Read lugbara E’doza 37 Bible Online

E’doza 37 - lugbara bible

E’doza 37

¹Yakobo ovu angu i atini ovuzu alenia ani’boruria, ada angu Kanania.

²’Diyi a’bianzi Yakoboni. De isu Yusufuni eli be mudri drini aziri, eri kabilo ongulumuru oce i adripi be; mva nde adri ovu i ati ma oku Bila pi ma anzipi Zilipa be ’diyi be; Yusufu nga yi ma e’yo onzi olu ati tia.

³Isu de Israeli le Yusufuni avasi aga anzi erini azini ’diyi dria ra, erini ovule mva erini tile de eri dezarurisi; eri nga eri dri kanzu wura be ndu nduri so.

⁴Adripi erini nga di ndre kini yi ati le eri avasi aga adripi erini ’diyi dria ra; yi nga eri ngu onzi ani, econi vini yini e’yo ’yozaru eri tia asi basi ku.

⁵Orobi nga Yusufuni obi, eri nga e’yoni olu i adripi tia, yi nga eri ngu ani drile drile.

⁶Eri nga ’yo yi tia, Ma emi zi, emi eri orobi ma obipiri ma e’yo fo:

⁷te mi ndre, amani nganu lile ’bo ’diyi omberia amvua, mi ndre, nganu mani ombezaruri nga enga i edre urulesi; te mi ndre, nganu ombezaru emini ’diyi nga yi otro ageinia kuru, nga avu va ombeza maniri inzizu.

⁸Adripi erini nga ’yo eri tia, Mi nga angu nya ama drilia opiru ada ya? Mi nga adri ama dri cezu opiru ada ya? Yi nga ani eri ngu drile drile aga ra, orobi erini pi ma e’yosi e’yo erini ’yoleri be.

⁹Orobi azini nga vini eri obi ra, eri nga e’yoni olu i adripi ma tia, nga ’yo ra, Mi ndre, orobi obi vini ma dika; te mi ndre, etu pi mba be ’bi’bio mudri drini alu ’diyi be avu va ma inzizu.

¹⁰Eri nga e’yoni olu i ati pi ma tia i adripi be, te ati nga ega eri ma dria, nga ’yo eri tia, Orobi mi obipi ’dini ’diri eri a’di orobini ya? Ama mi andri pie, mi adripi be, ama nga avu va nyakua mi inzizu ada ya?

¹¹Adripi erini ovu ani ma’yalasi eri vu, te ati mba e’yo erini ’yoleri ma ta i asia.

¹²Adripi erini nga di mu yi ati ma kabilo ongulumuru ocezu Sekemua.

¹³Israeli nga ’yo Yusufu ma tia, Mi adripi ovuni kabilo oceria Sekemua ku ya? Mi emu, ma nga mi ti pe yi vu. Eri nga ’yo ra, Ma ’do.

¹⁴Eri nga ’yo eri tia, Mi mu di, mi ndre kani mi adripi ma e’yo ovu onyiru, kani kabilo yi onyiru indi; mi emvi e’yoni oluzu ma tia ani beni. ’Dini eri nga eri ti pe e’bu Hebironiasi, eri nga di ca Sekemua.

¹⁵Te ’ba azini nga eri isu ra, te mi ndre, eri aba aba asea; agu nde nga eri zi kini, Mi a’di nda ya?

¹⁶Eri nga ’yo eri tia, Ma ma adripiyi nda; mi olu ma tia, ma zi mi tia, pari yini kabilo ocezuri ngoa ya?

¹⁷Agu nde nga ’yo ra, Yi ku angu ’dori ’bo, a’disiku mani erile yini ’yoria kini, Onyiru ama ma mu Dotaniarisi. Yusufu nga i adripi ma vuti bi, nga yi isu Dotania.

¹⁸Yi ka eri ndre ziri, de nga erini ecaria yi vu ku, yi otu e’yo ruania eri fuzu.

¹⁹Yi nga ’yo yi eselia, Mi ndre, orobi e’ini emu ’da.

²⁰Ama mu di, ama fu eri, ama ma ’be avuni ’bile ’diyi ma azi ma alia; te ama nga ’yo ra, Nguru ci erini; ama nga orobi erini ’diyi nga a’di ’ye yari ndre ani.

²¹Te Rubeni ka e’yo ’diri eri ra, nga eri pa yi ma driasi, nga ’yo kini, Ama fu eri ku.

²²Rubeni nga ’yo yi tia, Emi ma ada ari ku; emi ’be eri, ’bile roko dria ’diria, te emi ma ’ba emi dri eri ruaa ku-erini eri pazu yi ma driasi, eri omvizu ati vu beni.

²³Te eri nga eca ’dini, Yusufu ka eca i adripi vu ’bo, yi nga kanzu tru Yusufu ma ruaarisi ra, kanzu nde wura be ndu ndu ovupi eri ma ruaari;

²⁴yi nga eri bi ra, nga eri ’be ’bilea. ’Bile nde ma ale pirini, alenia yi yo.

²⁵Yi nga ri va nyaka nya; yi nga yi mile enga uru, nga angu lu, te mi ndre, ’ba Isimaelini ongulumuru ibi enga Gileadiasi, yi afa arikariru pi oli ngamiasi odu efizari pie, ajinguru be, yi jizu Misiria.

²⁶Yuda nga ’yo i adripi ma tia, Ama ka ama adrini fu ra, ka eri ma ari zi ndi, orodrini a’dini ya?

²⁷Ama emu, ama fe eri ozi ’ba Isimaelini dri, ama dri ma ovu eri ruaa ku, erini ovule ama adri, ama arinirisi. Eri ma adripi nga e’yo erini eri ani,

²⁸’Ba Midiani afa ozipi ’diyi ri aga ’dasi, yi nga Yusufuni enze ese uru ’bilearisi, nga eri ozi ’ba Isimaelini dri silingi dahaburu kali irisi. Yi nga Yusufuni ji Misiria.

²⁹Rubeni nga di dri atri ’bile tia: te mi ndre, Yusufuni de di ’bilea yo; eri nga di i ma bongo asi ra,

³⁰nga mvi i adripi vu, nga ’yo ra, Mva eri ’dale yo; te ma’i, ma di mu ngole ya?

³¹Yi nga kanzu Yusufuni ’du, nga ndriago fu ra, nga kanzu su arini ma alia;

³²yi nga mu kanzu nde wura be ndu nduri be jizu yi ati vu, nga ’yo ra, Ama isu afa ’diri; mi ma ndre nga kani eri mi mvi ma kanzu, kani ku yani.

³³Eri nga eri ini ra, nga ’yo fa, Eri ma mvi ma kanzu ya! Anyapa nya erini; oce Yusufuni kpi kpi ada.

³⁴Yakobo nga i bongo asi, nga koliba su i opilia, nga i ma mva wu o’du kakau.

³⁵Anzi erini dria ’diyi pi ezoanzi erini ’diyi be dria enga eri ma asi omizu; te ti, eri ga asi omiza a’i kosi, te eri ’yo ra, Ma nga wu ’dani cazu kpere mani ngaria firia ’bilia ma mva vusi. Ati wu eri mindresi.

³⁶’Ba Midiani fe Yusufuni je Misiria Potifari ’ba azi ngapi Farau dri, asikari opi agei tepi ’diyi ma driliari dri.