Read lugbara E’doza 28 Bible Online

E’doza 28 - lugbara bible

E’doza 28

¹Isaka nga ani Yakoboni omve, nga asi ndriza fe eri dri, nga e’yo azi eri tia, nga ’yo eri tia, Mi ma je zamva ezoanzi Kanania ’diyi ma azi okuru aluni ku.

²Mi nga, mi mu Padani-aramua, kpere Betueli mi andri ma ati ma joa; ’daarisi mi je ezoanzi Labani mi andri ma adripini ma azi okuru’i.

³Mungu Okpoe’ini ma fe asi ndriza mi dri, ma fe mi ma ’ya efi tu, ma fe mini ezuzu kakau, mi ma ofu suru ongulumuru ani.

⁴Eri ma fe asi ndriza Iburahimuniri mi dri, ma fe mi dri ori mini be tualu, mi ma nya angu mini ovuzu alenia ani’boru ndra Munguni fele Iburahimu driri awurusoru beni!

⁵Isaka nga di Yakobo ma ti pe mvizu; eri nga mu Padani-aramua, kpere Labani Betueli ’ba Suriaari me mvi, Rebeka Yakobo pi ma andriru Esau beri ma adripi vu.

⁶Esau nga di ndre kini Isaka fe asi ndriza Yakobo dri ’bo, pe tini Padani-aramua oku jezu engazu ’daarisi, azini kini erini asi ndriza feria eri dri, azi eri tia azita indi kini, Mi ma je ’ba Kanania ’diyi ma ezoanzi ma azi okuru ku,

⁷azini kini Yakobo’inzi ati pi ma e’yo andri be ra, mu Padani-aramua ’bo,

⁸Esau nga vini ndre kini ezoanzi ’ba Kanania ’diyini feni ayiko i ati Isaka dri aluni ku,

⁹Esau nga di mu Isimaeli vu ani, nga Mahalati Isimaeli Iburahimu mvi ma zi, Nebayoti ma amvipiruri je i ma okuru, oku erini ovuzu yi be ’diyi ma aziru.

¹⁰Yakobo nga di efu Beeri-sebaarisi muzu Haranialeru.

¹¹Eri nga ca pari azinia, nga te la ’daa ini rra, etuni ’dele ’borisi. Eri nga oni pari ’daria ’diyi ma azi ’du, ’ba i ma dri atizu, nga la va pari ’da ma alia o’du kozu.

¹²Orobi nga eri obi ra, te mi ndre, apife enga nyakua, drini ca ’bua uru; te mi ndre, malaika Munguni ’diyini turia azini esiria eri ma driarisi!

¹³Te mi ndre, Yehova so pa eri ma drilia, nga ’yo ra, Ma Yehova Mungu mi a’bi Iburahimuni, ma Mungu Isakani; ma nga angu mini lazu driniari fe mi dri, azini ori mini dri indi;

¹⁴ori mini nga ovu kakau irifura nyakuarile, mi nga mi ere etuni ’derialeru azini etuni efurialeru, andraleru azini uruleru; mi ma alia, azini ori mini ma alia, ori’ba nyakua ’diyi dria nga asi ndriza isu ra.

¹⁵Te mi ndre, ma ovu mi be, ma nga mi ma ta mba pari mini muzuria dria, ma nga mi omvi dika angu ’doria; a’disiku ma ngani mi ku ku, de nga ma ’yeni e’yo mani e’yoni ’yole mi tia ’bori ku.

¹⁶Yakobo nga enga o’duarisi, nga ’yo ra, Ada ada Yehovani pari ’doria indi; de ma nini ku.

¹⁷Eri nga ovu urisi, nga ’yo ra, Pari ’dori eri uriuriru ’doni ya! Pari ’dori eri afa andini yo, lu jo Munguniri’i, eri kalitile ’buari’i.

¹⁸Yakobo nga enga uru o’bitisi drio drio, nga oni te erini ’bale i dri atizuri ’du, i’di uru oni edrele piririru, nga odu osu drinia.

¹⁹Eri nga pari nde ma ru ’da Beteli’i; de isu ndra aku nde ma ru okori Luzi’i.

²⁰Yakobo nga oyo so ci, kini, Mungu ka nga ovu ma be ra, ka nga ma ta mba geri mani muzu ’diri ma alia, ka ma dri enya fe nyazu, ka bongo fe mani suzaru ci,

²¹’dini mani ngazu emvizu dika ma ati vile joa asi anzurusi, ka’dini Yehovani nga di ovu Mungu maniru,

²²azini oni mani i’dile nyakua piriru ’diri nga ovu jo Munguniru; azini ma nga afa dria mini ngale fele ma dri ’diyi ma esele mudri ma azi alu fe mi dri ada.