Read lugbara E’doza 29 Bible Online

E’doza 29 - lugbara bible

E’doza 29

¹Yakobo nga di mu i ma ada, nga ca anzi etuni efuria ’diyi ma angua.

²Eri nga lu, te mi ndre, yi a’di ovu nyamukoa, te mi nderi fe kabilo ongulumu ongulumu na la ageinia; te yi adri yi a’di nderi fe kabilo ongulumuru dri. Oni yi a’di ma tiliari eri amboru.

³Kabilo ongulumu ongulumu dria nga yi oku ’dale; yi nga oni ogu yi a’di ma tiarisi, nga yi fe kabilo ongulumuru dri, nga oni ’ba i ma paria dika yi a’di ma tilia ndo.

⁴Yakobo nga ’yo yi tia, Ma adripi la, emi enga ngoa ya? Yi nga ’yo ra, Ama ’ba Harania ’diyi.

⁵Eri nga di ’yo yi tia, Emi ni Labani Nahori mvini ra ya? Yi ’yo ra, Ama ni eri ra.

⁶Eri nga ’yo yi tia, Eri onyiru ya? Yi nga ’yo ra kini, Eri onyiru; te mi ndre, zi Rakelini emu kabilo be!

⁷Eri nga ’yo ra, Mi ndre, etu nga ambo, etu tini ngazu yi okuzuri ecani nga ku; emi fe yi kabilo dri, emi mu di yi ocezu.

⁸Te yi ’yo ra, Ama econi ku, de nga kabilo ongulumu ongulumu ecani dria dria ku, de nga yi oguni oni yi a’di ma tiliasi ku; ama adri yi fe kabilo dri ndo.

⁹Erini nga e’yo ’yoria yi be, Rakeli emu i ati ma kabilo be; erini yi agei telenirisi.

¹⁰Te eri nga eca ’dini, Yakobo ka Rakeli Labani i andri ma adripi ma zi pi ndre, kabilo Labani i andri ma adripini be, Yakobo nga esi ogogo, nga oni ogu yi a’di ma tiliasi, nga yi fe kabilo ongulumuru Labani i andri ma adripini dri.

¹¹Yakobo nga Rakeli ma o’bolo ndru, nga wu mindresi o’duko urusi.

¹²Yakobo nga di: ’yo Rakeli tia kini i ovu ati ma adri, kini i Rebeka ma mvi’i; eri nga di nzu ani e’yo nde olu i ati ma tia.

¹³Eri nga eca ’dini, Labani ka e’yo i amvipi ma mvi Yakoboni ecazuri eri ’bo, eri nga nzu dri fuzu eri be, nga eri o’de, nga o’boloni ndru, eri ofizu jo inia. Eri nga di e’yo ’diyi olu Labani dri dria.

¹⁴Labani nga di ’yo eri tia, Mi ma fala, ma kalanya be ada! Eri nga la eri vu mba alu.

¹⁵Labani nga ’yo Yakobo ria’i Mini ovule ma adripinirisi, mi di azi nga ma dri toko ya? Mi olu mani, oya mini ma ovu a’dini ya?

¹⁶Isu Labani nde ovu ezoanzi be iri, okori ma ru Lea’i, vileri ma ru Rakeli’i.

¹⁷Lea ma mileefi okpo kokoru, te Rakeli ovu ndrizaru, rua be alaru.

¹⁸Yakobo le Rakelini ra; eri nga ’yo ra, Ma nga azi nga mi dri eli aziri Rakeli mi zi vilerisi.

¹⁹Labani nga ’yo ra, Eri onyiru ma ma fe eri mi dri, aga mani eri fezu ’ba azini driri ra; mi te ma be.

²⁰Yakobo nga di azi nga eli aziri Rakeli ma e’yosi ra; eli nde ’diyi ovu eri ma milia o’du were toko, a’disikuni eri ma avani eri vale turisi.

²¹Yakobo nga ’yo Labani ma tia, Mi fe oku mani ma dri fo, o’du mani ’diyini agale trerisi, ma ma fi eri vu ani.

²²Labani nga ’ba pari nde alia ’diyi oku dria tualu, omu ’bazu.

²³Eri nga eca ’dini, ka ca ondresi eri nga i zi Leani ’du ji eri vu; eri nga fi eri vu.

²⁴(Labani nga Zilipa zamva ini ati’boruri fe i zi Lea dri ovuzu eri ma ati’boru.)

²⁵Eri nga eca ’dini, o’bitisi, te mi ndre, eri de Lea’i; eri nga ’yo Labani tia, E’yo mini ’yele ma vu ’diri ngoni ya? Ma ngani azi mi dri Rakelisi ku ya? Mi ici ma dri lokirisi a’disi ya?

²⁶Labani nga ’yo ra kini, Angu amani ’doria ama adrini zamva vileri fe agupia zamva okorini oko ’dini ku.

²⁷Mi de, ’diri ma o’du aziri oko raka, ama nga aziniri fe mi dri ndo, azi azini mini ngale ngale ma dri eli drile aziririsi.

²⁸Yakobo ’ye ’dinile ra, nga o’du erini aziri de ra; eri nga di i zi Rakelini fe eri dri okuru ndo.

²⁹(Labani nga Bila zamva ini ati’boruri fe i zi Rakeli dri ovuzu eri ma ati’boru.)

³⁰Eri nga fi Rakeli vu indi, azini vini le Rakelini aga Leani ra, eri nga azi azini nga eri dri eli aziri dika.

³¹Yehova ndre kini ngu Leani onzi, eri nga ani eri ma opojo zi mva tizu; te Rakelini ondoni.

³²Lea nga mva isu i ma alia, nga osi agupiani, nga runi ’da Rubeni’i; te eci ’yo ra, Yehova lu inzata mani vu ’bo; curu’do agupi ma vileri nga ma le ra.

³³Eri nga vini mva isu dika, nga osi agupiani, nga ’yo ra, Yehovani e’yoni erile kini ngu ma onzirisi, fe vini mva ’diri ma dri ani; nga runi ’da Simeoni’i.

³⁴Eri nga mva isu dika, nga osi agupiani, nga ’yo ra, Curu’do agupi ma vileri nga ri eci ma be, mani agianzi otile eri dri narisi; ’da ani runi Levi’i.

³⁵Eri nga mva isu dika, nga vini osi agupiani, nga ’yo ra, Curu’do ’dorisi ma nga Yehovani inzi ra; eri ’da ani runi Yuda’i; nga di asi tizu ra.