Read lugbara E’doza 30 Bible Online

E’doza 30 - lugbara bible

E’doza 30

¹Rakeli ka ndre i tini anzi Yakobo dri ku, Rakeli ovu di a’yasi i amvi be; nga ’yo Yakobo ma tia, Mi fe anzi ma dri fo, kani ku ma ma dra ra.

²Yakobo nga ani ovu aokosi Rakeli be, eri nga ’yo ra, Ma Munguni, ori ogapi mi dri tikokorusiri’i ya?

³Eri nga ’yo ra, Mi ndre zamva mani ati’boru Bilani; mi fi eri vu, eri ma oti anzi mani bizaru dria, ma ma ovu vini ani anzi be erisi beni.

⁴Eri nga Bila zamva ini ati’boruri fe eri dri okuru; Yakobo nga di fi eri vu,

⁵Bila nga mva isu i ma alia, nga agupimva ti Yakobo dri.

⁶Rakeli nga ’yo ra,Mungu li e’yo mani ’bo, eri eri o’duko mani indi, eri fe agimva ma dri ’do; e’yo ’disi ’da ani runi Dani’i.

⁷Bila zamva Rakelini ati’boruri nga mva isu dika, nga vini mva azini ti Yakobo dri.

⁸Rakeli nga ’yo ra, Ma ’ba a’ya ma amvi be afusi okporu, ma nde di eri ra; nga ani runi ’da Nafutali’i.

⁹Lea ka di ndre eri asi anzi tizu ’bo, eri nga zamva ini ati’boru Zilipani ’du fe Yakobo dri okuru.

¹⁰Zilipa zamva ati’boru Leaniri nga agupimva ti Yakobo dri.

¹¹Lea: nga ’yo ra, ’Di drilebani! nga ani runi ’da Gadi’i,

¹²Zilipa zamva ati’boru Leaniri nga vini mva azini ti Yakobo dri.

¹³Lea nga ’yo ra,Ma di ayiko be! Ezoanzini ngale ma omvele ayikoru’irisi; ’cia ani runi i Aseri’i.

¹⁴Rubeni fu mu, ewu ’bani nganu lozurisi, nga olianziri agofukuru isu amvua, nga yi eji i andri Lea dri. Rakeli nga ’yo ani Lea ma tia, Ma zi mi tia, mi fe mi mvi ma agofuku ma azi ma dri.

¹⁵Eri nga ’yo eri tia, Mini ma agupi pazu rari mi milia eri e’yo wereni ya? Mi le ma mvi ma agofuku pa indi ya? Te Rakeli ’yo te kini, E’yo ’disi eri nga la mi be ani ini ’dirisi, mi mvi ma agofukusi beni.

¹⁶Yakobo nga ibi emvi amvuarisi ondresi, Lea nga fu mu dri fu eri be, nga ’yo ra, Mi ma fi ma vu; mani mi jele ada mi dri esezu ma mvi ma agofukusirisi. Eri nga la eri vu ini ’dasi

¹⁷Mungu eri e’yo Leani ra, eri nga mva isu i ma alia, nga agupimva towiri ti Yakobo dri.

¹⁸Lea ’yo ra, Mungu ofe oya mani ’bo, mani ma zamva ati’boruri fele ma agupi dririsi; nga ani runi ’da Isakari’i!

¹⁹Lea nga vini mva isu dika, nga agupimva aziari ti Yakobo dri.

²⁰Lea ’yo ra, Mungu fe lonyi ma dri onyiru tu; agupi mani nga adri ma be curu’do, mani agianzi otile eri dri aziarisi; nga ani runi ’da Zebuloni’i,

²¹Vutinia eri nga zamva ti ra, nga runi ’da Dina’i.

²²Te Mungu nga vini Rakeli ma e’yo ega ra, Mungu nga bile co eri vu, nga eri ma opojo zi mva tizu.

²³Eri nga mva isu i ma alia, nga agupimva ti, nga ’yo ra, Mungu nze drinza mani ’bo;

²⁴eri nga eri ma ru ’da Yusufu’i, ’yozu kini, Yehova ma o’ba mva azini ma dri indi fo!

²⁵Te eri nga eca ’dini Rakelini Yusufuni tizu ’borisi, Yakobo nga ’yo Labani ma tia, Mi fe geri ma dri mvizu ma vile paria, ama vile angua.

²⁶Mi fe ma dri oku mani ’diyi pi anzi mani be, mani azi ngale mi dri yi ma e’yosi ’diyi, mi ku ma ma mu; mini azi mani ngale mi dri ’bori nile rarisi.

²⁷Labani nga ’yo eri tia, Mi ka ovu asi ndrizasi ma vu, mi te nga ani ’doa; mani nile andrisi kini Yehova fe asi ndriza ma dri e’yo minisi rarisi.

²⁸Eri nga ’yo ra, Mi li oya mini mini leleri ma dri, ma nga fe ra.

²⁹Eri nga ’yo eri tia, Mi ni azi mani ngale mi driri pi, e’yo anyapa minini ovuzu ma vu onyiruri be ra.

³⁰A’disiku de nga mani ecaria ku, mi ovu anyapa be were toko, te curu’do yi ezu o’biru ’bo; azini Yehova fe asi ndriza mi dri pari dria mani ma ojazu muzuria. Te ma nga di afa oku ’ba ma vile joa ’diyi dri indi a’dungari ya?

³¹Eri nga ’yo ra, Ma nga di mi dri a’di afa fe ya? Yakobo nga ’yo ra, Mi ngani afa fe ma dri aluni ku; te mi ka e’yo ’diri ’ye ma dri, ma nga anyapa mini ongulumuru ’diyi oce dika, ma nga yi ta mba ra:

³²ma nga aga kabilo mini ongulumuru ’diyi ma eselesi dria andru, kabilo dria wura be nyunyuru ’diyi pi opezu kabilo lokoberu ’diyi pie, kabilo dria iniru ’diyi pie, azini ndri ma eselia ma nga lokobe ’diyi pi ope nyunyuru ’diyi be; anyapa ’dinile ’diyi nga ovu oya maniru.

³³Ka’dini e’yo mani kililiruri nga ma e’yo eti nze ceni etu drozirisi, mi ka nga emu oya mani ovupi mi miliari ma e’yo ndazuria. Ndri ma eselia anyapa dria ovupi nyunyuru ku ’diyi pi, kani lokoberu ku ’diyi pie, azini kabilo eselia iniru ’diyi dria, mi ka nga yi isu ma be ci, yi ma ovu lazaru ekile afa ’bani ogule ’diyile.

³⁴Labani nga di ’yo kini, Awa’dini! ’Yeke, ma ovu mini ’yolerile,

³⁵Etu ’dasi Labani nga ndriago wura olizaru ’diyi pi onze dria lokoberu ’diyi be, ndriaroni wura be nyunyuru ’diyi pi, lokoberu ’diyi be, anyapa dria rua emve be emve be ’diyi pie, kabilo dria iniru ’diyi pie dria, nga yi fe ocezu anzipiyi dri;

³⁶nga i ma esele co Yakobo be acita o’du pale nanile; Yakobo nga di anyapa Labanini ma joloko acepi ’diyi oce’i,

³⁷Yakobo nga di masa pati pi ma arakala ede kaliru, pati alimanderuri pie, lokoroji pie, nga yi ma o’boko oli emvesi inisi, nga fe zani emveru kali nde ma ruaa ’diyi ma e’da ce,

³⁸Eri nga kali nde erini o’bokoni olile ’bo ’diyi osu anyapa ma drilia, yi geri pari ’bani yi osuzuria ’diyi ma alia, pari nde anyapa ongulumuruni adrizu emuzu yi mvuzuria; de isu yi adri emu amva anzi tizu yini emuria yi mvuria ’ada.

³⁹Anyapa nga yi amva kali nde ’diyi ma drilia, anyapa nde nga ani anzi oti wura be olizaru azini nyunyuru azini lokobero.

⁴⁰Yakobo nga kabiloanzi ope, nga anyapa ma mile oja kabilo wura be olizaru ’diyi pi vu kabilo dria iniru anyapa ongulumuru Labanini ma eselia ’diyi be; te eri nga anyapa i vile ongulumuru ’diyi o’ba ndu, ’bani yi anyapa ongulumuru Labani vile ’diyi be tualu ku.

⁴¹Te eri nga eca ’dini anyapa okpo be tu ’diyi ka anzi oti, Yakobo nga kali osu yi drilia yi geri nde ma alia, yi ma amva yi anzi tizu kali nde ma eselesi beni,

⁴²te anyapa ka ovu okpo kokoru eri osuni di kali ku; ’dini kabilo okpo kokoru ’diyi Labanini, te okporu tu ’diyi Yakoboni.

⁴³Agu nde fu afa e’iru tu aga ra, eri ovu di anyapa be o’biru tu, ati’ba ezoanziru ’diyi pie, agupiru ’diyi pie, ngamia pie, akanya pie dria.