Read lugbara E’doza 33 Bible Online

E’doza 33 - lugbara bible

E’doza 33

¹Yakobo enga i mile uru, nga lu ra, te mi ndre, Esauni emu, ’ba turu su be. Eri nga anzi awa ani Lea pi vu, Rakeli pie, ezoanzi ati’boru iri ’diyi be.

²Eri nga ezoanzi ati’boru ’diyi o’ba drilealeru anzi yini be, vutinia Lea pi anzi erini be, vilerisi Rakeli pi Yusufu be.

³Eri ma ngulupi nga mu aga yi drilialeru, nga avu va nyakua paleko aziri, de nga cani i adripi vu ogogo ku.

⁴Te Esau nga nzu dri fuzu eri be, nga eri o’de, nga eri ma ombeti ekila avasi, nga eri ma o’bolo ndru ra, yi nga wu mindresi ani.

⁵Eri nga i ma mile enga uru, nga oku piyi ndre anzi be; eri nga ’yo ra, ’Ba m, be ’diyi a’di piyi ya? Eri nga ’yo rai Yi anzi Munguni fele ati’bo mini dri ’yeta anzutiri erinisi ’diyi.

⁶Ezoanzi ati’baru nga di eca ogogo, yi’i anzipi be, nga avu kpere va;

⁷Lea nga vini esi ogogo anzi erini be, nga avu va; vutinia Yusufu pi nga esi ogogo Rakeli be, nga avu va ra.

⁸Eri nga ’yo ra, Anyapa ongulumuru kakau mani te dri fuzu yi be ’diyi, mi pe yi ma ti ’dini a’disi ya? Eri nga di ’yo ra, Mani asi ndriza isuzu opi mani vu beni.

⁹Esau nga ’yo ra, Afa mani yi fu dri ma dri ra, ma adri la; afa mini ovuzu yi be ’diyi ma ovu o mini.

¹⁰Te Yakobo nga ’yo ra, ’Dini ku, ma zi mi tia, ma ka asi ndriza isu mi vu ’bo, mi a’i di afa feza mani fele ’diri fo! mani mi mile ndrele ekile ’bani Mungu ma mile ndrelerilerisi, azini vini mini ovule ayikosi masirisi.

¹¹Mi ma a’i, ma zi mi tia, mi a a’i afa feza mani ejile mi vuri fo, Munguni ’yele ma be ’yeta anzutirisirisi, azini afa mani yi fu dri ra. Eri nga eri omi okposi, eri nga a’i beni.

¹²Esau nga ’yo ra, Ama ma e’do aci amani, ama mu, ma nga dri ce mi drilia.

¹³Eri nga ’yo eri tia, Opi mani ni ra anzi yi odekuaru azini kabilo piyi ti pie mani ovuzu yi be ’diyi nga vini anzi endru; ka yi dro okposi o’du alu a’dule, yi nga odra dria.

¹⁴Ma zi mi tia, opi mani ma aga ati’bo ini ma drilia; ma’i ma nga yi dri ce e’yere e’yere, anyapa ovupi ma drilia ’diyini acilerile, anzini! acilerile, de nga ma cani opi mani vu oni Seiria ku.

¹⁵Esau nga ’yo ra, Mi fe ma ku ’ba ovupi ma be ’diyi ma azini tezu mi be ’de fo! Te eri ’yo ra, ’Dini a’disi ya? Mi fe ma ma isu asi ndriza opi mani vu fo!

¹⁶’Dini Esau nga mvi o’du ’darisi muzu i ma gerisi kpere Seiria.

¹⁷Yakobo nga ini mu kpere Sukotia, nga i dri jo si ’dale, nga lico ’be i ma anyapa dri; ’da ani pari nde ma ru Sukoti’i.

¹⁸Yakobo nga emu asi anzurusi aku Sekemuni ovupi angu Kananiaria, erini engaria Padani-aramuaria; nga hema aso aku nde ma drilialeru.

¹⁹Eri nga angu nde erini hema asozuri je Hamori Sekemu ma ati ma anzipi vu silingi turu alusi.

²⁰Eri si pari edeta edezuri ’dale, nga runi ’da Eli-Elohe-Israeli’i.