Read lugbara E’doza 24 Bible Online

E’doza 24 - lugbara bible

E’doza 24

¹Iburahimu ma eli ca de kakau, eri dezaru tu; de Yehova fe asi ndriza Iburahimu dri afa driasi ’bo.

²Iburahimu nga di ’yo ati’bo erini amboru jo erini ma drilia, afa dria erini ovuzu yi be ’diyi ma dri cepiri ma tia, kini, Ma zi mi tia, mi ’ba mi dri ma etekoa,

³ma nga fe mini oyo sozu Yehova Mungu ’bu pini nyaku beri ma rusi ci, kini, mi ngani ’ba Kananini mani ovuzu yi ma eselia ’diyi ma ezopi ma azi je, mva mani dri okuru aluni ku,

⁴te mi ngamu angu mania, kpere ori’ba mani vu, oku jezu mva mani Isaka dri.

⁵Ati’bo nga ’yo eri tia kini, Te kani zamva nde ngani a’i ma vuti bizu emuzu angu ’doria ku yani; ka di ’dini ma ma omvi mvi mini angu mini efuzuria dika ya?

⁶Iburahimu nga ’yo eri tia, Mi ma ndre onyiru mi ma omvi ma mvini ’dale dika ku fo!

⁷Yehova Mungu ’bua ma ofupi ma ati vile joarisi, engazu angu mani osizuriarisi, e’yo ’yopi ma be oyo sopi ma be ci kini, Ma nga angu ’dori fe ori mini dri rari; eri’i eri nga malaika erini ma li pe mi driliani, mi nga oku je ma mvi dri engazu ’dale ani.

⁸Te zamva ka le mi vuti bizu ku, ka’dini mi di nga ovu truzaru oyo soza mani ’disi; te mi ma omvi ma mvini ’dale dika aluni ku.

⁹Ati’bo nga di i dri su opi erini Iburahimu ma etekoa, nga oyo so eri be e’yo ’dirisi.

¹⁰Ati’bo nga ngamia eri ma opini ma azi ’du mudri, nga mu ra, te afa onyiru dria eri ma opini ’diyi ovu eri ma dria; eri nga enga ra, nga mu Mesopotamiaa kpere aku Nahorinia.

¹¹Eri fe ngamia ma osi kumuti va aku tia amve, yi a’di ma tia, etu alasi etu okuyini fuzu yi kozurisi.

¹²Eri nga ’yo ra, Yehova, Mungu opi mani Iburahimuniri, mi fe ma ma isu drileba andru, mi ece asi ndriza opi mani Iburahimu dri fo!

¹³Mi ndre, ma pa so yi a’di ma tia, de ezoanzi ’ba akua ’diyini yi efu yi kozu efu efu.

¹⁴Mi fe eri ma ovu ’dini, zamva mani ngazu e’yo ’yozu tinia, Mi ’ba imvu mini va, ma zi mi tia, ma ma mvu ani; te eri nga ’yo ra, Mi mvu, te ma nga vini yi eko ngamia mini dri indiri, mi fe zamva nde ma ovu zamva mini pele ati’bo mini Isaka dri ’bori’i. Geri ’disi ma nga ni kini mi ece asi ndriza opi mani dri ’bo beni.

¹⁵Te eri nga ovu ’dini, de nga eri deni e’yo ’yozu ku, mi ndre, Rebeka, Iburahimu ma adripi Nahori ma oku Milika ma mvi Betueli ma zi nga efu, de imvu be i ma gbudria.

¹⁶Isu de zamva nde ovu ndrizaru tu ’ba ma milia, eri aliriaru, ’ba lani nga erisi aluni ku. Eri si yi a’dia, nga yi ko imvu erinia tre, nga tu uru dika.

¹⁷Ati’bo nga nzu dri fuzu eri be, nga ’yo ra, Ma zi mi tia, mi fe ma mvu yi imvu mini ma alia.

¹⁸Te eri ’yo ra, Mi mvu, opi mani; eri ’ye mbele mbele, nga imvu ini a’du va, ’ba i dria, nga fe eri mvu.

¹⁹Eri ka de yi fe mvuzu eri dri ’bo, eri nga ’yo ra, Ma nga yi ko ngamia mini dri indi, kpere yini deria yi mvuria.

²⁰Eri ’ye mbele mbele, nga yi imvu erini ma aliari osu dria oguru anyapani yi mvuzuria, nga nzu yi a’dia dika yi kozu, nga yi oko ngamia erini dri dria.

²¹Agu nde nga eri lu ’dani te ’yoni e’yo azini ku, erini nizu kani Yehova fe acita erini ovu drilebaru ’bo kani ku yani.

²²Te eri nga eca ’dini, ngamia ka de mvuzu ’bo, agu nde nga nzia meleru nziza be sekeli rua alileri e’du fe drinia, nga vini ocoko iri nziza be sekeli meleru mudri ’diyi osu eri ma dri ombelea,

²³nga ’yo ra, Mi zamva a’dini ya? Mi olu mani, ma zi mi tia, pari azini indi mi ati ma joa, amani tezu o’du were ci ya?

²⁴Eri nga ’yo eri tia, Ma Betueli Milika mvi erini tile Nahori driri rua zi’i.

²⁵Eri nga ’yo vini indi kini, Ama ovu anyapati anyapani lazu drinia ’diyi be fu dri ci, ase ’wiza anyapani nyaleri be, jo omuni tezuri i indi.

²⁶Agu nde nga i dri elu ra Yehovani inzizu.

²⁷Eri ’yo ra, Yehova Mungu opi mani Iburahimuniri ma ovu inzizaru, erini yiki erini pi kule ja e’yo ada erini be opi mani vu kurisi. Te ma’iruni, Yehova ce ma dri geria, kpere opi mani ma adripi ma joa ’bo.

²⁸Zamva nde nga nzu ra, nga e’yo ’diyi olu ’ba i andri ma joa ’diyi ma tia ra.

²⁹Te Rebeka ovu adripi be, runi Labani’i; Labani nga nzu agu nde vu kpere yi a’di tia.

³⁰Eri nga eca ’dini, eri ka nzia pi ndre ocoko i amvipi ma dri ombelea ’diyi pie, ka e’yo i amvipi Rebekani ’yoleri eri ra, kini, Agu nde ’yo ma tia ’dini ’dini; eri nga ca agu nde vu; te mi ndre, eri so pa ngamia ma ageia yi a’di ma tia.

³¹Eri nga ’yo ra, Mi efi, mi Yehovani asi ndriza fele driniari la! Mi so pa amve a’disi ya? Ma ede jo ngonde ’bo, azini pari ngamia dri indi.

³²Agu nde nga efi joa; Labani nga enyi teri otizu ngamia ma ngukua ’diyi ayu ra, nga anyapati pi fe ngamia dri ase ’wiza be, nga yi fe eri ma pa ojizu, ’ba nde ovupi eri be ’diyi pie indi.

³³Yi ’ba nyaka eri ma drilia, eri ma nya beni; te eri nga ’yo ra, Ma ngani nyaka nya ku, de nga ma oluni e’yo mani emuzuri ku. Eri nga ’yo ra, Mi olu nga.

³⁴Eri nga ’yo ra, Ma ati’bo; Iburahimuniri’i.

³⁵Yehova fe asi ndriza opi mani dri amboru tu, eri ofu ovuzu ’ba amboru; fe eri dri kabilo o’biru piyi ti o’biru be, dahabu pi mele be, ati’ba agupiru ’diyi pi okuru ’diyi be, ngamia piyi akanya be ’bo.

³⁶Azini indi Sara opi ma vileri ma oku ti mva opi mani dri de eri dezaru; eri fe afa erini dria eri dri ’bo.

³⁷Opi mani fe mani oyo sozu ci kini, Mi ma je ezoanzi ’ba Kananini mani ovuzu yi ma angua ’diyi ma azi ma mvi dri okuru aluni ku;

³⁸te kini, Mi ma mu ma ati ma joa ori’ba mani vu, oku jezu ma mvi dri ’dale.

³⁹Te ma ’yo opi mani ma tia, Te kani zamva nde ngani ma vuti bi ku yani.

⁴⁰Eri ’yo ma tia kini, Yehoya mani acizu drileniari nga malaika erini ma ti pe mi be, nga geri mini ’ba drilebaru; mi nga oku je ma mvi dri ori’ba mani ma eselia, ma ati vile joa ra;

⁴¹mi nga di ovu truzaru e’yo kokoru oyo soza mani ma e’yosi, mi ka nga eca ori’ba mani vu ’bo; te yi ka nga eri fe mi dri k’ia, mi nga di ovu truzaru oyo soza manisi ndo.

⁴²Ma eca andru yi a’di ma tia, ma ’yo ra, Yehova Mungu opi mani Iburahimuniri la, mi ka curu’do geri mani muzuri ’ba drilebaru,

⁴³mi ndre, ma pa so yi a’di ma tia; mi fe eri ma ovu ’dini, zamva efupi yi kopi, mani ’yozu tinia, Ma zi mi tia, mi fe ma mvu yi imvu mini ma aliari were,

⁴⁴te eri nga ’yo ma tia, Mi mvu mi’i, azini ma nga vini yi eko ngamia mini dri indiri; mi fe zamva nde ma ovu zamva Yehovani pele opi mani ma mvi driri’i.

⁴⁵Te de nga ma deni e’yo ’yozu ma asia ku, mi ndre, Rebekani efu imvu be gbudria efu efu; eri si va yi a’dia, nga yi eko. Ma ’yo tinia, Ma zi mi tia, mi fe mani yi mvuza fo!

⁴⁶Eri ’ye mbele mbele, nga imvu a’du gbudriarisi va, nga ’yo ra, Mi mvu di, ma nga vini yi mvuza fe ngamia mini dri indio ’Dini ma mvu ra, eri fe vini yi ngamiayi dri indi.

⁴⁷Ma nga di zi tinia kini, Mi zamva a’dini ya? Eri nga ’yo ra, Ma Betueli Nahori mvi Milikani tile eri driri ma zi’i. Ma nga di nzia osu eri ma omvua, ma osu ocoko eri ma dri ombelea indi.

⁴⁸Ma elu ma dri va Yehovani inzizu, ma fe inzita Ye’hova Mungu opi mani Iburahimun’iri dri, erini ma dri cele geri ’yekeriarisi, opi mani ma adripi ma zini jezu okuru mvi erini dririsi.

⁴⁹Te di curu’do emi ka a’i asi ndriza pi ’yezu e’yo ada be opi mani vu, emi olu ma tia; ka ku, emi olu ma tia indi; ma ma oja ma kani dri ndialeru kani dri ejialeru ani.

⁵⁰Labani pi Betueli be nga di e’yoni omvi ’yozu kini, E’yo ’diri enga Yehova vu;ama econi e’yo azini kani onzi kani onyiru ’yozaru mi tia ku.

⁵¹Mi ndre, Rebekani mi milia ’di, mi ’du eri, mi mu, eri ma ovu opi mini ma mvi dri okuru, Yehovani ’yolerile.

⁵²Eri nga eca ’dini, ati’bo Iburahimuni ka e’yo yini ’yoleri eri ra, eri nga avu va nyakua Yehovani inzizu.

⁵³Ati’bo nga onyiafa dahaburu ’diyi pi ofu onyi afa meleru ’diyi pie, bongo pie, nga yi fe Rebeka dri; fe vini afa aje nyapi tu ’diyi eri ma adripi pi dri andri be.

⁵⁴Yi nga nyaka nya, nga afa mvuza mvu, eri’i ’ba ovupi eri be ’diyi be; yi te ’dale ini ’dasi dria. Yi nga enga uru o’bitisi, eri nga ’yo ra, Mi pe ma ti mvizu opi mani vu.

⁵⁵Te eri ma adripi pi andri be nga ’yo ra, Mi fe zamva nde ma te ama be o’du were, kani mudri ’dipi, kani aga ’diyi ra; vutinia eri nga mu ndo.

⁵⁶Eri nga ’yo yi tia, Emi oga ma ku, Yehovani geri mani ’bale drilebaru ’borisi; mi pe ma ti mvizu, ma ma mu opi mani vu ani.

⁵⁷Yi nga ’yo ra, Ama nga zamva nde omve, e’yoni zizu tinia.

⁵⁸Yi nga di Rebekani omve, nga ’yo eri tia, Mi le mu agu ’diri be ra ya? Eri ’yo ra, Ma mu ra.

⁵⁹Yi nga di amvipi yini Rebeka pi ma ti pe muzu endria erini ndra mvasiri pie, ati’bo Iburahimuni pie, ’ba erini ’diyi pie dria.

⁶⁰Yi nga asi ndriza fe Rebeka dri, nga ’yo eri tia, Amvipi amani la, mi ma ovu ’ba alifu pale alifu mudri ’diyi ma andriru; ori mini ma pa ’ba yi ngupi onzi ’diyi ma kalitile yi ma afaro!

⁶¹Rebeka nga enga ra, ezoanzi erini be, yi nga nzu ngamia dria, nga agu nde ma vuti bi; ati’bo nde nga Rebekani ’du ra, muzu geri inia.

⁶²Isaka emu geri Beeri-lahai-rojarisi; erini ovule angu Uruleri ma aliarisi.

⁶³Isaka nga fu asisile dro nyamukoa ondresi; eri nga i mile enga uru, nga angu lu ra, te mi ndre, ngamia yi emu emu.

⁶⁴Rebeka nga i mile enga uru, te eri ka Isakani ne ra, eri nga si ngamia driarisi va.

⁶⁵Eri nga ’yo ati’bo ma tia, Agu acipi nyamukoa emupi dri fupi ama be ’daari a’di’i ya? Ati’bo nga ’yo ra, Eri opi mani. Eri nga di bongo erini ’du i a’buzu.

⁶⁶Ati’bo nga e’yo dria erini ’yele ’bori olu Isaka ma tia.

⁶⁷Isaka nga eri eji kpere i andri Sara ma hema ma alia, nga Rebekani bi, eri nga di ovu eri ma okuru; eri le eri avasi ra. Isaka nga di i asi omi ani i ma andrini drazu ’bori ma vutia.