Read lugbara E’doza 25 Bible Online

E’doza 25 - lugbara bible

E’doza 25

¹Iburahimu nga oku azini je runi Ketura’i.

²Eri nga Zimirani pi oti eri dri, Yokisani pie, Medani pie, Midiani pie, Isibaki pie, Sua pie.

³Yokisani nga Seba pi oti Dedani be. Anzi Dedanini yi ’ba Asurini piyi, ’ba Letusini pie, ’ba Leumini pie.

⁴Anzi Midianini yi Efa pi, Eferi pi, Hanoki pi, Abida pi, Elidaa pie. ’Diyi dria anzi Keturani.

⁵Iburahimu fe afa dria erini ovuzu yi be ’diyi Isaka dri.

⁶Te oku ati’baru Iburahimuni bile ’diyi ma anzi dri, Iburahimu nga afa feza ofe, nga yi ma ti pe eri ma mvi Isaka vurisi re, de nga erini ovuria idriru, muzu a’iyoaleru kpere angu kala etuni efurialeruria.

⁷O’du eli Iburahimuni ovuzu idriru ’diyini yi ’di, eli turu alu drini kali aziri drini towi.

⁸Iburahimu ma ava fu ra, eri nga dra ra, de eri de fu dri ci, eri ’ba dezani eli be kakau, nga di mu ’ba ini odrapi ’bo ’diyi vu.

⁹Anzi erini Isaka pi Isimaeli be nga eri ma avu sa oni gule Makipelani, amvu Efironi Zohari ’ba Hitini ma mvini ovupi Mamire ma driliari ma alia,

¹⁰amvu nde Iburahimuni jele anzi Hetini driri’i. Yi sa Iburahimu ma avu ’dale oku erini Sara be.

¹¹Eri nga eca ’dini, Iburahimu ka dra ’bo, Mungu nga asi ndriza fe mvi erini Isaka dri. Isaka ovu Beerilahai-roja.

¹²Isimaeli Iburahimu mvi, Hagari Misiri ezoru Sara ma zamva ati’boruni tile Iburahimu driri ma a’bianzi yi ’di.

¹³Anzi Isimaelini ru yini vusi, azini a’bianzi yini vusi, yi ’di: Isimaeli ma mva okori Nebayoti’i; Kedari pi, Adibeeli pi, Mibisamu pi,

¹⁴Misima pi, Duma pi, Masa pi.

¹⁵Hadadi pi, Tema pi, Yeturi pi. Nafisi pi, Kedema pie.

¹⁶Anzi Isimaelini yi ’dini, yi ma ru ’diyi’i, aku yini vusi azini hema asoza yini vusi yi opi mudri drini iri suru yini vusi.

¹⁷(Eli Isimaelini ovuzu idriru ’diyi yi ’di, eli turu alu drini kali oa drini aziri; avani fu ra dra ra, mu ’ba erini odrapi ’bo ’diyi vu.)

¹⁸Yi nga adri engazu Havilaa kpere Suri Misiri ma driliaria, mini muria Asuriaaleru; eri adri ndra i adripi dria ma milia ’aa’daleru.

¹⁹A’bianzi Isaka Iburahimu mvini yi ’di: Iburahimu ti Isaka’i.

²⁰Isaka ma eli ka ca kali su ’bo, eri nga Rebeka Betueli ’ba Suriani Padani-aramuari ma zi, amvipi Labani ’ba Suriani, je eri ma okufu,

²¹Isaka nga matu ’ba Yehova vu oku erini ma e’yosi, erini ovule ondorurisi; Yehova nga matu erini ’baleri eri ra, oku erini Rebeka nga mva isu i ma alia ra.

²²Anzi nga ri afu fu eri ma alia; eri nga ’yo ra, Ka ovu ’dini, ma ovu idriru a’disi ya? Eri nga mu e’yo zi Yehova vu,

²³Yehova nga ’yo eri tia, Suru iri ovu opojo mini alia, suru iri nga yi esele co ndu ndu kpere engazu mi alia; suru aluri nga ovu okpo be aga suru aziniri ra, mva amboru nga azi nga wereri dri.

²⁴O’du erini mva osizuri ka eca ’bo mi ndre, anzi ejuru ovu eri ma alia.

²⁵Mva okori nga efu ekaru, eri ma rua dria ekile bongo ’biko berile; yi nga runi ’da Esau’i.

²⁶Vutinia adripi erini nga efu ra, de eri ma dri bi Esau ma paedu ci; ’da runi Yakobo’i. Isakani de ’dasi eli kali azia, okuni anzi osiria

²⁷Anzi nde nga zo ra; Esau eri ’ba za gbipi onduasi, ’ba ’a’api aseariru, te Yakoboni ’ba e’yereni ’a’api hemaari’i.

²⁸Te Isaka le Esauni erini za erini gbileri nyalerisi; te Rebeka le ini Yakobo’i.

²⁹Yakoboni de enyasa tibi a’di; Esau nga eca asearisi, ’ye ebi abirisi.

³⁰Esau nga ’yo Yakobo tia, Mi fe mbe tibi mini ekaru awa’dari, ma zi mi tia; ma ebi abirisi ’do. (E’yo ’disi ’da runi Edomu’i.)

³¹Yakobo nga ’yo ra, Mi fe e’yo mini Ovuzu karimvaruri jema driraka.

³²Esau nga ’yo ra, Mi ndre, ma ’ye dra abirisi cucuru’do; e’yo mani ovuzu karimvaruri nga di ma aza ko ngoni ngoni ya?

³³Yakobo nga ’yo ra, Mi so oyo ma be raka. Eri nga oyo so eri be ra, eri nga di e’yo erini ovuzu karimvaruri fe je Yakobo dri ani.

³⁴Yakobo nga di mikate fe Esau dri tibi osu nyirikia ajira be, eri nga nya ra, nga mvu ra, nga di enga mu i ma geria ndo. ’Dini Esau nga di e’yo erini ovuzu karimvaruri ’ba aparakaru.