Read lugbara E’doza 27 Bible Online

E’doza 27 - lugbara bible

E’doza 27

¹Eri nga eca ’dini, Isaka ka di de ’bo, azini mile erini ka ase ’bo ’dini eri econi ani angu ndre zaru ku, eri nga Esau i mvi okori omve, nga ’yo eri tia, Ma mvi la! Eri nga ’yo eri tia, Ma ’do.

²Eri nga ’yo, Mi ndre, ma de curu’do ’bo; ma nini o’du mani ngazu drazuri ku.

³E’yo ’disi, ma zi mi tia, mi ’du afa mini anyapa gbizu ’diyi, ndere mini pi osu mini be, mi mu asea, mi gbi iza ma dri,

⁴mi a’di ma dri za aluzaru mani lelerile, mi eji eri ma vu, ma ma nya ra; ma orindi ma fe asi ndriza mi dri beni, de nga ma drani ku.,

⁵Te Rebeka nga eri Isakani e’yo ’yoria mvi ini Esau ma tia. Esau nga di mu asea za nda gbizu ejizu.

⁶Rebeka nga ani ’yo mvi ini Yakobo ma tia kini, Mi ndre, ma eri mi atini ’yoria mi adripi Esau ma tia kini,

⁷Mi eji za ma dri, mi a’di ma dri za,aluzaru, ma ma nya ra, ma ma fe asi ndriza mi dri beni Yehova ma milia, de nga ma drani ku.

⁸E’yo ’disi, mvi mani, mi eri o’duko mani e’yo mani azile mi tiarile.

⁹Mi mu curu’do anyapa o’biru ’daarisi mi ma eji ma dri ndrianzi onyiru iri; ma nga yi ma za a’di aluzaru mi ati dri erini lelerile;

¹⁰mi nga eri eji mi ati vu, eri nga nya ra, ma fe asi ndriza mi dri beni de nga drani ku.

¹¹Te Yakobo nga ’yo i andri Rebeka ma tia kini, Mi ndre, ma adripi Esauni ’biko be ruaari’i, te ma’i, ’biko ma ruaa yo.

¹²Kani ma atini nga ma rua elo ra yani, ma nga e’da eri ma milia ’ba ’ba icipirile; ma nga di trita eji ma ruaa asi ndriza ma paria’i ani.

¹³Andri nga ’yo eri tia, Trita mini ma nga ovu ma ruaa, ma mvi la; te ti, mi ma eri nga ma o’duko ’dani, mi mu yi ejizu ma dri fo!

¹⁴Eri nga mu ra yi ejizu, emuzu yi be i andri vu; andri erini nga za aluzaru a’di eri ma atini ’lelerile.

¹⁵Rebeka nga bongo onyiru Esau i mvi okorini, ovupi i be joari e’du, su Yakobo i mvi wereri ma ruaa;

¹⁶eri nga ndrianzi nde’diyi ma enyi o’ba eri ma dri ngukua, azini eri ma ombelekoa, pari ovupi ’biko kokoru;

¹⁷eri nga za aluzaru ini edeleri pi fe mikate be mvi erini Yakobo ma dria.

¹⁸Eri nga eca i ati vu ani, nga ’yo, Ma ati la; eri nga ’yo ra, Ma ’do, mi a’di’i ya, ma mvi?

¹⁹Yakobo nga ’yo i ati ma tia, Ma Esau, mvi mini okori’i. Ma ’ye mini azile ma tiarile ’bo; mi enga, ma zi mi tia, mi ri va, mi nya za mani gbileri, mi orindi ma fe asi ndriza ma dri beni.

²⁰Isaka nga ’yo mvi erini ma tia kini, Mi isu eri mbeleru ’dini a’disi ya, ma mvi? Eri nga ’yo ra, Yehova Mungu minirini drileba fele ma drinirisi.

²¹Isaka nga ’yo Yakobo ma tia, Mi esi ma vu ogogo, ma zi mi tia, ma ma va mi rua, mvi mani, kani mi mvi mani Esau’i ada ada yani, kani yo.

²²Yakobo nga esi i ati Isaka vu ogogo; eri nga eri ma rua va ra, nga ’yo ra, O’dukoruni o’duko Yakoboni, te driru ’diyi yi dri Esauni.

²³’Dini eri amani eri ku,eri ma drini ovule ’biko be elille eri ma adripi Esau ma drilerisi; nga di asi ndriza fe eri dri ani.

²⁴Eri nga ’yo ra, Mi ma mvi Esau ma ada’i ya? Eri nga ’yo ra, Ma eri’i.

²⁵Eri nga ’yo ra, Mi eji eri ma vu ogogo, ma nga mvi mani ma za nya, ma orindi ma fe asi ndriza mi dri beni. Eri nga eri eji ogogo, eri nga nya ra; eri nga patiefi ma su eji indi, eri mvu ra.

²⁶Ati Isaka nga ’yo eri tia, Mi esi ogogo, mi ndru ma o’bolo, ma mvi.

²⁷Eri nga esi ogogo, nga eri ma o’bolo ndru ra; eri nga bongo erini ma aji ngu ra, nga asi ndriza fe eri dri kini, Mi ndre, ma mvi ma aji eri amvu Yehovani asi ndriza fele drinia ’bori ma ajile!

²⁸Mungu ma fe mi dri andrali ’buari pi, afanyakuni kale omgbo beripie, anya ma kaza pi patiefi ma suniri be tre tre.

²⁹Suru ma nga azi mi dri, suru ambo ambo ’diyi ma avu va mi inzizu. Mi adri opiru mi adripi ma eselia, anzi mi andrini otile ’diyi ma avu va mi inzizu. Trita ma ovu ’ba mi tripi ’diyi ma dria dria, asi ndriza ma ovu ’ba asi ndriza fepi mi driri ma dria dria!

³⁰Eri nga di eca ’dini, Isaka ka de asi ndriza fezu Yakobo dri ’bo, isu de Yakoboni fu ati ma ageiarisi fu fu, adripi erini Esau nga eca engazu za gbiriarisi coti.

³¹Eri’i indi a’di za vini aluzaru ’bo, nga eri eji ati vu, nga ’yo ati ma tia, Ma ati ma enga, ma nya i mvi ma za fo, mi orindi ma fe asi ndriza ma dri ani beni.

³²Isaka ati erini nga ’yo eri tia, Mi a’di’i ya? Eri nga ’yo ra, Ma mvi mini, mvi mini kayu Esau’i.

³³Isaka ma rua nga ya ya tu aga ra,eri nga ’yo ra, Te a’di e’du te ma za gbileri eji ma dri, mani ani afa dria nyazu de nga mi ecani ku, mani asi ndriza fezu eri dri ’borini ya?-eri i nga ovu asi ndriza beni ada.

³⁴Esau ka e’yo i atini ’yoleri eri ra eri nga wu o’duko urusi azini asi candirusi, nga ’yo i ati ma tia, Mi fe asi ndriza ma dri, kirikiri mi fe vini ma dri indi fo, ma ati la!

³⁵Eri nga ’yo ra, Mi adripi emu lokirisi, pa i asi ndriza mini ’bo.

³⁶Esau nga nga ’yo ra, ’Dani eri ma ru Yakobo’i ’yeke ku ya? Eri ebaba ma lokirisi pale irini ’di. Eri pa ndra e’yo mani ovuzu karimvaruri ra; te mi ndre, curu’do eri pa vini asi ndriza mani ’bo indio Eri nga ’yo ra, Mi mbani asi ndriza ma ta manini ku ya?,

³⁷Isaka nga e’yo omvi, nga ’yo Esau ma tia, Mi ndre, ma fe erini ovuzu opi miniru ’bo, ma fe adripi erini dria ovuzu eri ma ati’baru, ma mba erini anya pi ma ta patiefi ma su be ’bo. Te ma mvi la, ma nga di mi dri a’di ’ye ya?

³⁸Esau nga ’yo i ati ma tia, Asi ndriza mini alu a’dule ya, ma ati? Mi fe asi ndriza ma dri, kirikiri mi fe vini ma dri indi fo, ma ati la! Esau nga wu mindresi o’duko urusi.

³⁹ Ati Isaka nga e’yo omvi, nga ’yo eri tia: Mi ndre, mi nga pari mini ovuzuri ’ba afa nyakuni kale omgbo beri pi be re re, andrali ’buari be.

⁴⁰Mi nga ovu idriru sei minisi, mi nga azi nga mi adripi dri; te eri nga eca ’dini, mi ka nga mi tru ra, mi nga kulumbu erini tru ya mi ombelearisi va.

⁴¹Esau nga ani Yakoboni ngu onzi asi ndriza i atini fele eri driri ma e’yosi. Esau nga ’yo i asia, O’du ma atini wuzuri eri ogogo; o’du nde ’dasi ma nga ma adripi Yakoboni fu ra.

⁴²Yi nga e’yo eri ma mva okorini ’yoleri olu Rebeka ma tia; eri nga ’ba ti pe mva erini were Yakoboni omvezu, nga ’yo eri tia, Mi ndre, mi adripi Esau omi i ma asi ceni misi lezu mi fuzu.

⁴³E’yo ’disi, ma mvi la, mi eri o’duko mani; mi enga, mi apa ma adripi Labani vu Harania,

⁴⁴mi ovu eri be ’daa o’du were de nga mi adripi ma aoko mi vuri deni i ku;

⁴⁵mi te ’daa de nga mi adripi ma aoko ojani i mi vurisi ku, eri ma dri avini e’yo mini ’yele eri vurisi ku; vutinia ma nga di ’ba ti pe mi omvezu engazu ’daarisi ndo. Le ma ma ovu candisi emi iri troni drale o’du alu ma aliarisi a’disi ya?

⁴⁶Rebeka nga ’yo Isaka ma tia, Ma ande kai ezoanzi Hetini ’diyisi, kpere mani lezu drazu. Yakobo ka Heti ma ezoanzi awa’diyile, ’ba angu e’ipiru ’diyini ’diyi ma azi je okuru, mani ovuzu idriruri ma orodri ma dri ngoni ya?