi dri mva ma ruaa ku, mi ’ye eri aluni ku; a’disiku ma ni curu’do mi ru Mungu ada, mini mi mvi, mi mvi fiipiliruri, gale fekokoru ma dri kurisi.

¹³Iburahimu nga i mile enga uru, nga lu ra, te mi ndre, eri ma vutia kabiloago su i ma o’yu jere ma alia kirikiri; Iburahimu nga mu kabiloago nde bi, nga eri ede edeta vezaruriru i mvi ma paria.

¹⁴Iburahimu nga pari nde ma ru ’da Yehovayire’i; ekile yini ’yole kpere andrurile, Eri nga ovu fezaru oni Yehovani ma dria ra.

¹⁵Malaika Yehovani nga Iburahimuni omve pale iririsi engazu ’bualeru,

¹⁶nga ’yo kini, Ma so oyo ma ngulupi ma rusi ’bo, Yehova ’yo ra, mini e’yo ’diri ’yelerisi, mini mi mvi, mi mvi ilipiliruri, gale fekokoru kurisi,

¹⁷mani asi ndriza feria ma nga asi ndriza fe mi dri ra, mani feria mini ezuzuria ma nga fe mi orini ezuzu ekile ’bi’bio ’bua ’diyile, ekile cinya miri ma tiarile. Ori mini nga ari’ba yini ma kalitile pa yi ma afaru ra;

¹⁸ori mini ma alia, suru dria nyakua ’diyi nga asi ndriza isu, mini ma o’duko erile ’borisi.

¹⁹’Dini Iburahimu nga di emvi karile erini vu, yi nga enga ra, nga mu tualu Beerisebaa; Iburahimu nga ovu Beeri-sebaa ’daa.

²⁰Eri nga eca ’dini e’yo ’diyi ma vutia, ’ba nga olu Iburahimuni kini, Mi ndre, Milika oti vini anzi mi adripi Nahori dri ’bo:

²¹mva erini okori Uzi’i pi, adripi erini Buzi pi, Kemueli Aramu ati pi.

²²Kesedi pi, Hazo pi, Pilidasi pi, Yidilafu pi, Betueli pie.

²³Betueli nga Rebekani ti. Milika oti anzi ’diyi aro Nahori Iburahimu ma adripi dri.

²⁴Oku erini ati’boruri, runi Reuma’i, eri ti vini Teba pi, Gahamu pi, Tahasi pi, Maaka pie.