Read lugbara E’doza 31 Bible Online

E’doza 31 - lugbara bible

E’doza 31

¹Eri nga e’yo Labani ma anzi, pini ’yoleri eri ra, kini, Yakobo opa ama ati ma afa dria ’bo; eri isu lonyi ’diyi afa mira ama atini ’diyisi,

²Yakobo nga Labani ma mile ndre, te mi ndre, ovuni i vu onyiru ekile,okorile ku.

³Yehova nga ’yo Yakobo ma tia, Mi mvi mi a’bipi ma,angua, ori’ba mini vu; ma nga ovu mi be ra.

⁴Yakobo nga ’ba ti pe Rakeli pi omvezu Lea be emuzu lanyapa erini o’biru ’diyi vu asea,

⁵eri nga ’yo yi tia, Ma ndre emi ati ma mile ovuni onyiru ma vu ekile okorile ku. Te Mungu ma atiniri ovu ma be.

⁶Emi ni ra ma nga azi emi ati dri ma asi driasi;

⁷te emi ati ici ma lokirisi ra, eri oja oya mani ’paleko mudri, te Mungu a’ini erini ma ’yezu onzi ’dini ku.

⁸Eri ka ’yo ’dini, Anyapa nyunyuru ’diyi nga ovu oya miniru, ka’dini anyapa ongulumuru nga dria anzi oti wura be nyunyuru ani; te eri ka ’yo ra, Anyapa wura be olizaru ’diyi nga ovu oya miniru, ka’dini anyapa ongulumuru dria nga anzi oti wura be olizaru.

⁹’Dini Mungu opa, anyapa emi atini ’diyi ra, ofe yi ma dri ’bo

¹⁰Te eri eca ndra o’du anyapa o’biruni anzi otizurisi, ma enga ndra ma mile uru, ma ndre orobisi, te mi ndre, ndriago otupi lanyapa ma dria ’diyi yi wura be Olizaru ’diyi pi, nyunyuru ’diyi pie, minziminziru ’diyi be.

¹¹Malaika Munguni nga ’yo ma tia orobi ndesi kini, Yakobo la; ma nga ’yo ra, Ma ’do!

¹²Eri ’yo ra kini, Mi enga mi mile uru, mi ndre, ndriago dria otupi anyapa ma dria ’diyi yi wura be olizaru ’diyi pi, nyunyuru ’diyi pie, minziminziru ’diyi be; mani afa dria Labanini ’yele mi vuri ndrele rarisi.

¹³Ma Mungu Beteli pari ndra mini odu osuzu oni i’diza ma dria, mini ndra oyo sozu ma be ciriari’i. Mi nga, mi fu angu ’diriasi, mi mvi angu mini osizuria.

¹⁴Rakeli pi Lea be nga di e’yo omvi ’yo eri tia, Esele amani azini, kani awita ace ama dri nga indi ama ati ma joa ya?

¹⁵Eri lani ama ekile ani’bale ku ya? Eri fe ndra ama je ’bo, nya vini ama a’bu teketeke ’bo.

¹⁶Lonyi dria Munguni opale ama ati dri ’diyi, yi amani ama anzipi be; ka’dini mi ma ’ye di e’yo dria Munguni ’yole mi tiari’i fo.

¹⁷Yakobo nga di enga uru, nga fe anzipi ma otu ngamia ma dria oku piyi be;

¹⁸eri nga anyapa erini oku dria, afa dria erini okule ’diyi pie, anyapa erini isule, erini okule Padani-aramua ’diyi, muzu yi be i ati Isaka vu angu Kanania.

¹⁹Isu Labani mu kabilo i vile ’diyi ma ’biko liria; Rakeli nga i ati vile wura inzile inzi terafiru ’diyi ogu ra.

²⁰Yakobo nga Labaliarii Suriaoururi ku oguoule, awuni e’yo erini muzuri ece eri dri oko ku.

²¹’Dini eri apa afa erini be dria; eri enga uru, eri zo Yi Ara ma tia ’aa’daasi, eri nga i mile ’ba drile fezu oni Gileadiari vualeru.

²²O’du ka aga na, ’ba olu Labani tia kini Yakobo apa ’bo.

²³Eri nga di i ma adripi ’du i be, nga eri ma vuti bi o’du aziri, nga yi isu eri be angu oni be Gileadiaria.

²⁴Mungu nga eca Labani Suriaoururi vu orobisi inisi, ’yo tinia, Mi mba mi ti ma ta, mi ma ’yo e’yo onyiru kani onzi Yakobo vu ku.

²⁵Labani nga eca Yakobo vu. De Yakobo aso ma hema oni dria, Labani pi adripi erini be nga hema yini aso angu oni be Gileadiaria.

²⁶Labani nga ’yo Yakobo ma tia, Mi ’ye ngoni ya, mini ma kule oguoule mani e’yoni nikokoru, mini ma ezopi opale ekile ’ba obile ombaa seisi ’diyilerisi?

²⁷Mi apa ndi,ma kuzu oguoule a’disi ya? Mi eceni e’yoni ma dri, mani ani mi ti pezu ayiko pisi, ongo pie, ari pie, o’di pie ’dini ku a’disi ya?

²⁸Mi a’ini: mani agianzi mani piyi ma o’bolo ndruzu ma ezopi be ku a’disi ya? Mi ’ye e’yo azazani.

²⁹Ma okpo indi mi ’yezu onzi; te Mungu mi, atiniri ’yo ma tia aje inisi kini, Mi mba mi ti ma ta, mi ma ’yo e’yo onyiru kani onzi Yakobo vu ku.

³⁰Te mi ka tro le mu ra, mi ati: ma aku ma avani mi vale turisi ti, te di mi ogu adrou mani a’disi ya?

³¹Yakobo nga e’yo omvi, nga ’yo Labani ma tia kini, A’disiku ma ovu urisi, ma ega mi nga mi ezopiyi opa ma dri okposi,

³²Te ’ba mini adrou mini isuzu vuniari ma drani. Mi nda afa mini ovupi ma beri ama adripi ma milia ’de, mi epe mi afa. Te Yakobo nini Rakeli oguniri ku.

³³Labani nga di fi Yakobo vile hemari ma alia, Leaniri be, ezoanzi iri ati’boru ’diyi vileria indi, te eri isuni yi ku. Eri nga fu hema Leaniriasi, nga di fi Rakeli vileria.

³⁴Isu de Rakeli o’du adrou nde ma wura, o’ba yi enyi rizu ngamia driari ma alia, ri yi ma dria ci, Labani nga afa amvi hema ma alia dria, te eri isuni yi ku.

³⁵Rakeli nga ’yo i ati ma tia, Opi mani ma ovu ma be adrasi, mani engale mini uru kurisi ku, te ma a’bi be. Eri nga ndru ti, isuni adrou nde ma wura ku.

³⁶Yakobo ovu di adrasi, nga otre Labani ma dria; Yakobo nga e’yo omvi, nga ’yo Labani ma tia, Ma eza a’di e’yoni ya? Ezata mani mini ani ma vuti ebizu asi okasiri ngoni ya?

³⁷Mini afa mani amviria dria dria, afa mani joa ’diyi ma eselia mi isu a’di afani ya? Mi ’ba eri adripi mani ’diyi pi ma drilia adripi mini ’diyi be, yi ma li di e’yo ama eselia mi beri.

³⁸Ma ovu mi be eli kali iri ’dipi ’bo; kabiloaroni mini ’diyi ndriaroni be o’beni anzi yini ku, ma nyani kabiloago anyapa mini o’biru ’diyi ma eselia ku.

³⁹Afa nguruni ocile ’diyi ma ejini mi vu ku; candiniri mani; mi adri afa avipiri ma arioti a’i ma dri, lea tro ci etusi inisi ti.

⁴⁰Eri ndra ’dini; etusi etuni ma ve, inisi egbeni ma fu, o’du apa ma miliasi ra.

⁴¹Eli kali iri ’diyi ’dipi ma ovu mi vile joa; ma nga azi mi dri eli mudri drini su mi ezopi iri ’diyisi, ma nga vini azi eli azia anyapa mini o’biru ’diyisi, mi oja oya,mani paleko mudri.

⁴²Mungu ma,atini, Mungu Iburahimuni azini ruta Isakaniri eri ka ndra ovu ma be ku, te’do mi pe ma ti mvizu dri be;pirini ’bo ada. Mungu ndre inzata mani pi azi okporu ma drini ngaleri be ’bo, eri ega mi dria aje inisi.

⁴³Labani nga e’yo omvi ’yo Yakobo ma ria, Ezoanzi ’diyi ma ezopi, anzi ’diyi ma anzipi, anyapa o’biru ’diyi anyapa mani, afa dria: mini ndrele ’diyi yi mani. Ma eco ani andru a’di ’ye ezoanzi mani ’diyi ma ruaa, kani anzi yini otile ’diyi ma ruaa ya?

⁴⁴Te di, ama ma azi aziza ama eselia mi be; eri ma ovu ecetaru e’yo etiru ama eselia mi be.

⁴⁵Yakobo nga oni ’du, eri i’di uru oni edrele piririru.

⁴⁶Yakobo nga ’yo adripi erini ma tia, Emi oku oni; yi nga oni e’du odro tualu; yi nga nyaka nya ’dale oni odrole ’diyi ma tia.

⁴⁷Labani nga oni nde ma ru ’da Yegari-sahaduta’i, te Yakobo ’da ini Galeedi’i.

⁴⁸Labani nga ’yo ra, Oni odrole ’diyi yi ecetaru e’yo etiru ama eselia mi be andru. E’yo ’disi ’da runi Galeedi’i ani,

⁴⁹azini Mizipa’i, a’disiku eri ’yo ra, Yehova ma ndre ama eselia mi be, ewu amani ama nezu kuria.

⁵⁰Mi ka ma ezopi ’diyi inza, mi ka oku azini je ma ezopi ma aziru, ’ba aluni ama eselia yo, te mi ndre, Munguni e’yo ndre ama eselia mi beni.

⁵¹Labani nga ’yo Yakobo ma tia, Mi ndre oni odrole ’diyi, azini mi ndre oni edrele piriru mani i’dile ama eselia mi beri.

⁵²Oni odrole ’diyi ma ovu di ecetaru e’yo etiru, oni edrele piriruri ma ovu vini ecetaru e’yo etiru indi, kini ma ngani aga oni odrole ’diyi ma driarisi muzu mi vu e’yo onzi ’yezu ku, mi ngani vini aga oni odrole ’diyi pi ma driarisi oni edrele piriruri be emuzu ma vu e’yo onzisi ku.

⁵³Mungu Iburahimuni, Mungu Nahorini, Mungu yi ma atini ma li e’yo ama eseliarini. Yakobo nga oyo so Ruta i ati Isakaniri ma rusi.

⁵⁴Yakobo nga edeta ede oni ma dria, nga i adripiyi omve nyaka nyazu; yi nga ani nyaka nya, nga ovu oni dria ini be rra.

⁵⁵O’bitisi Labani nga enga drio, nga anzipi ma o’bolo ndru ezopi be, nga asi ndriza fe yi dri; Labani nga di mu ra, nga mvi i paria.